اللہ تعالیٰ کے اس ارشاد کے بیان میں ہے کہ ”اے ایمان والو! کوئی قوم کسی دوسری قوم کا تمسخر نہ اڑائے، ہو سکتا ہے کہ وہ ان سے بہتر ہوں، اور نہ ہی عورتیں دوسری عورتوں کا مذاق اڑائیں، ہو سکتا ہے کہ وہ ان سے بہتر ہوں، اور نہ تم ایک دوسرے پر عیب لگاؤ اور نہ ہی ایک دوسرے کو برے القاب سے پکارو؛ ایمان لانے کے بعد فسق کا نام پانا نہایت برا ہے، اور جو توبہ نہ کریں تو وہی لوگ درحقیقت ظالم ہیں۔“

”اے ایمان والو! بہت زیادہ گمان کرنے سے بچو، بیشک بعض گمان گناہ ہوتے ہیں، اور (کسی کے عیوب کی) ٹوہ نہ لگایا کرو اور نہ ہی تم میں سے کوئی کسی کی غیبت کرے، کیا تم میں سے کوئی اس بات کو پسند کرے گا کہ وہ اپنے مردہ بھائی کا گوشت کھائے؟ پس تم اس سے کراہت کرتے ہو، اور اللہ سے ڈرو، یقیناً اللہ توبہ قبول کرنے والا، نہایت رحم فرمانے والا ہے“۔