سیدنا عمرو بن مرہ رضی اللہ عنہ سے روایت ہے کہ انہوں نے سیدنا معاویہ رضی اللہ عنہ سے کہا کہ میں نے رسول اللہ صلی اللہ علیہ وسلم کو یہ فرماتے ہوئے سنا: «مَا مِنْ وَالٍ يُغْلَقُ بَابُهُ دُونَ ذَوِي الْخَلَّةِ وَالْحَاجَةِ، إِلَّا أَغْلَقَ اللَّهُ أَبْوَابَ السَّمَاءِ، عَنْ خَلَّتِهِ وَمَسْكَنَتِهِ» ”ایسا کوئی بھی حکمران جو حاجت مندوں، ضرورت مندوں اور مساکین پر اپنے دروازے بند کر لیتا ہے، تو اللہ تعالیٰ بھی اس کی حاجت، ضرورت اور فقر و فاقہ کے وقت آسمان کے دروازے بند کر دیتا ہے“۔ [مسند أبي يعلى الموصلي/مُسْنَدُ عَمْرِو بْنِ مُرَّةَ/حدیث: 1565]

سیدنا عمرو بن مرہ رضی اللہ عنہ سے روایت ہے کہ انہوں نے سیدنا معاویہ رضی اللہ عنہ سے کہا کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ ”کوئی بھی ایسا امیر یا حاکم نہیں جو ضرورت مند، حاجت مند اور مسکین کے لیے اپنا دروازہ بند کرے مگر یہ کہ اللہ تعالیٰ بھی اس کی ضرورت اور فقر و فاقہ کے وقت آسمان کے دروازے بند فرما دیتا ہے“، (یہ سن کر) سیدنا معاویہ رضی اللہ عنہ نے لوگوں کی حاجات کی نگرانی کے لیے ایک مستقل شخص کو مقرر فرما دیا۔ [مسند أبي يعلى الموصلي/مُسْنَدُ عَمْرِو بْنِ مُرَّةَ/حدیث: 1566]

سیدنا عمرو بن مرہ جہنی رضی اللہ عنہ سے روایت ہے کہ میں رسول اللہ صلی اللہ علیہ وسلم کی خدمتِ اقدس میں حاضر تھا کہ آپ صلی اللہ علیہ وسلم نے دریافت فرمایا: ”یہاں جو لوگ قبیلہ معد سے تعلق رکھتے ہیں، وہ کھڑے ہو جائیں؟“ وہ بیان کرتے ہیں کہ میں نے کھڑا ہونے کے لیے اپنا کپڑا سنبھالا تو آپ صلی اللہ علیہ وسلم نے مجھ سے فرمایا: ”تم بیٹھ جاؤ۔“ پھر جب آپ صلی اللہ علیہ وسلم نے دوسری مرتبہ یہی بات فرمائی تو میں نے عرض کی: اے اللہ کے رسول صلی اللہ علیہ وسلم ! میں کن لوگوں میں سے ہوں؟ آپ صلی اللہ علیہ وسلم نے ارشاد فرمایا: ”تمہارا تعلق قبیلہ حِمیَر سے ہے۔“ [مسند أبي يعلى الموصلي/مُسْنَدُ عَمْرِو بْنِ مُرَّةَ/حدیث: 1567]