سیدنا نابغہ جعدی رضی اللہ عنہ سے روایت ہے کہ میں نبی کریم صلی اللہ علیہ وسلم کی خدمتِ اقدس میں حاضر ہوا اور آپ کو اپنے یہ اشعار سنائے: ”بے شک ہم ایسی بہادر قوم ہیں جو اپنے گھوڑوں کو اس بات کا عادی نہیں بناتے کہ جب ہمارا دشمن سے مقابلہ ہو تو وہ راہِ فرار اختیار کریں یا بدک کر بھاگیں، اور معرکہ آرائی کے دن نیزوں کے پیہم کچوکوں کی وجہ سے ہمارے گھوڑوں کے رنگ بدل جاتے ہیں یہاں تک کہ تم خون کی سرخی کی وجہ سے گہرے سیاہ گھوڑے کو بھی سرخی مائل گمان کرنے لگتے ہو، اور ہمارا یہ شیوہ نہیں ہے کہ ہم اپنے گھوڑوں کو (میدانِ جنگ سے) صحیح سالم واپس لائیں اور نہ ہی ہمیں یہ بات ناگوار گزرتی ہے کہ وہ خاکِ مقتل میں لت پت ہو جائیں، ہماری شرافت اور ہمارے آبا و اجداد کی عظمت آسمان کی بلندیوں تک پہنچ چکی ہے اور ہم اس سے بھی بلند تر کسی جائے ظہور و رفعت کے طلب گار ہیں“، اس پر نبی کریم صلی اللہ علیہ وسلم نے دریافت فرمایا: ”کہاں تک؟“ (یعنی آسمان سے اوپر کون سا مقام مقصود ہے؟) میں نے عرض کیا: ”جنت تک“، آپ صلی اللہ علیہ وسلم نے ارشاد فرمایا: ”ہاں، ان شاء اللہ تعالیٰ“، سیدنا نابغہ رضی اللہ عنہ بیان کرتے ہیں کہ جب میں نے آپ صلی اللہ علیہ وسلم کے سامنے یہ اشعار پڑھے: ”اور اس حلم و بردباری میں کوئی بھلائی نہیں جس کی حفاظت کے لیے ایسی شجاعت و تندی نہ ہو جو اس کے سکون و صفائی کو گدلا ہونے سے بچائے، اور اس نادانی میں کوئی خیر نہیں جس کے پاس ایسا صاحبِ عقل و دانش نہ ہو جو کسی معاملے کے درپیش ہونے پر اسے سلجھا کر درست انجام تک پہنچا سکے“، تو نبی کریم صلی اللہ علیہ وسلم نے ان کے حق میں یہ دعا فرمائی: «لَا يَفْضُضِ اللہُ فَاكَ» ”اللہ تعالیٰ تمہارے دانتوں کو سلامت رکھے اور انہیں کبھی نہ توڑے“۔ راوی بیان کرتے ہیں کہ اس نبوی دعا کی برکت سے سیدنا نابغہ رضی اللہ عنہ دانتوں کے اعتبار سے تمام لوگوں میں سب سے زیادہ حسین تھے، اور ان کا حال یہ تھا کہ اگر (بڑھاپے میں) ان کا کوئی دانت گرتا تو اس کی جگہ نیا دانت نکل آتا تھا۔
اس حدیث کو امام حارث بن ابی اسامہ نے اپنی مسند میں روایت کیا ہے۔ [المطالب العالية بزوائد المسانيد الثمانية/كِتَابُ الْمَنَاقِبِ/حدیث: 4032]