سیدنا ابو سعید خدری رضی اللہ عنہ سے روایت ہے کہ وہ بیان کرتے ہیں کہ میں رسول اللہ صلی اللہ علیہ وسلم کی خدمتِ اقدس میں اس وقت حاضر ہوا جب آپ صلی اللہ علیہ وسلم بئرِ بضاعہ کے پانی سے وضو فرما رہے تھے، میں نے عرض کی: اے اللہ کے رسول! کیا آپ اس کنویں سے وضو فرما رہے ہیں حالانکہ اس میں ہر طرح کی بدبودار اور غلیظ اشیاء بھی (بہہ کر) گر جاتی ہیں؟ تو آپ صلی اللہ علیہ وسلم نے ارشاد فرمایا: ”یقیناً پانی کو کوئی بھی چیز ناپاک نہیں کرتی۔“ [مسند أبي يعلى الموصلي/من مسند أبي سعيد الخدري/حدیث: 1304]

سیدنا ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے صور پھونکنے والے فرشتے کا تذکرہ کرتے ہوئے ارشاد فرمایا: ”اُن کے دائیں جانب جبرئیل اور اُن کے بائیں جانب میکائیل ہیں۔“ [مسند أبي يعلى الموصلي/من مسند أبي سعيد الخدري/حدیث: 1305]

معبد بن سیرین رحمہ اللہ بیان کرتے ہیں کہ ہم نے سیدنا ابوسعید خدری رضی اللہ عنہ سے دریافت کیا: ”کیا آپ نے عزل (انزال کے وقت کنارہ کشی اختیار کرنے) کے متعلق رسول اللہ صلی اللہ علیہ وسلم سے کچھ سنا ہے؟“ انہوں نے کہا کہ ہم نے رسول اللہ صلی اللہ علیہ وسلم سے عزل کے بارے میں سوال کیا تو آپ صلی اللہ علیہ وسلم نے دریافت فرمایا: ”عزل کیا ہے؟“ ہم نے عرض کیا: ”ایک شخص کی ایسی بیوی ہو جو بچے کو دودھ پلا رہی ہو، وہ اس سے جماع کرے لیکن حمل ٹھہرنا ناپسند کرتے ہوئے عزل کر لے، اسی طرح اس کے پاس کوئی لونڈی ہو جس سے وہ صحبت کرے مگر حمل کے ڈر سے عزل کر لے (تو اس کا کیا حکم ہے؟)“ رسول اللہ صلی اللہ علیہ وسلم نے ارشاد فرمایا: ”اگر تم ایسا نہ کرو تو تم پر کوئی حرج نہیں ہے، کیونکہ یہ تو محض تقدیر کا فیصلہ ہے (یعنی جو بچہ پیدا ہونا مقدر ہے وہ یقیناً پیدا ہو کر رہے گا)۔“ [مسند أبي يعلى الموصلي/من مسند أبي سعيد الخدري/حدیث: 1306]

ابو العلانیہ رحمہ اللہ بیان کرتے ہیں کہ ہم نے سیدنا ابو سعید خدری رضی اللہ عنہ سے مٹی کے مٹکے میں تیار کردہ نبیذ کے متعلق دریافت کیا تو انہوں نے فرمایا کہ ”رسول اللہ صلی اللہ علیہ وسلم نے مٹی کے مٹکے میں نبیذ بنانے سے منع فرمایا ہے“، راوی کہتے ہیں کہ ہم نے عرض کیا: پھر خشک کدو کے برتن (دبا) کے بارے میں کیا حکم ہے؟ تو انہوں نے جواب دیا: ”وہ تو اس سے بھی زیادہ برا ہے“۔ [مسند أبي يعلى الموصلي/من مسند أبي سعيد الخدري/حدیث: 1307]

سیدنا جابر رضی اللہ عنہ، سیدنا ابوسعید رضی اللہ عنہ سے روایت کرتے ہیں کہ انہوں نے فرمایا: ”میں رسول اللہ صلی اللہ علیہ وسلم کی بارگاہ میں حاضر ہوا تو آپ صلی اللہ علیہ وسلم ایک چٹائی پر نماز ادا فرما رہے تھے اور اسی پر سجدہ کر رہے تھے۔“ [مسند أبي يعلى الموصلي/من مسند أبي سعيد الخدري/حدیث: 1308]

سیدنا ابو سعید رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”شدید گرمی کے موسم میں ظہر کی نماز ٹھنڈے وقت میں (یعنی تپش کم ہونے پر) ادا کیا کرو، کیونکہ گرمی کی یہ شدت جہنم کے سانس کے پھیلاؤ کی وجہ سے ہے۔“ [مسند أبي يعلى الموصلي/من مسند أبي سعيد الخدري/حدیث: 1309]

ابو سعید رحمہ اللہ سے روایت ہے کہ انہوں نے بیان کیا: ”میں سیدنا عبد اللہ بن عمر رضی اللہ عنہما کے ساتھ 'بلاط' (مدینہ منورہ کی ایک جگہ) میں چل رہا تھا کہ ان کا گزر ایک ایسے شخص کے پاس سے ہوا جو (ازراہِ تکبر) اپنا تہبند زمین پر گھسیٹ رہا تھا، تو سیدنا ابن عمر رضی اللہ عنہما نے اس سے فرمایا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ ”جس شخص نے غرور و تکبر کی بنیاد پر اپنا لباس زمین پر گھسیٹا تو اللہ تعالیٰ قیامت کے دن اس کی طرف نظرِ (رحمت) نہیں فرمائے گا“، ابو سعید رحمہ اللہ کہتے ہیں کہ میں نے عرض کی کہ میں نے سیدنا ابو سعید خدری رضی اللہ عنہ کو بھی رسول اللہ صلی اللہ علیہ وسلم سے یہی حدیث بیان کرتے ہوئے سنا ہے، تو سیدنا ابن عمر رضی اللہ عنہما نے فرمایا: اور میں نے بھی اسے خود رسول اللہ صلی اللہ علیہ وسلم سے سماعت کیا ہے۔“ [مسند أبي يعلى الموصلي/من مسند أبي سعيد الخدري/حدیث: 1310]

سیدنا ابوسعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”لوگوں میں چوری کے لحاظ سے بدترین شخص وہ ہے جو اپنی نماز میں چوری کرتا ہے“، صحابہ کرام نے عرض کیا: اے اللہ کے رسول! وہ اپنی نماز سے چوری کیسے کرتا ہے؟ آپ صلی اللہ علیہ وسلم نے فرمایا: ”وہ اس کے رکوع اور سجدوں کو مکمل نہیں کرتا۔“ [مسند أبي يعلى الموصلي/من مسند أبي سعيد الخدري/حدیث: 1311]

سیدنا ابوسعید رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”اگر اللہ تعالیٰ میری امت سے دس برس تک بارش روک لے اور پھر اسے نازل فرمائے، تو میری امت کا ایک گروہ اس کی وجہ سے کفر کرنے لگے گا، وہ کہیں گے کہ: یہ ’مجدح‘ (نامی ستارے) کے طلوع و غروب کے اثر سے ہوا ہے“۔ [مسند أبي يعلى الموصلي/من مسند أبي سعيد الخدري/حدیث: 1312]

سیدنا ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جنت اور دوزخ نے باہم فخر (و مباحثہ) کیا، تو آگ نے کہا: اے میرے رب! مجھ میں سرکش جابر، بادشاہ، بڑے لوگ اور معززین داخل ہو رہے ہیں، جبکہ جنت نے عرض کی: اے میرے رب! مجھ میں فقراء، ناتواں اور مسکین لوگ داخل ہو رہے ہیں، تو اللہ تعالیٰ نے جہنم سے فرمایا: ”تو میرا عذاب ہے، میں تیرے ذریعے جسے چاہتا ہوں اسے عذاب دیتا ہوں“، اور جنت سے فرمایا: ”تو میری رحمت ہے جو ﴿وَسِعَتْ كُلَّ شَيْءٍ﴾ ہر چیز پر محیط ہے، اور تم دونوں میں سے ہر ایک کو بھرنا میرے ذمے ہے“، چنانچہ دوزخ کا حال یہ ہوگا کہ اس میں اس کے مستحقین کو ڈالا جائے گا اور وہ پکارتی رہے گی: ﴿هَلْ مِنْ مَزِيدٍ﴾ ”کیا کچھ اور بھی ہے؟“، یہاں تک کہ اللہ تبارک و تعالیٰ (اپنی شان کے مطابق) تجلی فرمائے گا تو وہ سمٹ کر اکٹھی ہو جائے گی اور کہے گی: ”میرے لیے کافی ہے، میرے لیے کافی ہے“، رہا جنت کا معاملہ، تو اس میں جتنا اللہ چاہے گا اتنی جگہ خالی بچ جائے گی، پھر اللہ تعالیٰ اس (خالی جگہ) کے لیے اپنی مشیت کے مطابق نئی مخلوق پیدا فرمائے گا (تاکہ وہ بھر جائے)۔“ [مسند أبي يعلى الموصلي/من مسند أبي سعيد الخدري/حدیث: 1313]