سیدہ جویریہ رضی اللہ عنہا سے روایت ہے کہ نبی اکرم صلی اللہ علیہ وسلم ان کے پاس تشریف لائے جبکہ وہ جمعہ کے دن روزے سے تھیں، تو آپ صلی اللہ علیہ وسلم نے ان سے دریافت فرمایا: ”کیا تم نے کل روزہ رکھا تھا؟“ انہوں نے عرض کی: نہیں، آپ صلی اللہ علیہ وسلم نے پھر دریافت فرمایا: ”کیا تم کل روزہ رکھنے کا ارادہ رکھتی ہو؟“ انہوں نے عرض کی: نہیں، تو آپ صلی اللہ علیہ وسلم نے ارشاد فرمایا: ”پھر اپنا روزہ افطار کر لو۔“ [مسند أبي يعلى الموصلي/حَدِيثُ جُوَيْرِيَةَ بِنْتِ الْحَارِثِ/حدیث: 7064]

سیدہ جویریہ رضی اللہ عنہا سے روایت ہے کہ نبی کریم صلی اللہ علیہ وسلم نے ”اسی (سابقہ حدیث) کی مانند“ ارشاد فرمایا ہے۔ [مسند أبي يعلى الموصلي/حَدِيثُ جُوَيْرِيَةَ بِنْتِ الْحَارِثِ/حدیث: 7065]

سیدہ جویریہ بنتِ حارث رضی اللہ عنہا سے روایت ہے کہ رسول اللہ صلی اللہ علیہ وسلم جمعہ کے دن ان کے پاس تشریف لائے اور وہ اس وقت روزے سے تھیں، تو آپ صلی اللہ علیہ وسلم نے ان سے دریافت فرمایا: ”کیا تم نے گزشتہ روز (جمعرات کو) روزہ رکھا تھا؟“ انہوں نے عرض کیا: ”جی نہیں،“ پھر آپ صلی اللہ علیہ وسلم نے دریافت فرمایا: ”تو کیا تم آنے والے کل (ہفتہ کے دن) روزہ رکھنے کا ارادہ رکھتی ہو؟“ انہوں نے عرض کیا: ”نہیں،“ تو اس پر آپ صلی اللہ علیہ وسلم نے ارشاد فرمایا: ”پھر تم (اپنا آج کا) روزہ افطار کر لو۔“ [مسند أبي يعلى الموصلي/حَدِيثُ جُوَيْرِيَةَ بِنْتِ الْحَارِثِ/حدیث: 7066]

سیدہ جویریہ بنت حارث رضی اللہ عنہا سے روایت ہے کہ انہوں نے بیان فرمایا کہ رسول اللہ صلی اللہ علیہ وسلم میرے پاس تشریف لائے اور دریافت فرمایا: ”کیا کچھ کھانے کو ہے؟“ تو انہوں نے عرض کی: جی نہیں، سوائے ایک ہڈی کے جو ہماری آزاد کردہ لونڈی کو بطورِ صدقہ دی گئی تھی، تو آپ صلی اللہ علیہ وسلم نے ارشاد فرمایا: ”اسے قریب لے آؤ کیونکہ یہ صدقہ اپنے مستحق تک پہنچ چکا ہے۔“ [مسند أبي يعلى الموصلي/حَدِيثُ جُوَيْرِيَةَ بِنْتِ الْحَارِثِ/حدیث: 7067]

سیدہ جویریہ بنتِ حارث رضی اللہ عنہا سے روایت ہے کہ رسول اللہ صلی اللہ علیہ وسلم صبح کے وقت میرے پاس تشریف لائے جبکہ میں تسبیح پڑھنے میں مصروف تھی، پھر آپ صلی اللہ علیہ وسلم اپنی کسی ضرورت کے لیے تشریف لے گئے اور جب نصف النہار کے قریب واپس لوٹے تو دریافت فرمایا: ”کیا تم تب سے اسی طرح (ذکر کے لیے) بیٹھی ہو؟“ میں نے عرض کیا: جی ہاں، تو آپ صلی اللہ علیہ وسلم نے ارشاد فرمایا: ”کیا میں تمہیں ایسے کلمات نہ سکھا دوں کہ اگر ان کا موازنہ ان تمام تسبیحات سے کیا جائے جو تم نے اب تک کی ہیں تو یہ ان کے برابر ہو جائیں یا ان پر غالب آ جائیں؟ (وہ کلمات یہ ہیں:) «سُبْحَانَ اللَّهِ عَدَدَ خَلْقِهِ» ”اللہ پاک ہے اپنی مخلوق کی تعداد کے برابر“ (تین مرتبہ)، «سُبْحَانَ اللَّهِ زِنَةَ عَرْشِهِ» ”اللہ پاک ہے اپنے عرش کے وزن کے برابر“ (تین مرتبہ)، «سُبْحَانَ اللَّهِ رِضَى نَفْسِهِ» ”اللہ پاک ہے اپنی رضا کے مطابق“ (تین مرتبہ) اور «سُبْحَانَ اللَّهِ مِدَادَ كَلِمَاتِهِ» ”اللہ پاک ہے اپنے کلمات کی روشنائی کے برابر“ (تین مرتبہ)۔“ [مسند أبي يعلى الموصلي/حَدِيثُ جُوَيْرِيَةَ بِنْتِ الْحَارِثِ/حدیث: 7068]