سیدنا جابر بن سمرہ رضی اللہ عنہ کہتے ہیں: میں نے رسول اللہ صلی اللہ علیہ وسلم کو کھڑے ہو کر خطبہ دیتے دیکھا، پھر آپ صلی اللہ علیہ وسلم خاموشی سے تھوڑی دیر بیٹھ جاتے، پھر کھڑے ہو کر اپنے منبر پر دوسرا خطبہ دیتے۔ جو تمہیں بتائے کہ اس نے آپ صلی اللہ علیہ وسلم کو بیٹھ کر خطبہ دیتے دیکھا ہے تو اس کی تصدیق مت کرنا۔ [المعجم الكبير للطبراني/باب الجيم/حدیث: 1960]

سیدنا جابر بن سمرہ رضی اللہ عنہ کہتے ہیں: رسول اللہ صلی اللہ علیہ وسلم نمازیں تقریباً اسی طرح پڑھتے تھے جیسے تم پڑھتے ہو، البتہ عشاء کی نماز تمہاری نماز سے کچھ تاخیر سے پڑھتے تھے، اور آپ صلی اللہ علیہ وسلم نماز ہلکی پڑھاتے تھے۔ [المعجم الكبير للطبراني/باب الجيم/حدیث: 1961]

سیدنا جابر بن سمرہ رضی اللہ عنہ کہتے ہیں: میں نے رسول اللہ صلی اللہ علیہ وسلم کو فرماتے سنا: ”مسلمانوں کی، یا فرمایا: مومنوں کی ایک جماعت ضرور آل کسریٰ کا وہ خزانہ فتح کرے گی جو سفید محل میں ہے۔“ [المعجم الكبير للطبراني/باب الجيم/حدیث: 1962]

سیدنا جابر رضی اللہ عنہ کہتے ہیں: میں نے آپ صلی اللہ علیہ وسلم کو، یعنی نبی کریم صلی اللہ علیہ وسلم کو، سنا کہ آپ صلی اللہ علیہ وسلم نے مدینہ کا نام طابا رکھا۔ [المعجم الكبير للطبراني/باب الجيم/حدیث: 1963]

سیدنا جابر بن سمرہ رضی اللہ عنہ کہتے ہیں: ایک آدمی کا خچر مر گیا تو وہ نبی کریم صلی اللہ علیہ وسلم کے پاس فتویٰ پوچھنے آیا۔ جابر رضی اللہ عنہ بیان کرتے ہیں کہ رسول اللہ صلی اللہ علیہ وسلم نے اس کے مالک سے فرمایا: ”کیا تمہارے پاس اس کے علاوہ کوئی اور گزر بسر کا ذریعہ نہیں؟“ اس نے کہا: نہیں۔ آپ صلی اللہ علیہ وسلم نے فرمایا: ”جاؤ اسے کھاؤ۔“ [المعجم الكبير للطبراني/باب الجيم/حدیث: 1964]

سیدنا جابر بن سمرہ رضی اللہ عنہ کہتے ہیں: میں نے نبی کریم صلی اللہ علیہ وسلم کو فرماتے سنا: ”قیامت سے پہلے بہت سے جھوٹے پیدا ہوں گے۔“ [المعجم الكبير للطبراني/باب الجيم/حدیث: 1965]

سیدنا جابر رضی اللہ عنہ کہتے ہیں: میں نے ماعز کو دیکھا جب اسے نبی کریم صلی اللہ علیہ وسلم کے پاس لایا گیا، وہ ایک پستہ قد، مضبوط جسم والا آدمی تھا، اس نے اپنے خلاف چار بار گواہی دی کہ اس نے زنا کیا ہے، تو رسول اللہ صلی اللہ علیہ وسلم نے فرمایا: ”شاید تم سے کچھ اور سرزد ہوا ہو (زنا نہ ہوا ہو)۔“ اس نے کہا: نہیں، اللہ کی قسم! اس بدنصیب نے زنا کیا ہے۔ چنانچہ آپ صلی اللہ علیہ وسلم نے اسے رجم کر دیا، پھر خطبہ دیا اور فرمایا: ”سن لو! جب بھی ہم اللہ کے راستے میں نکلتے ہیں تو ان میں سے کوئی (عورتوں کے پاس) پیچھے رہ جاتا ہے اور بکرے کی سی آواز نکالتا ہے (یعنی فحش کاموں کی طرف مائل ہوتا ہے)، وہ کسی عورت کو تھوڑا سا دودھ دے دیتا ہے، خبردار! اللہ مجھے ان میں سے جس پر بھی قدرت دے گا، میں اسے عبرت ناک سزا دوں گا۔“ [المعجم الكبير للطبراني/باب الجيم/حدیث: 1966]

سیدنا جابر رضی اللہ عنہ سے روایت ہے کہ نبی کریم صلی اللہ علیہ وسلم نے ماعز کو رجم کیا اور کوڑے مارنے کا ذکر نہیں کیا۔ [المعجم الكبير للطبراني/باب الجيم/حدیث: 1967]