سیدنا معاویہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص یہ پسند کرے کہ لوگ اس کے سامنے کھڑے ہوں، اس کے لیے جہنم واجب ہو گئی۔“ [المعجم الكبير للطبراني/باب الميم/حدیث: 16901]

سیدنا معاویہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تم میں سب سے بہتر وہ شخص ہے جو اپنے گھر والوں کے لیے سب سے بہتر ہو۔“ [المعجم الكبير للطبراني/باب الميم/حدیث: 16902]

سیدنا معاویہ رضی اللہ عنہ بیان کرتے ہیں کہ رسول اللہ صلی اللہ علیہ وسلم ایک ایسے قافلے کے پاس تشریف لائے جو اکٹھے بیٹھے تھے، آپ صلی اللہ علیہ وسلم نے فرمایا: ”تمہیں کس چیز نے جمع کیا ہے؟“ انہوں نے عرض کیا: ہم اللہ کا ذکر کر رہے ہیں اور اس کی نعمتوں کا جن سے اس نے ہم پر انعام کیا اور جن کے ذریعے اس نے ہمیں جاہلیت اور اس کی جہالت سے نجات دی۔ آپ صلی اللہ علیہ وسلم نے فرمایا: ”اللہ کی قسم! کیا یہی تمہارے جمع ہونے کا سبب ہے؟“ انہوں نے کہا: جی ہاں۔ آپ صلی اللہ علیہ وسلم نے فرمایا: ”اس ذات کی قسم جس کے ہاتھ میں میری جان ہے، اگر تم سچے ہو تو اللہ تعالیٰ فرشتوں کے سامنے تم پر فخر کرتا ہے۔“ [المعجم الكبير للطبراني/باب الميم/حدیث: 16903]