سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بے شک جب اللہ تعالیٰ نے بیماری کو تخلیق کیا، تو اس نے دواء کو بھی تخلیق کیا، تو تم لوگ دواء استعمال کرو“۔
یہ روایت امام أحمد نے نقل کی ہے۔ اور اس کے رجال صحیح کے رجال ہیں صرف عمران عمی کا معاملہ مختلف ہے ابن حبان اور دیگر حضرات نے اسے ثقہ قرار دیا ہے یحیی بن معین اور دیگر حضرات نے اسے ضعیف کہا: ہے۔ [مجمع الزاوئد ومنبع الفوائد/كتاب الطب/حدیث: 8275]

سیدنا عبداللہ بن مسعود رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا: ”اللہ تعالیٰ نے جو بھی بیماری نازل کی ہے اس کی دواء بھی نازل کی ہے جو شخص اس کو جان لیتا ہے، وہ جان لیتا ہے، اور جو شخص نا واقف رہتا ہے وہ ناواقف رہتا ہے“۔
(علامہ ہیثمی فرماتے ہیں:) میں یہ کہتا ہوں: یہ روایت امام ابن ماجہ نے نقل کی ہے۔ تاہم انہوں نے یہ الفاظ نقل نہیں کیے ہیں ”جو شخص اس کو جان لیتا ہے وہ جان لیتا ہے، اور جو ناواقف رہتا ہے وہ ناواقف رہتا ہے“۔
یہ روایت امام أحمد اور امام طبرانی نے نقل کی ہے۔ امام طبرانی کے رجال ثقہ ہیں۔ [مجمع الزاوئد ومنبع الفوائد/كتاب الطب/حدیث: 8276]

ایک انصاری شخص بیان کرتے ہیں: نبی اکرم صلی اللہ علیہ وسلم ایک شخص کی عیادت کے لئے گئے جسے زخم لاحق تھا۔ نبی اکرم صلی اللہ علیہ وسلم نے فرمایا: اس کے لئے بنو فلاں کے طبیب کو بلا کے لاؤ راوی کہتے ہیں: لوگوں نے اس کو بلایا وہ شخص آیا لوگوں نے عرض کی: یا رسول اللہ! کیا دواء کسی کام آتی ہے۔ نبی اکرم صلی اللہ علیہ وسلم نے ارشاد فرمایا: سبحان اللہ! اللہ تعالیٰ نے زمین میں جو بھی بیماری نازل کی ہے اس کے لئے شفاء بھی بنائی ہے۔
یہ روایت امام أحمد نے نقل کی ہے۔ اور اس کے رجال صحیح کے رجال ہیں۔ [مجمع الزاوئد ومنبع الفوائد/كتاب الطب/حدیث: 8277]

سیدنا ابوسعید خدری رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا: ”اللہ تعالیٰ نے جو بھی بیماری نازل کی ہے اس کے لئے دواء بھی نازل کی ہے جو شخص اس کو جان لیتا ہے وہ جان لیتا ہے، اور جو شخص اس سے ناواقف رہتا ہے وہ ناواقف رہتا ہے، البتہ سام کا معاملہ مختلف ہے لوگوں نے عرض کی: اے اللہ کے نبی! سام سے مراد کیا ہے۔ نبی اکرم صلی اللہ علیہ وسلم نے ارشاد فرمایا: موت۔
یہ روایت امام بزار نے نقل کی ہے۔ اور امام طبرانی نے معجم صغیر اور معجم اوسط میں نقل کی ہے۔ اس کی سند میں ایک راوی شبیب بن شیبہ ہے ذکریا ساجی کہتے ہیں: یہ صدوق ہے، اور وہم کا شکار ہو جاتا ہے جمہور نے اسے ضعیف قرار دیا ہے اس روایت کے بقیہ رجال صیح کے رجال ہیں۔ [مجمع الزاوئد ومنبع الفوائد/كتاب الطب/حدیث: 8278]

سیدنا ابوموسی اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ نے جو بھی بیماری نازل کی ہے اس کی دواء بھی نازل کی ہے تم پر لازم ہے کہ گائے کا دودھ استعمال کرو کیونکہ گائے ہر قسم کے درخت (کے پتے وغیرہ) کھا لیتی ہے“۔
(علامہ ہیثمی فرماتے ہیں:) میں یہ کہتا ہوں امام ابن ماجہ نے اس روایت میں سے صرف یہ حصہ نقل کیا ہے: ”اللہ تعالیٰ نے جو بھی بیماری نازل کی ہے اس کی شفاء بھی نازل کی ہے“۔
یہ روایت امام بزار نے نقل کی ہے۔ اس کی سند میں ایک راوی محمد بن جابر بن سیار ہے، اور وہ صدوق ہے ایک سے زیادہ افراد نے اسے ضعیف قرار دیا ہے اس روایت کے بقیہ رجال ثقہ ہیں۔ [مجمع الزاوئد ومنبع الفوائد/كتاب الطب/حدیث: 8279]

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”اے لوگو! دواء استعمال کرو کیونکہ اللہ تعالیٰ نے جو بھی بیماری تخلیق کی ہے اس کے لئے شفاء بھی پیدا کی ہے، البتہ سام کا معاملہ مختلف ہے، اور سام سے مراد موت ہے“۔
یہ روایت امام طبرانی نے نقل کی ہے۔ اس کی سند میں ایک راوی طلحہ بن عمرو حضرمی ہے، اور وہ متروک ہے۔ [مجمع الزاوئد ومنبع الفوائد/كتاب الطب/حدیث: 8280]

سیدنا عبداللہ بن عباس رضی اللہ عنہما بیان کرتے ہیں: ایک شخص نے عرض کی: یا رسول اللہ! کیا دواء تقدیر کے لکھے ہوئے کے حوالے سے فائدہ دیتی ہے؟ نبی اکرم صلی اللہ علیہ وسلم نے فرمایا: دواء بھی تقدیر کا حصہ ہے، اور یہ اللہ کے اذن کے تحت شفاء دیتی ہے“۔
یہ روایت امام طبرانی نے نقل کی ہے۔ اس کی سند میں ایک راوی صالح بن بشیر مری ہے، اور وہ ضعیف ہے۔ [مجمع الزاوئد ومنبع الفوائد/كتاب الطب/حدیث: 8281]

سیدنا حکیم بن حزام رضی اللہ عنہ کے بارے میں یہ بات منقول ہے کہ انہوں نے عرض کی: یا رسول اللہ! جو دم کیا جاتا ہے یا دوائیں استعال کی جاتیں ہیں، تو کیا یہ اللہ تعالی کی مقرر کردہ تقدیر میں سے کسی چیز کو لوٹا دیتی ہیں؟ نبی اکرم صلی اللہ علیہ وسلم نے ارشاد فرمایا: یہی اللہ تعالی کی مقرر کردہ تقدیر ہیں۔
یہ روایت امام طبرانی نے نقل کی ہے۔ اس کی سند میں ایک راوی صالح بن ابواخضر ہے، اور وہ ضعیف ہے اس کی حدیث کا اعتبار کیا جائے گا۔ [مجمع الزاوئد ومنبع الفوائد/كتاب الطب/حدیث: 8282]

حارث بن سعد اپنے والد کا یہ بیان نقل کرتے ہیں: میں نے عرض کی: یا رسول اللہ! یہ جو دم کیا جاتا ہے یا جو دوائیں استعمال کی جاتیں، تو کیا یہ اللہ تعالیٰ کی تقدیر میں سے کسی چیز کو لوٹا دیتی ہیں؟ نبی اکرم صلی اللہ علیہ وسلم نے فرمایا: یہ بھی اللہ تعالیٰ کی مقرر کردہ تقدیر ہیں۔
یہ روایت امام طبرانی نے نقل کی ہے۔ اور حارث نامی راوی سے میں واقف نہیں ہوں۔ اس روایت کے بقیہ رجال صحیح کے رجال ہیں صرف ابوخزامہ کا معاملہ مختلف ہے۔ [مجمع الزاوئد ومنبع الفوائد/كتاب الطب/حدیث: 8283]

سیدنا صفوان بن عسال رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ نے مغرب کی سمت میں ایک دروازہ کھولا ہے جس کی (چوڑائی) ستر برس کی مسافت جتنی ہے یہ توبہ کے لئے مخصوص ہے، اور اللہ تعالیٰ اسے اس وقت تک بند نہیں کرے گا، جب تک سورج مغرب کی طرف سے طلوع نہیں ہوتا، جو شخص علم کے حصول کے لئے لکھتا ہے، تو فرشتے اپنے پر اس کے لئے بچھا دیتے ہیں، وہ اس عمل کے لئے ایسا کرتے ہیں، اس موقع پر عربوں نے عرض کی: یا رسول اللہ! کیا اللہ تعالیٰ نے بندے کو کوئی ایسی عادت عطا نہیں کی ہے، جو زیادہ بہتر ہو؟ نبی اکرم صلی اللہ علیہ وسلم نے فرمایا: وہ اچھے اخلاق ہیں، پھر لوگوں نے آپ کی خدمت میں عرض کی: یا رسول اللہ! کیا ہم دوا استعمال کریں؟ نبی اکرم صلی اللہ علیہ وسلم نے فرمایا: کیا تم لوگ یہ بات جانتے ہو کہ جس ذات نے بیماری کو نازل کیا ہے، اس نے دوا کو بھی نازل کیا ہے، اس نے جو بھی بیماری نازل کی ہے، اس کے لئے دوا بھی نازل کی ہے، البتہ ایک بیماری کا معاملہ مختلف ہے، لوگوں نے عرض کی: یا رسول اللہ! وہ کون سی ہے؟ نبی اکرم صلی اللہ علیہ وسلم نے فرمایا: بڑھاپا“۔ (علامہ بیٹی فرماتے ہیں:) میں یہ کہتا ہوں:
یہ روایت امام ترمذی نے اور دیگر حضرات نے اختصار کے ساتھ نقل کی ہے جس میں دوا استعمال کرنے اور اچھے اخلاق کا ذکر ہے۔
یہ روایت امام طبرانی نے نقل کی ہے۔ اس کی سند میں ایک راوی اسحاق بن عبداللہ بن ابوفروہ ہے، اور وہ متروک ہے۔ [مجمع الزاوئد ومنبع الفوائد/كتاب الطب/حدیث: 8284]