سیدنا عبداللہ بن عباس رضی اللہ عنہما، سیدنا فضل بن عباس رضی اللہ عنہما سے روایت کرتے ہیں کہ انہوں نے بیان فرمایا: ”میں نے رسول اللہ صلی اللہ علیہ وسلم کو عرفہ کے دن نوش فرماتے ہوئے دیکھا۔“ [مسند أبي يعلى الموصلي/مُسْنَدُ الْفَضْلِ بْنِ الْعَبَّاسِ رَحِمَهُ اللَّهُ/حدیث: 6736]

سیدنا فضل بن عباس رضی اللہ عنہما سے روایت ہے کہ قبیلہ خثعم کی ایک خاتون رسول اللہ صلی اللہ علیہ وسلم کی بارگاہ میں حاضر ہوئی اور عرض گزار ہوئی: ”اے اللہ کے رسول! اللہ تعالیٰ کا اپنے بندوں پر حج کا جو فریضہ ہے وہ میرے والد پر اس بڑھاپے میں لازم ہوا ہے کہ وہ سواری پر جم کر بیٹھنے کی بھی سکت نہیں رکھتے۔“ آپ صلی اللہ علیہ وسلم نے ارشاد فرمایا: ”تم اپنے والد کی طرف سے حج ادا کرو۔“ معمر رحمہ اللہ بیان کرتے ہیں کہ یحییٰ بن ابی اسحاق رحمہ اللہ یہ روایت کرتے تھے کہ انہوں نے سلیمان بن یسار رحمہ اللہ کو یہ فرماتے ہوئے سنا کہ وہ خاتون دراصل اپنی والدہ کے متعلق سوال کر رہی تھیں۔ [مسند أبي يعلى الموصلي/مُسْنَدُ الْفَضْلِ بْنِ الْعَبَّاسِ رَحِمَهُ اللَّهُ/حدیث: 6737]

سیدنا فضل بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”نماز دو دو رکعت ہے اور ہر دو رکعت میں تشہد ہے، نیز (نماز) سراپا عاجزی، فروتنی اور سکون و وقار اختیار کرنا ہے، پھر تم اپنے دونوں ہاتھ اٹھاؤ“ آپ صلی اللہ علیہ وسلم نے (اس کی وضاحت میں) فرمایا: ”تم اپنے دونوں ہاتھوں کو اپنے رب کی طرف اس طرح بلند کرو کہ ان کی ہتھیلیاں تمہارے چہرے کے رخ پر ہوں اور تم کہو: «يَا رَبِّ يَا رَبِّ» ”اے میرے رب! اے میرے رب!“ تو جس نے ایسا نہ کیا تو وہ (نماز) ناقص اور ادھوری ہے۔“ [مسند أبي يعلى الموصلي/مُسْنَدُ الْفَضْلِ بْنِ الْعَبَّاسِ رَحِمَهُ اللَّهُ/حدیث: 6738]