عبدالرحمن بن ابی لیلیٰ ایک بااعتماد شخص سے نقل فرماتے ہیں، جو سیدنا عمر رضی اللہ عنہ سے نقل فرماتے ہیں کہ: ”نمازِ عید الاضحیٰ، فطر اور جمعہ کی دو دو رکعات ہیں اور مسافر کے لیے مکمل نماز دو رکعت ہے، قصر نہیں، یہ نبی صلی اللہ علیہ وسلم کے فرمان کے مطابق ہے۔“ [السنن الكبرى للبيهقي/كِتَابُ صَلَاةِ العِيدَيْنِ/حدیث: 6236]

عبید اللہ بن ابی بکر فرماتے ہیں کہ سیدنا انس رضی اللہ عنہ سے جب نمازِ عید امام سے رہ جاتی تو وہ اپنے گھر والوں کو جمع کر کے ویسے ہی نماز پڑھاتے جیسے امام عید کی نماز پڑھاتا ہے۔ سیدنا انس بن مالک رضی اللہ عنہ سے نقل کیا گیا کہ جب وہ اپنے گھر ”زاویہ“ میں ہوتے اور بصرہ میں عید کے لیے حاضر نہ ہوتے تو وہ اپنے غلاموں اور بیٹوں کو جمع کرتے، پھر اپنے غلام عبداللہ بن ابی عتبہ کو حکم دیتے، وہ شہر والوں کی طرح ان کو نماز پڑھاتے اور ان کی تکبیروں کی طرح تکبیر کہتے۔ اور حسن بصری رحمہ اللہ سے مسافر کے بارے میں نقل کیا جاتا ہے کہ اگر وہ چاشت کے وقت کو پا لے تو وہ رک جائے یہاں تک کہ سورج طلوع ہو جائے، پھر دو رکعت نماز پڑھے، پھر اگر نمازِ چاشت پڑھنی ہے تو پڑھ لے۔
عکرمہ رحمہ اللہ سے نقل کیا جاتا ہے کہ سواد والے عید میں جمع ہوئے اور دو رکعت نماز ادا کی جیسے امام کرتا ہے؛ اور محمد بن سیرین رحمہ اللہ سے منقول ہے کہ وہ پسند کرتے تھے کہ جب آدمی سے عیدین کی نماز رہ جائے تو وہ ”جبان“ جا کر ویسے ہی نماز پڑھے جیسے امام پڑھتا ہے؛ اور عطاء رحمہ اللہ فرماتے ہیں کہ جب نمازِ عید رہ جائے تو دو رکعت نماز ادا کرے، لیکن ان دونوں میں تکبیر نہیں ہے۔ [السنن الكبرى للبيهقي/كِتَابُ صَلَاةِ العِيدَيْنِ/حدیث: 6237]