سیدہ رزینہ رضی اللہ عنہا (رسول اللہ صلی اللہ علیہ وسلم کی آزاد کردہ لونڈی) سے روایت ہے کہ سیدہ سودہ یمانیہ رضی اللہ عنہا، سیدہ عائشہ رضی اللہ عنہا کی زیارت کے لیے آئیں جبکہ ان کے پاس سیدہ حفصہ بنت عمر رضی اللہ عنہما بیٹھی تھیں؛ سیدہ سودہ رضی اللہ عنہا بڑی عمدہ حالت اور زيب و زینت کے ساتھ آئیں، انہوں نے یمنی منقش چادروں والی قمیص اور ویسی ہی اوڑھنی اوڑھ رکھی تھی، اور ان کی آنکھوں کے دونوں گوشوں پر ایلوا اور زعفران کے مسور کے دانوں جیسے دو نشان (بطورِ سنگھار) لگے ہوئے تھے — راویہ علیلہ رحمہ اللہ کہتی ہیں کہ میں نے بھی عورتوں کو اسی طرح بناؤ سنگھار کرتے پایا ہے — تو سیدہ حفصہ رضی اللہ عنہا نے سیدہ عائشہ رضی اللہ عنہا سے کہا: ”اے ام المؤمنین! جب رسول اللہ صلی اللہ علیہ وسلم تشریف لائیں گے تو کیا ہم اسی حال میں ہوں گی جبکہ یہ ہمارے درمیان (اپنے حسن و سنگھار سے) چمک رہی ہوں گی؟“ ام المؤمنین سیدہ عائشہ رضی اللہ عنہا نے ان سے فرمایا: ”اے حفصہ! اللہ سے ڈرو، اے حفصہ! اللہ سے ڈرو“، حفصہ رضی اللہ عنہا نے کہا: ”میں تو ان کی یہ زینت ضرور خراب کر کے رہوں گی“، پھر انہوں نے (سیدہ سودہ سے) پوچھا: ”تم کیا کہہ رہی ہو؟“ اور سیدہ سودہ رضی اللہ عنہا کے کانوں میں کچھ گرانی (اونچا سننا) تھی، تو سیدہ حفصہ رضی اللہ عنہا نے ان سے کہا: ”اے سودہ! وہ کانا (دجال) نکل آیا ہے“، انہوں نے (گھبرا کر) کہا: ”کیا واقعی؟“ اور وہ سخت خوفزدہ ہو کر لرزنے لگیں اور پوچھا: ”میں کہاں چھپوں؟“ حفصہ رضی اللہ عنہا نے کہا: ”تم اس جھونپڑی میں چلی جاؤ“ — وہ کھجور کی شاخوں سے بنی ان کی ایک کوٹھری تھی جس میں وہ کھانا پکایا کرتے تھے — چنانچہ وہ وہاں جا کر چھپ گئیں جہاں گندگی اور مکڑی کے جالے تھے، اتنے میں رسول اللہ صلی اللہ علیہ وسلم تشریف لائے تو وہ دونوں (سیدہ عائشہ و حفصہ رضی اللہ عنہما) اس قدر ہنس رہی تھیں کہ ہنسی کی شدت سے بات نہیں کر پا رہی تھیں، آپ صلی اللہ علیہ وسلم نے تین بار دریافت فرمایا: ”یہ ہنسی کیسی ہے؟“ تو انہوں نے اپنے ہاتھوں سے جھونپڑی کی طرف اشارہ کیا، آپ صلی اللہ علیہ وسلم وہاں تشریف لے گئے تو دیکھا کہ سیدہ سودہ رضی اللہ عنہا (خوف سے) کانپ رہی ہیں، آپ صلی اللہ علیہ وسلم نے ان سے پوچھا: ”اے سودہ! تمہیں کیا ہوا؟“ انہوں نے عرض کی: ”یا رسول اللہ! وہ کانا (دجال) ظاہر ہو گیا ہے“، آپ صلی اللہ علیہ وسلم نے فرمایا: ”وہ ابھی نہیں نکلا، البتہ وہ ضرور نکلے گا، وہ ابھی نہیں نکلا، البتہ وہ ضرور نکلے گا، وہ ابھی نہیں نکلا، البتہ وہ ضرور نکلے گا“، پھر آپ صلی اللہ علیہ وسلم نے اندر داخل ہو کر انہیں نکالا اور ان کے جسم سے گرد و غبار اور مکڑی کے جالے جھاڑنے لگے۔ [مسند أبي يعلى الموصلي/حَدِيثُ رُزَيْنَةَ/حدیث: 7160]

سیدہ رزینہ رضی اللہ عنہا (رسول اللہ صلی اللہ علیہ وسلم کی آزاد کردہ خادمہ) سے مروی ہے کہ ”رسول اللہ صلی اللہ علیہ وسلم نے بنو قریظہ اور بنو نضیر کی فتح کے روز سیدہ صفیہ رضی اللہ عنہا کو جنگی قیدی کے طور پر حاصل کیا اور آپ صلی اللہ علیہ وسلم انہیں قیدی کی حیثیت میں ساتھ لا رہے تھے، پھر جب انہوں نے (مسلمان) خواتین کو دیکھا تو پکار اٹھیں: «أَشْهَدُ أَنْ لَا إِلَهَ إِلَّا اللَّهُ، وَأَنَّكَ رَسُولُ اللَّهِ» ”میں گواہی دیتی ہوں کہ اللہ کے سوا کوئی سچا معبود نہیں اور بے شک آپ اللہ کے رسول ہیں“، چنانچہ رسول اللہ صلی اللہ علیہ وسلم نے انہیں رہا کر دیا جبکہ ان کا بازو آپ صلی اللہ علیہ وسلم کے دستِ مبارک میں تھا، پھر آپ صلی اللہ علیہ وسلم نے انہیں آزاد کیا، ان سے نکاح کی خواہش ظاہر فرمائی، ان سے شادی کی اور انہیں مہر عطا فرمایا۔“ [مسند أبي يعلى الموصلي/حَدِيثُ رُزَيْنَةَ/حدیث: 7161]

امۃ اللہ بنت رزینہ رحمہا اللہ سے مروی ہے کہ ان سے (علیلہ کی والدہ نے) دریافت کیا: اے امۃ اللہ! کیا آپ کو آپ کی والدہ سیدہ رزینہ رضی اللہ عنہا نے یہ حدیث بیان کی ہے کہ انہوں نے رسول اللہ صلی اللہ علیہ وسلم کو یومِ عاشورہ کے روزے کا تذکرہ فرماتے ہوئے سنا ہے؟ انہوں نے جواب دیا: ”جی ہاں، اور رسول اللہ صلی اللہ علیہ وسلم اس دن کی اس قدر تعظیم و اہمیت بیان فرماتے تھے کہ اپنے گھرانے کے شیر خوار بچوں اور اپنی صاحبزادی سیدہ فاطمہ رضی اللہ عنہا کے دودھ پیتے بچوں کو طلب فرماتے، پھر ان کے دہنِ مبارک میں اپنا لعابِ دہن ڈالتے اور ان کی ماؤں سے ارشاد فرماتے: «لَا تُرْضِعْنَهُنَّ إِلَى اللَّيْلِ» ”انہیں رات ہونے تک دودھ نہ پلانا۔““ [مسند أبي يعلى الموصلي/حَدِيثُ رُزَيْنَةَ/حدیث: 7162]