سیدنا عصمہ بن قیس سلمی رضی اللہ عنہ، جو نبی اکرم صلی اللہ علیہ وسلم کے صحابی ہیں، وہ نبی اکرم صلی اللہ علیہ وسلم کے بارے میں یہ بات نقل کرتے ہیں: آپ مشرق کے فتنے سے پناہ مانگا کرتے تھے، آپ صلی اللہ علیہ وسلم کی خدمت میں عرض کی گئی: مغرب کے فتنے کا کیا عالم ہو گا؟ نبی اکرم صلی اللہ علیہ وسلم نے فرمایا: وہ زیادہ بڑا ہو گا، زیادہ بڑا ہو گا۔
یہ روایت امام طبرانی نے نقل کی ہے۔ [مجمع الزاوئد ومنبع الفوائد/كتاب الفتن - أعاذنا الله منها/حدیث: 11957]

اُن کی نقل کردہ ایک روایت میں یہ الفاظ ہیں: نبی اکرم صلی اللہ علیہ وسلم نماز کے دوران مغرب کے فتنے سے پناہ مانگتے تھے۔ اس روایت کے رجال ثقہ ہیں۔ [مجمع الزاوئد ومنبع الفوائد/كتاب الفتن - أعاذنا الله منها/حدیث: 11958]

قاسم بیان کرتے ہیں: سیدنا عبداللہ رضی اللہ عنہ نے فرمایا: ”تم میں سے کوئی شخص یہ نہ کہے: اے اللہ! میں فتنے سے تیری پناہ مانگتا ہوں، کیونکہ تم میں سے ہر ایک شخص کو فتنے کا تو سامنا کرنا ہی ہو گا، جس شخص نے پناہ مانگنی ہو، وہ فتنے کی گمراہیوں سے پناہ مانگے، کیونکہ اللہ تعالیٰ نے یہ ارشاد فرمایا ہے: ”بے شک تمہارے اموال اور تمہاری اولاد فتنہ ہیں۔۔۔۔۔۔۔“۔
یہ روایت امام طبرانی نے نقل کی ہے، اس روایت کی سند منقطع ہے، لیکن اس کی سند میں ایک راوی مسعودی ہے، جو اختلاط کا شکار ہو گیا تھا۔ [مجمع الزاوئد ومنبع الفوائد/كتاب الفتن - أعاذنا الله منها/حدیث: 11959]

سیدنا ابوہریرہ رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا: ”سترویں سال اور بچوں کی حکومت سے اللہ کی پناہ مانگو!“۔ آپ صلی اللہ علیہ وسلم نے یہ بھی ارشاد فرمایا ہے: ”دنیا اُس وقت تک ختم نہیں ہو گی، جب تک یہ احمق ابن احمق کو نہیں ملے گی۔“
یہ روایت امام أحمد اور امام بزار نے نقل کی ہے، امام بزار کے رجال صحیح کے رجال ہیں، البتہ کامل بن العلاء کا معاملہ مختلف ہے اور وہ ثقہ ہے۔ [مجمع الزاوئد ومنبع الفوائد/كتاب الفتن - أعاذنا الله منها/حدیث: 11960]

سیدنا عقبہ بن عامر رضی اللہ عنہ بیان کرتے ہیں: نبی اکرم صلی اللہ علیہ وسلم یہ دعا کیا کرتے تھے: ”اے اللہ! میں برے دن سے اور بری رات سے اور بری گھڑی سے اور برائی والے فرد سے، اور اقامت کے مقام میں برے پڑوسی سے تیری پناہ مانگتا ہوں۔“
یہ روایت امام طبرانی نے نقل کی ہے اور اس کے رجال ثقہ ہیں۔ [مجمع الزاوئد ومنبع الفوائد/كتاب الفتن - أعاذنا الله منها/حدیث: 11961]

سیدنا ابودرداء رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا: ”ہر چیز کم ہو جاتی ہے، صرف برائی کا معاملہ مختلف ہے، کیونکہ اس میں اضافہ ہوتا ہے۔“
یہ روایت امام أحمد نے اور امام طبرانی نے نقل کی ہے، اس کی سند میں ایک راوی ابوبکر بن ابومریم ہے اور وہ ضعیف ہے اور ایک راوی ایسا ہے، جس کا نام بیان نہیں کیا گیا ہے۔ [مجمع الزاوئد ومنبع الفوائد/كتاب الفتن - أعاذنا الله منها/حدیث: 11962]

سیدنا عبداللہ بن عباس رضی اللہ عنہما روایت کرتے ہیں: نبی اکرم صلی اللہ علیہ وسلم نے ارشاد فرمایا: ”لوگوں کے ساتھ لڑنے جھگڑنے سے بچو! کیونکہ یہ چیز عزت کو دفن کر دیتی ہے اور پوشیدہ معاملات کو ظاہر کر دیتی ہے۔“
یہ روایت امام طبرانی نے معجم صغیر میں نقل کی ہے اور اس کے رجال ثقہ ہیں، البتہ امام طبرانی کے استاد محمد بن حسن بن ہدیم کا معاملہ مختلف ہے اور میں ان سے واقف نہیں ہوں۔ [مجمع الزاوئد ومنبع الفوائد/كتاب الفتن - أعاذنا الله منها/حدیث: 11963]

سیدنا جابر بن عتیک رضی اللہ عنہ بیان کرتے ہیں: سیدنا عبداللہ بن عمر رضی اللہ عنہما ہمارے پاس بنو معاویہ کے علاقے میں آئے، راوی کہتے ہیں: یہ انصار کی بستیوں میں سے ایک بستی ہے، سیدنا عبداللہ بن عمر رضی اللہ عنہما نے دریافت کیا: کیا تم لوگ یہ بات جانتے ہو؟ کہ نبی اکرم صلی اللہ علیہ وسلم نے تمہاری اس مسجد میں کہاں نماز ادا کی تھی؟ میں نے جواب دیا: جی ہاں! پھر میں نے مسجد کے ایک گوشے کی طرف اشارہ کیا، انہوں نے دریافت کیا: کیا تم یہ بات جانتے ہو؟ کہ نبی اکرم صلی اللہ علیہ وسلم نے یہاں جو دعا مانگی تھی، اس میں وہ تین چیزیں کیا تھیں؟ میں نے جواب دیا: جی ہاں! انہوں نے فرمایا: تم مجھے ان کے بارے میں بتاؤ! میں نے بتایا: نبی اکرم صلی اللہ علیہ وسلم نے یہ دعا کی تھی کہ اللہ تعالیٰ مسلمانوں پر ان کے دشمن کو غلبہ عطا نہ کرے، اور انہیں قحط سالی کے ذریعے ہلاکت کا شکار نہ کرے، تو یہ دونوں چیزیں نبی اکرم صلی اللہ علیہ وسلم کو عطا کر دی گئیں، اور آپ صلی اللہ علیہ وسلم نے یہ دعا کی تھی کہ وہ لوگ ایک دوسرے کو نقصان نہ پہنچائیں، تو یہ چیز قبول نہیں ہوئی، سیدنا عبداللہ بن عمر رضی اللہ عنہما نے فرمایا: تم نے ٹھیک کہا: ہے، اور قیامت کے دن تک مسلسل (مسلمانوں کے درمیان باہمی طور پر) قتل و غارت گری ہوتی رہے گی۔
یہ روایت امام أحمد نے نقل کی ہے اور اس کے رجال ثقہ ہیں۔ [مجمع الزاوئد ومنبع الفوائد/كتاب الفتن - أعاذنا الله منها/حدیث: 11964]

سیدنا شداد بن اوس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بے شک اللہ تعالیٰ نے میرے لئے زمین کو لپیٹ دیا، تو میں نے اس کے مشرقی اور مغربی حصوں کو دیکھ لیا، اور زمین کا جتنا حصہ میرے لئے لپیٹا گیا تھا، میری اُمت کی حکومت عنقریب وہاں تک پہنچ جائے گی، مجھے سفید اور سرخ دو قسم کے خزانے عطا کیے گئے، میں نے اپنے پروردگار سے یہ دعا کی: وہ میری امت کو عمومی قحط سالی کے ذریعے ہلاکت کا شکار نہ کرے، اور وہ ان لوگوں پر ان کے دشمن کو یوں مسلط نہ کرے کہ وہ لوگ عمومی طور پر ہلاکت کا شکار ہو جائیں، اور وہ انہیں باہمی اختلاف کا شکار نہ کرے کہ وہ ایک دوسرے کو نقصان پہنچائیں، تو پروردگار نے فرمایا: اے محمد! جب میں کوئی فیصلہ دے دوں، تو اُسے ختم نہیں کیا جا سکتا، میں نے تمہیں تمہاری امت کے حوالے سے یہ چیز دیدی ہے کہ میں عمومی قحط کے ذریعے انہیں ہلاک نہیں کروں گا اور میں ان کے دشمن کو ان پر مسلط نہیں کروں گا کہ وہ دشمن انہیں عمومی طور پر ہلاک کر دے، البتہ وہ لوگ ایک دوسرے کو ہلاک کریں گے اور ایک دوسرے کو قتل کریں گے اور ایک دوسرے کو قیدی بنائیں گے۔“ راوی بیان کرتے ہیں: نبی اکرم صلی اللہ علیہ وسلم نے ارشاد فرمایا: ”مجھے اپنی امت کے بارے میں صرف گمراہ کرنے والے حکمرانوں کے بارے میں اندیشہ ہے، جب میری امت میں تلوار رکھ دی جائے گی، تو وہ قیامت کے دن تک اُن سے نہیں اُٹھائی جائے گی۔“
یہ روایت امام أحمد اور امام بزار نے نقل کی ہے امام أحمد کے رجال صحیح کے رجال ہیں۔ [مجمع الزاوئد ومنبع الفوائد/كتاب الفتن - أعاذنا الله منها/حدیث: 11965]

سیدنا ابوبصرہ غفاری رضی اللہ عنہ، جو نبی اکرم صلی اللہ علیہ وسلم کے صحابی ہیں، وہ بیان کرتے ہیں: (نبی اکرم صلی اللہ علیہ وسلم نے فرمایا:) ”میں نے اپنے پروردگار سے چار چیزیں مانگی تھیں، اس نے تین چیزیں مجھے عطا کر دیں اور ایک عطا نہیں کی، میں نے اللہ تعالیٰ سے یہ چیز مانگی کہ میری امت گمراہی پر اکٹھی نہ ہو، تو اس نے مجھے یہ چیز عطا کر دی، میں نے اللہ تعالیٰ سے یہ چیز مانگی کہ وہ مجھے (یعنی میری امت کو) قحط سالی کے ذریعے ہلاکت کا شکار نہ کرے، جس طرح اس نے ان سے پہلے کی امتوں کو ہلاک کیا تھا، تو اس نے مجھے یہ چیز عطا کر دی، میں نے اللہ تعالیٰ سے یہ چیز مانگی کہ وہ ان لوگوں پر (یعنی میری امت پر) ان کے دشمن کو غلبہ عطا نہ کرے، تو اس نے مجھے یہ چیز عطا کر دی، اور میں نے اللہ تعالیٰ سے یہ چیز مانگی کہ وہ انہیں گروہوں میں یوں تقسیم نہ کرے کہ وہ ایک دوسرے کو نقصان پہنچائیں، تو اس نے مجھے یہ چیز عطا نہیں کی۔“
یہ روایت امام أحمد اور امام طبرانی نے نقل کی ہے، اس کی سند میں ایک راوی ایسا ہے، جس کا نام بیان نہیں کیا گیا ہے۔ [مجمع الزاوئد ومنبع الفوائد/كتاب الفتن - أعاذنا الله منها/حدیث: 11966]