ابو امیہ ثقفی رحمہ اللہ بیان کرتے ہیں کہ سیدنا معاویہ رضی اللہ عنہ ظہر کی نماز پڑھ کر (باہر) نکلے اور فرمایا: اپنی جگہوں پر ٹھہرے رہو یہاں تک کہ میں تمہارے پاس آؤں۔ پھر وہ چادر اوڑھے ہوئے ہمارے پاس آئے، اور جب عصر کی نماز پڑھ لی تو فرمایا: کیا میں تمہیں وہ بات نہ بتاؤں جو رسول اللہ صلی اللہ علیہ وسلم کے صحابہ نے کی تھی؟ ہم نے عرض کیا: کیوں نہیں۔ انہوں نے فرمایا: انہوں نے آپ صلی اللہ علیہ وسلم کے ساتھ پہلی نماز پڑھی، پھر بیٹھے رہے، تو آپ صلی اللہ علیہ وسلم ان کے پاس تشریف لائے اور فرمایا: ”کیا تم ابھی تک (یہاں سے) نہیں گئے؟“ انہوں نے عرض کیا: نہیں۔ تو آپ صلی اللہ علیہ وسلم نے فرمایا: ”کاش تم اپنے رب کو دیکھتے کہ اس نے آسمان کا ایک دروازہ کھولا اور اپنے فرشتوں کو تمہاری مجلس دکھائی، وہ ان کے سامنے تم پر فخر کر رہا ہے جبکہ تم نماز کا انتظار کر رہے ہو۔“ [المعجم الكبير للطبراني/باب الميم/حدیث: 16904]