ام المومنین سیدہ عائشہ رضی اللہ عنہا سے روایت ہے: ”رسول اللہ صلی اللہ علیہ وسلم کے پاس دو کپڑے تھے جو آپ صلی اللہ علیہ وسلم جمعہ کے دن پہنتے تھے، پھر جب آپ صلی اللہ علیہ وسلم واپس تشریف لاتے تو ہم انہیں آئندہ جمعہ تک لپیٹ کر رکھ دیتے تھے۔“
امام طبرانی رحمہ اللہ فرماتے ہیں: ”یہ حدیث سیدہ عائشہ رضی اللہ عنہا سے صرف اسی سند سے مروی ہے، اس میں واقدی منفرد ہیں۔“ [المعجم الأوسط/بَابُ الْحَاءِ/حدیث: 3516]

سیدنا عبداللہ بن سلام رضی اللہ عنہ سے روایت ہے کہ میں نے عرض کیا: ”اے اللہ کے رسول! ہم بہتر ہیں یا وہ لوگ جو ہمارے بعد آئیں گے؟“ تو آپ صلی اللہ علیہ وسلم نے فرمایا: ”اگر ان میں سے کوئی احد پہاڑ کے برابر سونا بھی خرچ کر ڈالے تو وہ تم میں سے کسی ایک کے خرچ کیے ہوئے ایک مد (کے ثواب) کو نہیں پہنچ سکتا اور نہ ہی اس کے نصف کو۔“
امام طبرانی رحمہ اللہ فرماتے ہیں: ”یہ حدیث سیدنا عبداللہ بن سلام رضی اللہ عنہ سے صرف اسی سند سے مروی ہے، اس میں واقدی منفرد ہیں۔“
”دار الحرمین کی طباعت میں اسی طرح ہے، اور مخطوطے میں بھی اسی طرح ہے، جیسا کہ طحان کی طباعت میں اس کی طرف اشارہ کیا گیا ہے۔“ [المعجم الأوسط/بَابُ الْحَاءِ/حدیث: 3517]

عمرو بن شعیب رحمہ اللہ اپنے والد سے اور وہ ان کے دادا سے روایت کرتے ہیں کہ سیدہ بسرہ بنت صفوان رضی اللہ عنہا نے رسول اللہ صلی اللہ علیہ وسلم سے اس عورت کے بارے میں پوچھا جو اپنا ہاتھ اپنی شرمگاہ میں داخل کر لے؟ تو آپ صلی اللہ علیہ وسلم نے فرمایا: ”اس پر وضو لازم ہے۔“
امام طبرانی رحمہ اللہ فرماتے ہیں: ”اس حدیث کو ابن ثوبان سے یحییٰ بن راشد کے سوا کسی نے روایت نہیں کیا، اس میں سلیمان بن داود منفرد ہیں۔“ [المعجم الأوسط/بَابُ الْحَاءِ/حدیث: 3518]