حسن بصری رحمہ اللہ کہتے ہیں: میں نے سیدنا کعب بن عجرہ رضی اللہ عنہ سے پوچھا: آپ کے بارے میں رخصت کی آیت نازل ہوئی تھی، تو آپ نے کیا کیا؟ انہوں نے فرمایا: ”میں نے ایک بکری ذبح کی۔“ [المعجم الكبير للطبراني/باب الكاف/حدیث: 16404]

سیدنا کعب بن عجرہ رضی اللہ عنہ کہتے ہیں: رسول اللہ صلی اللہ علیہ وسلم ہماری طرف تشریف لائے تو فرمایا: ”میرے بعد تم پر کچھ حکمران مقرر ہوں گے، وہ منبروں پر حکمت کی باتیں کریں گے، لیکن جب (منبروں سے) اتریں گے تو وہ (حکمت) ان سے چھن جائے گی، اور ان کے دل مردار سے بھی زیادہ بدبودار ہوں گے۔ تو جو ان کے جھوٹ کی تصدیق کرے اور ان کے ظلم پر ان کی مدد کرے، وہ مجھ سے نہیں اور میں اس سے نہیں، اور وہ حوض پر نہیں آئے گا۔ اور جو ان کے جھوٹ کی تصدیق نہ کرے اور ان کے ظلم پر ان کی مدد نہ کرے، وہ مجھ سے ہے اور میں اس سے ہوں، اور وہ حوض پر آئے گا۔“ [المعجم الكبير للطبراني/باب الكاف/حدیث: 16405]

سیدنا کعب بن عجرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”روزہ ڈھال ہے، اور صدقہ گناہ کو اس طرح بجھا دیتا ہے جیسے پانی آگ کو بجھا دیتا ہے۔“ [المعجم الكبير للطبراني/باب الكاف/حدیث: 16406]

سیدنا کعب بن عجرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اے کعب بن عجرہ! اللہ تمہیں ان حکمرانوں سے پناہ دے جو میرے بعد آئیں گے، جو ان کے پاس جائے اور ان کے جھوٹ کی تصدیق کرے اور ان کے ظلم پر ان کی مدد کرے، وہ مجھ سے نہیں اور میں اس سے نہیں، اور وہ کبھی حوض پر نہیں آئے گا۔“ [المعجم الكبير للطبراني/باب الكاف/حدیث: 16407]