سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: «الصَّلَاةُ نُورُ الْمُؤْمِنِ» ”نماز مومن کا نور ہے“۔ [مسند أبي يعلى الموصلي/مسند أنس بن مالك/حدیث: 3655]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”حسد نیکیوں کو اس طرح کھا جاتا ہے جس طرح آگ لکڑی کو کھا (کر ختم کر) دیتی ہے، اور صدقہ گناہ کو اس طرح مٹا دیتا ہے جیسے پانی آگ کو بجھا دیتا ہے، اور نماز مومن کا نور ہے، جبکہ روزہ جہنم کی آگ سے بچاؤ کے لیے ڈھال ہے۔“ [مسند أبي يعلى الموصلي/مسند أنس بن مالك/حدیث: 3656]

سیدنا انس بن مالک رضی اللہ عنہ سے روایت ہے کہ ”میں ایک سفر میں رسول اللہ صلی اللہ علیہ وسلم کے ہمراہ تھا، پس آپ صلی اللہ علیہ وسلم اپنی ضرورت (قضائے حاجت) کے لیے پیچھے رہ گئے، پھر جب تشریف لائے تو دریافت فرمایا: ”کیا پانی موجود ہے؟“، چنانچہ میں آپ صلی اللہ علیہ وسلم کی خدمت میں پانی کا ایک چھوٹا مشکیزہ لے کر حاضر ہوا جس سے آپ صلی اللہ علیہ وسلم نے وضو فرمایا اور پھر اپنے دونوں موزوں پر مسح کیا۔“ [مسند أبي يعلى الموصلي/مسند أنس بن مالك/حدیث: 3657]

سیدنا انس بن مالک رضی اللہ عنہ سے روایت ہے کہ انہوں نے بیان کیا: ”میں ایک سفر میں رسول اللہ صلی اللہ علیہ وسلم کے ہمراہ تھا، آپ صلی اللہ علیہ وسلم اپنی ضرورت (قضائے حاجت) کے لیے پیچھے رہ گئے، پھر جب آپ صلی اللہ علیہ وسلم واپس آ کر مجھ سے ملے تو دریافت فرمایا: «هَلْ مِنْ مَاءٍ؟» ”کیا پانی موجود ہے؟“، چنانچہ آپ صلی اللہ علیہ وسلم نے وضو فرمایا اور اپنے دونوں موزوں پر مسح کیا، اس کے بعد آپ صلی اللہ علیہ وسلم لشکر میں شامل ہو گئے اور ان کی امامت فرمائی۔“ [مسند أبي يعلى الموصلي/مسند أنس بن مالك/حدیث: 3658]

سیدنا انس بن مالک رضی اللہ عنہ سے روایت ہے کہ انہوں نے بیان فرمایا کہ ”رسول اللہ صلی اللہ علیہ وسلم جب قضاے حاجت کے لیے تشریف لے جاتے تو میں اور ایک دوسرا لڑکا پانی کا ایک چھوٹا برتن اور ایک چھوٹا نیزہ (عنزہ) لے کر آپ صلی اللہ علیہ وسلم کی خدمت میں حاضر ہوتے، پھر آپ صلی اللہ علیہ وسلم اس پانی سے استنجا فرماتے۔“ [مسند أبي يعلى الموصلي/مسند أنس بن مالك/حدیث: 3659]

سیدنا انس رضی اللہ عنہ سے روایت ہے کہ ”نبی کریم صلی اللہ علیہ وسلم نے اپنے صاحبزادے سیدنا ابراہیم رضی اللہ عنہ کی نمازِ جنازہ پڑھائی، تو آپ صلی اللہ علیہ وسلم نے ان پر چار تکبیریں کہیں۔“ [مسند أبي يعلى الموصلي/مسند أنس بن مالك/حدیث: 3660]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم کی بارگاہِ اقدس میں جب کبھی قصاص کا کوئی معاملہ پیش کیا گیا تو آپ صلی اللہ علیہ وسلم نے اس میں ہمیشہ معاف کر دینے ہی کا حکم ارشاد فرمایا“، راویِ حدیث عبد اللہ بن بکر رحمہ اللہ بیان کرتے ہیں کہ میں یہ روایت بلا کسی شک و شبہ کے سیدنا انس رضی اللہ عنہ ہی سے بیان کیا کرتا تھا، پھر جب لوگوں نے (تاکید کے لیے) پوچھا کہ کیا یہ واقعی سیدنا انس رضی اللہ عنہ ہی سے مروی ہے؟ تو میں نے کہا کہ میں اسے سیدنا انس رضی اللہ عنہ ہی سے مروی جانتا ہوں۔ [مسند أبي يعلى الموصلي/مسند أنس بن مالك/حدیث: 3661]

سیدنا انس بن مالک رضی اللہ عنہ بیان کرتے ہیں کہ ”میں نبی کریم صلی اللہ علیہ وسلم کے ہمراہ (باہر) نکلا کرتا تھا جبکہ میں ابھی لڑکا (کم عمر) تھا، اور میرے پاس پانی کا ایک برتن اور ایک چھوٹا نیزہ (عنزہ) ہوتا تھا، پس آپ صلی اللہ علیہ وسلم قضائے حاجت فرماتے اور پھر وضو کیا کرتے تھے۔“ [مسند أبي يعلى الموصلي/مسند أنس بن مالك/حدیث: 3662]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم قضائے حاجت کے لیے تشریف لے جاتے تو میں آپ صلی اللہ علیہ وسلم کی خدمت میں پانی لاتا اور آپ صلی اللہ علیہ وسلم اس سے استنجا (طہارت) فرماتے تھے۔“ [مسند أبي يعلى الموصلي/مسند أنس بن مالك/حدیث: 3663]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم جب قضاۓ حاجت کے لیے تشریف لے جاتے تو (آبادی سے) اس قدر دور چلے جاتے کہ آپ صلی اللہ علیہ وسلم دکھائی نہ دیتے تھے۔“ [مسند أبي يعلى الموصلي/مسند أنس بن مالك/حدیث: 3664]