سیدنا قیس بن سعد رضی اللہ عنہ سے مروی ہے کہ رسول اللہ صلی اللہ علیہ وسلم نے ارشاد فرمایا: ”اگر ایمان ثریا (ستاروں) کے ساتھ معلق ہوتا تو اہلِ فارس میں سے کچھ لوگ اسے ضرور حاصل کر لیتے۔“ [مسند أبي يعلى الموصلي/مسند قيس بن سعد/حدیث: 1433]

سیدنا قیس بن سعد رضی اللہ عنہ سے روایت ہے کہ انہوں نے فرمایا: ”رسول اللہ صلی اللہ علیہ وسلم نے ہمیں زکوٰۃ (کے فرائض) نازل ہونے سے قبل صدقہ فطر ادا کرنے کا حکم دیا تھا، پھر جب زکوٰۃ (کی فرضیت) کا حکم نازل ہو گیا تو اس کے بعد آپ صلی اللہ علیہ وسلم نے ہمیں (صدقہ فطر کے متعلق) نہ تو کوئی الگ سے حکم دیا اور نہ ہی ہمیں اس سے منع فرمایا، اور ہم اسے (دستور کے مطابق) ادا کرتے رہے۔“ [مسند أبي يعلى الموصلي/مسند قيس بن سعد/حدیث: 1434]

سیدنا قیس بن سعد رضی اللہ عنہ سے روایت ہے کہ ”رسول اللہ صلی اللہ علیہ وسلم ہمارے پاس تشریف لائے تو ہم نے آپ صلی اللہ علیہ وسلم کے لیے غسل کا پانی رکھا، چنانچہ آپ صلی اللہ علیہ وسلم نے غسل فرمایا، پھر ہم آپ صلی اللہ علیہ وسلم کی خدمت میں ورس (ایک زرد بوٹی) سے رنگی ہوئی ایک بڑی چادر لائے جسے آپ صلی اللہ علیہ وسلم نے اوڑھ لیا، (وہ منظر ایسا تھا کہ) گویا میں اب بھی آپ صلی اللہ علیہ وسلم کے شکمِ مبارک کی سلوٹوں پر ورس کے اثرات دیکھ رہا ہوں۔“ [مسند أبي يعلى الموصلي/مسند قيس بن سعد/حدیث: 1435]

سیدنا قیس بن سعد بن عبادہ رضی اللہ عنہ سے روایت ہے، جبکہ وہ مصر کے امیر تھے، انہوں نے فرمایا کہ رسول اللہ صلی اللہ علیہ وسلم نے ارشاد فرمایا: ”جس نے مجھ پر دانستہ طور پر جھوٹ باندھا، وہ جہنم میں اپنا گھر بنا لے، یا (فرمایا) جہنم میں اپنا ٹھکانہ بنا لے۔ آگاہ رہو! جس نے شراب پی وہ قیامت کے دن پیاسا حاضر ہوگا، اور ہر نشہ آور چیز شراب ہے، اور تم ’غبیراء‘ (ایک خاص قسم کی شراب) سے بچو۔“ (راوی ابن ہبیرہ رحمہ اللہ کہتے ہیں کہ) میں نے سیدنا عبداللہ بن عمرو رضی اللہ عنہما کو بھی اسی طرح کی حدیث بیان کرتے ہوئے سنا، ان دونوں صحابہ کے بیان میں سوائے ’مضجع‘ (بستر) یا ’بیت‘ (گھر) کے الفاظ کے کوئی اختلاف نہیں تھا۔ [مسند أبي يعلى الموصلي/مسند قيس بن سعد/حدیث: 1436]

ابن ابی لیلیٰ رحمہ اللہ سے روایت ہے کہ سیدنا سہل بن حنیف رضی اللہ عنہ اور سیدنا قیس بن سعد رضی اللہ عنہ قادسیہ میں تشریف فرما تھے کہ ان کے پاس سے ایک جنازہ گزرا تو وہ دونوں (اس کے احترام میں) کھڑے ہو گئے، ان سے کہا گیا کہ یہ تو اسی زمین کے مقامی (غیر مسلم) باشندوں میں سے ہے، تو ان دونوں نے جواب دیا کہ ”نبی کریم صلی اللہ علیہ وسلم کے پاس سے ایک جنازہ گزرا تو آپ صلی اللہ علیہ وسلم کھڑے ہو گئے، آپ صلی اللہ علیہ وسلم سے عرض کیا گیا کہ وہ تو ایک کافر کا جنازہ ہے، تو آپ صلی اللہ علیہ وسلم نے ارشاد فرمایا: ”کیا وہ ایک (انسانی) جان نہیں ہے؟““۔ امام ابو یعلیٰ رحمہ اللہ فرماتے ہیں کہ میں نے اپنی کتاب میں اسے علی بن جعد کی روایت سے بحوالہ شعبہ پایا ہے لیکن اس پر سماع کی علامت درج نہیں تھی، اس لیے مجھے اس سند کی صحت میں شک ہوا۔ [مسند أبي يعلى الموصلي/مسند قيس بن سعد/حدیث: 1437]

سیدنا قیس بن سعد رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”اگر ایمان ثریا (ستاروں کی بلندی) سے معلق ہوتا تو اسے فارس کے بیٹوں (اہلِ فارس) میں سے کچھ مرد ضرور حاصل کر لیتے۔“ [مسند أبي يعلى الموصلي/مسند قيس بن سعد/حدیث: 1438]