سیدنا ابوامامہ رضی اللہ عنہ بیان کرتے ہیں: نبی اکرم صلی اللہ علیہ وسلم نے مجھے میری قوم کی طرف بھیجا، تاکہ میں ان لوگوں کو اللہ تعالیٰ کی طرف دعوت دوں اور انہیں اسلامی تعلیمات بتاؤں، میں ان لوگوں کے پاس آیا وہ لوگ اپنے اونٹ ہانک کر لائے تھے، ان لوگوں نے ان کا دودھ دوہ لیا تھا اور اسے پی لیا تھا، جب ان لوگوں نے مجھے دیکھا تو کہا: صدی بن عجلان کو خوش آمدید، ان لوگوں نے کہا: ہمیں یہ پتہ چلا ہے کہ آپ بے دین ہو کر ان صاحب کے پاس چلے گئے، میں نے کہا: جی نہیں! بلکہ میں اللہ اور اس کے رسول پر ایمان لا چکا ہوں، اور اللہ کے رسول نے مجھے تمہاری طرف بھیجا ہے، تاکہ میں تمہارے سامنے اسلام اور اس کی تعلیمات پیش کروں، راوی کہتے ہیں: ابھی وہ لوگ اسی صورت حال میں تھے کہ اسی دوران ایک پیالہ آیا، جس میں خون موجود تھا، وہ ان لوگوں نے رکھا اور اس کے اردگرد اکٹھے ہو گئے اور اسے کھانے لگے، ان لوگوں نے کہا: اے صدی! تم بھی آ جاؤ، میں نے کہا: تمہارا ستیاناس ہو، میں ان صاحب کی طرف سے تمہارے پاس آیا ہوں، جنہوں نے اس چیز کو تمہارے لئے حرام قرار دیا ہے، صرف وہ جانور حلال ہیں، جسے تم ذبح کرو، جیسا کہ اللہ تعالیٰ نے ان پر یہ حکم نازل کیا ہے، لوگوں نے دریافت کیا: اللہ تعالیٰ نے کیا فرمایا ہے؟ میں نے کہا: یہ آیت نازل ہوئی ہے:
”تم پر مردار اور خون اور خنزیر کا گوشت حرام قرار دیا گیا ہے۔“
یہ آیت یہاں تک ہے: ”اور یہ کہ تم تیروں کے ذریعے پانسہ کھیلو۔“
راوی کہتے ہیں: پھر میں انہیں اسلام کی طرف دعوت دینے لگا اور وہ انکار کرنے لگے، میں نے ان سے کہا: تمہارا ستیاناس ہو، تم میرے پاس ایک گھونٹ پانی لے کر آؤ، کیونکہ مجھے شدید پیاس محسوس ہو رہی ہے، راوی کہتے ہیں: میں نے عمامہ باندھا ہوا تھا، ان لوگوں نے کہا: جی نہیں! بلکہ ہم تمہیں ایسے ہی چھوڑ دیں گے کہ تم پیاسے ہونے کے عالم میں مر جاؤ، راوی کہتے ہیں: میں نے عمامہ باندھا اور اپنا سر عمامے پر رکھا اور شدید گری میں گرم ریت پر سو گیا، خواب میں ایک شخص میرے پاس آیا، اس کے پاس شیشے کا بنا ہوا پیالہ تھا، لوگوں نے اس سے زیادہ خوبصورت پیالہ نہیں دیکھا ہو گا، اس میں ایسا مشروب تھا کہ لوگوں نے اس سے زیادہ لذیذ مشروب نہیں دیکھا ہو گا، اس نے وہ مجھے دیا، میں نے اسے پیا، جب میں اُسے پی کر فارغ ہوا تو میں بیدار ہو گیا، اس کے بعد اللہ کی قسم! مجھے پیاس محسوس نہیں ہوئی اور اس مشروب کے بعد مجھے پیاس کا پتہ ہی نہیں ہے۔

یہ روایت امام طبرانی نے نقل کی ہے اس کی سند میں ایک راوی بشیر بن شریح ہے اور وہ ضعیف ہے۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 16055]

سیدنا ابوامامہ رضی اللہ عنہ بیان کرتے ہیں: نبی اکرم صلی اللہ علیہ وسلم نے مجھے باہلہ قبیلے کی طرف بھیجا، میں ان لوگوں کے پاس آیا، وہ اس وقت کھانا کھا رہے تھے، انہوں نے مجھے خوش آمدید کہا:، میری عزت افزائی کی اور یہ کہا: آگے آؤ! اور کھانا کھاؤ، میں نے کہا: میں اس لئے آیا ہوں تاکہ میں تمہیں اس کھانے سے منع کر دوں اور میں اللہ کے رسول کا قاصد ہوں، میں تم لوگوں کے پاس آیا ہوں، تاکہ تم ان پر ایمان لے آؤ، تو ان لوگوں نے مجھے جھٹلایا اور مجھے پرے کر دیا، میں بھوکا اور پیاسا تھا، شدید بھوک نے مجھے پریشانی کا شکار کر دیا تھا، میں سو گیا، خواب میں میرے پاس دودھ کا مشروب آیا، میں نے وہ پیا تو میرا پیٹ بھر گیا، لوگوں نے کہا: تمہارے معززین اور نمایاں افراد میں سے ایک شخص تمہارے پاس آیا اور تم لوگوں نے اسے لوٹا دیا، تم لوگ اس کے پاس جاؤ اسے کھانا کھلاؤ اور مشروب دو، جو وہ چاہتا ہو، تو وہ لوگ کھانا اور مشروب لے کر میرے پاس آئے، میں نے کہا: مجھے تمہارے کھانے اور تمہارے مشروب کی ضرورت نہیں ہے، کیونکہ اللہ تعالیٰ نے مجھے کھلا دیا ہے اور پلا دیا ہے، تم لوگ اس صورت حال کا جائزہ لو! ا جس پر میں ہوں، جب ان لوگوں نے جائزہ لیا، تو وہ مجھ پر ایمان لے آئے اور اس چیز پر ایمان لے آئے، جو میں اللہ کے رسول صلی اللہ علیہ وسلم کی طرف سے لے کر آیا تھا۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 16056]

ایک روایت میں یہ الفاظ ہیں: میں نے اُن لوگوں کو اپنا پیٹ دکھایا، تو وہ سب لوگ مسلمان ہو گئے۔
یہ روایت امام طبرانی نے دو اسناد کے ساتھ نقل کی ہے، پہلی سند حسن ہے، اس کی سند میں ایک راوی ابوغالب ہے، ویسے اس کی توثیق کی گئی ہے۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 16057]