سیدنا طلحہ بن عبیداللہ رضی اللہ عنہ بیان کرتے ہیں: میں تمہیں نبی اکرم صلی اللہ علیہ وسلم کے بارے میں جو بات بھی بتاؤں گا، وہ ایسی بات ہو گی، جو میں نے خود نبی اکرم صلی اللہ علیہ وسلم کو ارشاد فرماتے ہوئے سنا ہو گا، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”عمرو بن العاص، قریش کے نیک لوگوں میں سے ایک ہے، اور اچھا گھرانہ یہ لوگ ہیں: عبداللہ کا باپ (یعنی سیدنا عمرو بن العاص رضی اللہ عنہ) عبداللہ کی ماں اور عبدالله۔“ (علامہ ہیثمی فرماتے ہیں:) میں یہ کہتا ہوں:
یہ روایت امام ترمذی نے اختصار کے ساتھ نقل کی ہے۔
یہ روایت امام ابویعلیٰ نے نقل کی ہے اور امام أحمد نے اس کی مانند نقل کی ہے اور اس روایت کے رجال ثقہ ہیں۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 15902]

سیدنا عقبہ بن عامر رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا: ”عبداللہ کا باپ، عبداللہ کی ماں اور عبداللہ اچھا گھرانہ ہیں۔“
یہ روایت امام أحمد نے نقل کی ہے۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 15903]

سیدنا عبداللہ بن عمرو رضی اللہ عنہ بیان کرتے ہیں: ایک دن میں نبی اکرم صلی اللہ علیہ وسلم کے ساتھ آپ کے گھر میں موجود تھا، آپ نے فرمایا: کیا تم یہ جانتے ہو کہ ہمارے ساتھ گھر میں کون موجود ہے؟ میں نے عرض کی: کون ہے؟ یا رسول اللہ! نبی اکرم صلی اللہ علیہ وسلم نے فرمایا: جبرائیل ہے، میں نے کہا: اے سیدنا جبرائیل! آپ پر سلام ہو اور اللہ تعالیٰ کی رحمتیں ہوں، نبی اکرم صلی اللہ علیہ وسلم نے فرمایا: اس نے تمہیں سلام کا جواب دیا ہے۔
یہ روایت امام طبرانی نے دو اسناد کے ساتھ نقل کی ہے اور ان دونوں میں سے ایک کی سند حسن ہے۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 15904]

سیدنا عبداللہ بن عمرو رضی اللہ عنہ بیان کرتے ہیں: آج اگر میں ایک بھلائی کروں، تو یہ میرے نزدیک نبی اکرم صلی اللہ علیہ وسلم کے ساتھ کی ہوئی اس سے دُگنی بھلائی سے زیادہ پسندیدہ ہو گی، کیونکہ جب ہم نبی اکرم صلی اللہ علیہ وسلم کے ساتھ ہوتے تھے تو ہماری توجہ آخرت کی طرف تھی، دنیا ہمارا مطمع نظر نہیں ہوتی تھی، اور آج ہم دنیا کی طرف مائل ہو چکے ہیں۔
یہ روایت امام طبرانی نے نقل کی ہے اور اس کے رجال صحیح کے رجال ہیں۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 15905]

محمد بن عبدالله بن نمیر بیان کرتے ہیں: سیدنا عبداللہ بن عمرو رضی اللہ عنہ کا انتقال 65 ہجری میں ہوا تھا۔
یہ روایت امام طبرانی نے نقل کی ہے۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 15906]

یحیی بن بکیر بیان کرتے ہیں: سیدنا عبداللہ بن عمرو بن العاص رضی اللہ عنہ جن کی کنیت ”ابومحمد“ تھی، ان کا انتقال مصر میں ہوا، انہیں ان کے گھر میں دفن کیا گیا، یہ 65 ہجری کی بات ہے، بعض حضرات نے یہ کہا: ہے: 68 ہجری میں ہوا تھا، اس وقت ان کی عمر 72 سال تھی، یحیی نامی راوی کو شک ہے: یا شاید 92 سال تھی (یعنی 72 یا 92 کے درمیان یہ شک یحیی نامی راوی کو ہے)۔
یہ روایت امام طبرانی نے نقل کی ہے۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 15907]