سیدنا عبد اللہ رضی اللہ عنہما سے روایت ہے کہ ”رسول اللہ صلی اللہ علیہ وسلم صدقہ فطر کے طور پر ایک صاع کھجور یا ایک صاع جو نکالا کرتے تھے“ اور سیدنا عبد اللہ رضی اللہ عنہما فرمایا کرتے تھے کہ ”بعد ازاں لوگوں نے اس کے مساوی گندم کے دو مد مقرر کر لیے تھے“۔ [مسند أبي يعلى الموصلي/مسند عبد الله بن عمر/حدیث: 5834]

سیدنا عبداللہ رضی اللہ عنہ سے روایت ہے کہ رسول اللہ صلی اللہ علیہ وسلم نے سونے کی ایک انگوٹھی بنوائی اور جب آپ صلی اللہ علیہ وسلم اسے اپنے دائیں ہاتھ میں پہنتے تو اس کا نگینہ اپنی ہتھیلی کی جانب (اندر کی طرف) رکھتے تھے، چنانچہ (آپ صلی اللہ علیہ وسلم کی دیکھا دیکھی) لوگوں نے بھی سونے کی انگوٹھیاں بنوا لیں، پھر ایک روز رسول اللہ صلی اللہ علیہ وسلم منبر پر تشریف فرما ہوئے، اسے اپنی انگلی سے نکالا اور فرمایا: ”میں یہ انگوٹھی پہنتا تھا اور اس کا نگینہ اپنی ہتھیلی کی جانب رکھتا تھا۔“ پھر آپ صلی اللہ علیہ وسلم نے اسے پھینک دیا اور فرمایا: ”اللہ کی قسم! میں اسے اب کبھی نہیں پہنوں گا۔“ غرض رسول اللہ صلی اللہ علیہ وسلم نے وہ انگوٹھی پھینک دی تو لوگوں نے بھی اپنی انگوٹھیاں پھینک دیں۔ [مسند أبي يعلى الموصلي/مسند عبد الله بن عمر/حدیث: 5835]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”جس شخص نے کتا پالا، سوائے شکاری کتے یا مویشیوں کی حفاظت کرنے والے کتے کے، تو اس کے اجر میں سے ہر روز دو قیراط کی کمی ہو جاتی ہے۔“ ان سے عرض کیا گیا کہ سیدنا ابوہریرہ رضی اللہ عنہ تو اس میں ”کھیتی باڑی کی حفاظت کرنے والے کتے“ کا اضافہ بھی کرتے ہیں؟ اس پر انہوں نے فرمایا: ”بلاشبہ سیدنا ابوہریرہ رضی اللہ عنہ کاشتکاری کرنے والے آدمی ہیں۔“ [مسند أبي يعلى الموصلي/مسند عبد الله بن عمر/حدیث: 5836]

سیدنا عبداللہ بن عمر رضی اللہ عنہما سے روایت ہے کہ نبی کریم صلی اللہ علیہ وسلم نے ”بنو نضیر کے کھجور کے باغات کو نذرِ آتش کر دیا تھا“، اور اسی واقعے کے متعلق سیدنا حسان بن ثابت رضی اللہ عنہ نے فرمایا کہ ”بنو لؤی (قریش) کے سرداروں کے لیے یہ بات نہایت ہی سہل اور معمولی ثابت ہوئی کہ مقامِ بویرہ میں آگ کے شعلے بلند ہو کر چاروں طرف پھیل رہے تھے۔“ [مسند أبي يعلى الموصلي/مسند عبد الله بن عمر/حدیث: 5837]

سیدنا عبد اللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”تمہاری میعادِ عمل گزشتہ امتوں کی میعاد کے مقابلے میں صرف اتنی ہے جتنا عصر کی نماز سے لے کر غروبِ آفتاب تک کا وقت ہوتا ہے، اور تمہاری اور یہود و نصاریٰ کی مثال اس شخص کی سی ہے جس نے کچھ مزدوروں کو کام پر لگایا اور کہا کہ کون ہے جو نصف دن تک ایک ایک قیراط کے عوض میرے لیے کام کرے؟ تو یہودیوں نے نصف دن تک ایک ایک قیراط پر کام کیا۔ پھر اس نے کہا کہ کون ہے جو نصف دن سے لے کر نمازِ عصر تک ایک ایک قیراط کے عوض کام کرے؟ تو نصاریٰ نے کام کیا۔ پھر اس نے کہا کہ کون ہے جو عصر کی نماز سے لے کر سورج غروب ہونے تک دو دو قیراط کے عوض کام کرے؟ خبردار! تم ہی وہ لوگ ہو جو عصر کی نماز سے لے کر مغرب تک دو دو قیراط پر کام کر رہے ہو، آگاہ رہو کہ تمہارے لیے دوگنا اجر ہے۔ اس پر یہود و نصاریٰ غصے میں آ گئے اور کہنے لگے کہ ہم نے کام زیادہ کیا اور ہمیں عطا کم ملی؟ اس مالک نے پوچھا کہ کیا میں نے تمہارے حق میں کوئی کمی کر کے تم پر کچھ ظلم کیا ہے؟ انہوں نے عرض کیا کہ نہیں، تو اس نے فرمایا کہ پھر یہ میرا فضل ہے، میں جسے چاہتا ہوں عطا کرتا ہوں۔“ [مسند أبي يعلى الموصلي/مسند عبد الله بن عمر/حدیث: 5838]

سیدنا عبداللہ رضی اللہ عنہ سے روایت ہے کہ ”رسول اللہ صلی اللہ علیہ وسلم نے گھوڑوں کے درمیان دوڑ کا مقابلہ منعقد کروایا، چنانچہ آپ صلی اللہ علیہ وسلم مقامِ حفیاء سے ان گھوڑوں کو روانہ فرماتے تھے جنہیں (مقابلے کی غرض سے) دبلا اور چست کیا گیا ہوتا تھا اور ان کی آخری حد ثنیۃ الوداع تھی، اسی طرح آپ صلی اللہ علیہ وسلم نے ان گھوڑوں کے درمیان بھی دوڑ کا مقابلہ کروایا جنہیں دبلا نہیں کیا گیا تھا اور ان کی مسافت ثنیۃ الوداع سے لے کر بنو زریق کی مسجد تک تھی، اور (راویِ حدیث رحمہ اللہ بیان کرتے ہیں کہ) مجھے یہ بتایا گیا کہ سیدنا عبداللہ رضی اللہ عنہ خود بھی ان دوڑ کے مقابلوں میں شریک ہوا کرتے تھے۔“ [مسند أبي يعلى الموصلي/مسند عبد الله بن عمر/حدیث: 5839]

سیدنا عبداللہ رضی اللہ عنہ سے روایت ہے کہ سیدنا عمر بن خطاب رضی اللہ عنہ نے ایک گھوڑا اللہ کی راہ میں وقف کیا، پھر رسول اللہ صلی اللہ علیہ وسلم نے وہ گھوڑا ایک شخص کو سواری کے لیے عطا فرما دیا، بعد ازاں سیدنا عمر رضی اللہ عنہ نے اسے فروخت ہوتے ہوئے پایا تو انہوں نے رسول اللہ صلی اللہ علیہ وسلم سے عرض کیا کہ اے اللہ کے رسول! جس شخص کو آپ نے وہ گھوڑا سواری کے لیے دیا تھا، میں نے دیکھا کہ وہ اسے فروخت کر رہا ہے، تو کیا میں اسے خود خرید لوں؟ جس پر آپ صلی اللہ علیہ وسلم نے ارشاد فرمایا: ”تم اسے ہرگز نہ خریدو اور اپنا دیا ہوا صدقہ واپس نہ لو۔“ [مسند أبي يعلى الموصلي/مسند عبد الله بن عمر/حدیث: 5840]