یہ حدیث پہلے نمبر 17005 کے تحت گزر چکی ہے۔ [السنن الكبرى للبيهقي/كتاب الحدود/حدیث: 17105]

سیدنا علی رضی اللہ عنہ فرماتے ہیں کہ نبی صلی اللہ علیہ وسلم کی بعض بیویوں کی کسی لونڈی نے بچہ جنا تو نبی صلی اللہ علیہ وسلم نے مجھے فرمایا کہ: ”اس پر حد قائم کرو۔“ [السنن الكبرى للبيهقي/كتاب الحدود/حدیث: 17106]

حسن بن محمد بن علی رحمہ اللہ کہتے ہیں کہ سیدہ فاطمہ زہرا رضی اللہ عنہا کی ایک لونڈی نے زنا کیا تو آپ نے اسے حد لگائی۔ [السنن الكبرى للبيهقي/كتاب الحدود/حدیث: 17107]

ثمامہ بن انس رحمہ اللہ کہتے ہیں کہ جب کوئی لونڈی زنا کر لیتی تو سیدنا انس رضی اللہ عنہ اپنے بیٹوں سے کہتے کہ اس پر حد قائم کرو۔ [السنن الكبرى للبيهقي/كتاب الحدود/حدیث: 17108]

سیدنا عبداللہ بن عمر رضی اللہ عنہما نے اپنی ایک لونڈی کو حد لگوائی اور جو کوڑے مارنے والا تھا اسے کہا کہ ”دونوں ٹانگوں سے نیچے مارنا اور آہستہ“ تو ہم نے کہا کہ پھر اللہ کے اس فرمان کا کیا (مطلب) ہے: ﴿وَلَا تَأْخُذْكُم بِهِمَا رَأْفَةٌ فِي دِينِ اللَّهِ﴾ [سورة النور: 2] ”ان کے ساتھ اللہ کے دین میں کوئی نرمی نہ برتو؟“ تو انہوں نے فرمایا: ”کیا پھر میں اس کو قتل کر دیتا۔“
امام شافعی رحمہ اللہ فرماتے ہیں کہ انصار اور ان کے بعد (کے لوگ) غلاموں کو حد لگایا کرتے تھے۔ [السنن الكبرى للبيهقي/كتاب الحدود/حدیث: 17109]

سعید بن جبیر رحمہ اللہ کہتے ہیں کہ لونڈی اگر زنا کر لے تو اسے اس وقت تک حد نہیں ماری جائے گی جب تک وہ شادی نہ کر لے، تو میں نے عبدالرحمن بن ابی لیلیٰ رحمہ اللہ سے پوچھا تو انہوں نے فرمایا: میں نے انصار کے باقی ماندہ لوگوں کو پایا کہ وہ اپنی لونڈیوں کو جب وہ زنا کر لیتی تھیں اپنی مجلسوں میں کوڑے مارا کرتے تھے۔
امام شافعی رحمہ اللہ فرماتے ہیں کہ سیدنا ابن مسعود رضی اللہ عنہ اس کا حکم دیا کرتے تھے اور سیدنا ابو برزہ رضی اللہ عنہ نے تو حد لگائی تھی۔ [السنن الكبرى للبيهقي/كتاب الحدود/حدیث: 17110]

اشعث اپنے والد سے نقل فرماتے ہیں کہ میں ابوبرزہ رضی اللہ عنہ کے پاس حاضر ہوا تو انہوں نے اپنی زانیہ لونڈی کو حد لگائی۔ [السنن الكبرى للبيهقي/كتاب الحدود/حدیث: 17111]

خارجہ بن زید رحمہ اللہ سیدنا زید رضی اللہ عنہ سے روایت کرتے ہیں کہ انہوں نے اپنی ایک لونڈی کو حد لگائی۔ [السنن الكبرى للبيهقي/كتاب الحدود/حدیث: 17112]

ابوزناد فقہائے اہل مدینہ سے روایت کرتے ہیں کہ ”کوئی کسی کو حد نہ لگائے مگر سلطان، اور اگر آدمی کی اپنی لونڈی یا غلام زنا کر لے تو وہ اسے حد لگائے۔“ [السنن الكبرى للبيهقي/كتاب الحدود/حدیث: 17113]

اور جس نے یہ کہا کہ امام کو ان (اہل کتاب) کے درمیان فیصلہ کرنے میں اختیار ہے، اور اگر وہ فیصلہ کرے تو اسی کے مطابق فیصلہ کرے جو اللہ عزوجل نے نازل فرمایا ہے، اور جس نے یہ کہا کہ اس پر ان کے درمیان فیصلہ کرنا لازم ہے اور اسے (فیصلہ نہ کرنے کا) اختیار نہیں۔
امام شافعی رحمہ اللہ نے فرمایا: ”اللہ عزوجل نے اپنے نبی صلی اللہ علیہ وسلم سے اہل کتاب کے بارے میں فرمایا: ﴿فَإِنْ جَاءُوكَ فَاحْكُمْ بَيْنَهُمْ أَوْ أَعْرِضْ عَنْهُمْ﴾ ’پس اگر وہ آپ کے پاس آئیں تو آپ ان کے درمیان فیصلہ کر دیں یا ان سے منہ پھیر لیں۔‘ [سورة المائدة: 42] تو اس آیت میں، واللہ اعلم، اس بات کا بیان ہے کہ اللہ تعالیٰ نے اپنے نبی صلی اللہ علیہ وسلم کو یہ اختیار دیا کہ آپ ان کے درمیان فیصلہ کریں یا ان سے اعراض فرمائیں، اور آپ صلی اللہ علیہ وسلم پر یہ لازم کیا کہ اگر آپ فیصلہ کریں تو ان کے درمیان انصاف کے ساتھ فیصلہ کریں۔“
انہوں نے (مزید) فرمایا: ”اور میں نے اہل علم میں سے ایک ایسے شخص کو، جن (کے علم) سے میں مطمئن ہوں، اللہ عزوجل کے فرمان ﴿وَأَنِ احْكُمْ بَيْنَهُمْ بِمَا أَنْزَلَ اللهُ﴾ ’اور یہ کہ آپ ان کے درمیان اسی کے مطابق فیصلہ کریں جو اللہ نے نازل کیا ہے۔‘ [سورة المائدة: 49] کے بارے میں یہ کہتے سنا: (اس کا مطلب ہے کہ) اگر آپ فیصلہ کریں (تو اس کے مطابق کریں)، یہ لازمی حکم نہیں کہ آپ (ضرور) فیصلہ کریں۔“ [السنن الكبرى للبيهقي/كتاب الحدود/حدیث: Q17114]