ابو المتوکل رحمہ اللہ سے روایت ہے کہ انہوں نے سیدنا عبداللہ بن عمر رضی اللہ عنہما کو دیکھا، کہ ان کا ازار (تہبند) ان کی پنڈلیوں کے نصف تک تھا، ان کی قمیص اس کے اوپر تھی، اور ان کی چادر قمیص کے اوپر تھی۔ [المطالب العالية بزوائد المسانيد الثمانية/كِتَابُ اللِّبَاسِ وَالزِّينَةِ/حدیث: 2248]

سیدنا سلمہ رضی اللہ عنہ سے روایت ہے کہ حضرت عثمان رضی اللہ عنہ کا تہبند اُن کی آدھی پنڈلیوں تک رہتا تھا، اس پر آپ رضی اللہ عنہ سے استفسار کیا گیا، تو آپ رضی اللہ عنہ نے فرمایا: ”ہمارے ساتھی (یعنی نبی کریم صلی اللہ علیہ وسلم ) کا تہبند بھی اسی طرح ہوتا تھا“۔ [المطالب العالية بزوائد المسانيد الثمانية/كِتَابُ اللِّبَاسِ وَالزِّينَةِ/حدیث: 2249]

سیدنا علی رضی اللہ عنہ سے روایت ہے کہ ”رسول اللہ صلی اللہ علیہ وسلم نے فرمایا: ”جب تمہارا تہبند (ازار) اتنا کشادہ ہو کہ اس سے جسم کے اوپر والے حصے کو بھی ڈھانپا جا سکے تو اسے (بطور چادر) اوڑھ لو، اور جب وہ تنگ ہو تو اسے (صرف) تہبند کے طور پر (کمر کے نچلے حصے پر) باندھ لو۔““
اس حدیث کے راوی اسحاق بن عبداللہ بن ابی فروہ متروک الحدیث ہیں۔ [المطالب العالية بزوائد المسانيد الثمانية/كِتَابُ اللِّبَاسِ وَالزِّينَةِ/حدیث: 2250]