سیدنا فضل بن عباس رضی اللہ عنہ سے روایت ہے کہ ”نبی اکرم صلی اللہ علیہ وسلم ہمارے ایک دیہاتی علاقے میں سیدنا عباس رضی اللہ عنہ کی ملاقات کے لیے تشریف لائے، وہاں ہمارا ایک کتا اور ایک گدھا چر رہے تھے، پس نبی اکرم صلی اللہ علیہ وسلم نے عصر کی نماز ادا فرمائی جبکہ وہ دونوں جانور آپ صلی اللہ علیہ وسلم کے سامنے ہی تھے، مگر انہیں نہ تو وہاں سے جھڑکا گیا اور نہ ہی پیچھے ہٹایا گیا۔“ [مسند أبي يعلى الموصلي/مسند الفضل بن العباس رحمه الله/حدیث: 6726]

سیدنا ابن عباس رضی اللہ عنہما سے روایت ہے کہ سیدنا فضل بن عباس رضی اللہ عنہ نے فرمایا: ”میں رسول اللہ صلی اللہ علیہ وسلم کے پیچھے سواری پر سوار تھا، پس میں مسلسل آپ صلی اللہ علیہ وسلم کو تلبیہ «يُلَبِّي» پکارتے ہوئے سنتا رہا یہاں تک کہ آپ صلی اللہ علیہ وسلم نے جمرہ عقبہ کی رمی فرمائی، پھر جب آپ صلی اللہ علیہ وسلم نے رمی کر لی تو تلبیہ کہنا بند کر دیا۔“ [مسند أبي يعلى الموصلي/مسند الفضل بن العباس رحمه الله/حدیث: 6727]

سیدنا فضل بن عباس رضی اللہ عنہما سے روایت ہے کہ ”نبی اکرم صلی اللہ علیہ وسلم (حج کے موقع پر) مسلسل تلبیہ پکارتے رہے یہاں تک کہ آپ صلی اللہ علیہ وسلم نے جمرہ عقبہ کی رمی فرمائی، پس آپ صلی اللہ علیہ وسلم نے اسے سات کنکریاں ماریں اور ہر کنکری مارتے وقت آپ صلی اللہ علیہ وسلم تکبیر (اللہ اکبر) کہتے تھے۔“ [مسند أبي يعلى الموصلي/مسند الفضل بن العباس رحمه الله/حدیث: 6728]

سیدنا فضل بن عباس رضی اللہ عنہما سے روایت ہے کہ ”نبی کریم صلی اللہ علیہ وسلم نے عرفہ کے دن (میدانِ عرفات میں) نوش فرمایا۔“ [مسند أبي يعلى الموصلي/مسند الفضل بن العباس رحمه الله/حدیث: 6729]

سیدنا فضل بن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم عرفات سے اور پھر جمع (مزدلفہ) سے روانہ ہوئے اور آپ صلی اللہ علیہ وسلم پر نہایت وقار اور سکینت طاری تھی یہاں تک کہ آپ صلی اللہ علیہ وسلم منیٰ تشریف لائے، پھر جب آپ صلی اللہ علیہ وسلم وادیِ مُحَسِّر میں پہنچے تو آپ صلی اللہ علیہ وسلم نے ارشاد فرمایا: ”اے لوگو! تم پر لازم ہے کہ (رمی جمار کے لیے) ایسی کنکریاں استعمال کرو جو چھوٹی ہوں (جنہیں چٹکی یا انگلیوں کے پوروں سے پھینکا جا سکے)“ یعنی جمرات کی کنکریاں، اور آپ صلی اللہ علیہ وسلم نے اپنے دستِ مبارک سے اشارہ کرتے ہوئے ان چھوٹی کنکریوں کی ہیئت و مقدار کو واضح فرمایا۔“ [مسند أبي يعلى الموصلي/مسند الفضل بن العباس رحمه الله/حدیث: 6730]

سیدنا فضل بن عباس رضی اللہ عنہما سے روایت ہے کہ انہوں نے فرمایا: ”میں رسول اللہ صلی اللہ علیہ وسلم کی سواری پر آپ صلی اللہ علیہ وسلم کے پیچھے بیٹھا ہوا تھا اور ایک دیہاتی اپنی ایک خوبصورت بیٹی کے ہمراہ موجود تھا، وہ اسے رسول اللہ صلی اللہ علیہ وسلم کے سامنے اس امید پر پیش کرنے لگا کہ آپ صلی اللہ علیہ وسلم اس سے نکاح فرما لیں؛ (سیدنا فضل رضی اللہ عنہ فرماتے ہیں کہ) میں اس کی طرف دیکھنے لگا تو رسول اللہ صلی اللہ علیہ وسلم میرا سر پکڑ کر اسے دوسری طرف پھیرنے لگے، اور رسول اللہ صلی اللہ علیہ وسلم «يُلَبِّي» ”تلبیہ پکارتے رہے“ یہاں تک کہ آپ صلی اللہ علیہ وسلم نے جمرہ عقبہ کی رمی فرمائی۔“ [مسند أبي يعلى الموصلي/مسند الفضل بن العباس رحمه الله/حدیث: 6731]

سیدنا فضل بن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم عرفات سے روانہ ہوئے اور سیدنا اسامہ رضی اللہ عنہ آپ صلی اللہ علیہ وسلم کے پیچھے سوار تھے، پس جب آپ صلی اللہ علیہ وسلم (میدانِ عرفات میں) وقوف فرما رہے تھے تو اونٹنی بدک کر اِدھر اُدھر ہونے لگی، چنانچہ آپ صلی اللہ علیہ وسلم نے وہاں سے کوچ کرنے سے قبل اسے ضرب لگائی جبکہ آپ صلی اللہ علیہ وسلم نے اپنے دونوں ہاتھ (دعا کے لیے) اٹھا رکھے تھے جو آپ کے سرِ مبارک سے بلند نہیں ہو رہے تھے، پھر جب آپ صلی اللہ علیہ وسلم عرفات سے روانہ ہوئے تو نہایت سکون و وقار کے ساتھ چلے یہاں تک کہ مزدلفہ پہنچ گئے، پھر آپ صلی اللہ علیہ وسلم نے مزدلفہ سے کوچ فرمایا اور اس وقت سیدنا فضل بن عباس رضی اللہ عنہما آپ صلی اللہ علیہ وسلم کے پیچھے سوار تھے، پس سیدنا فضل رضی اللہ عنہ بیان کرتے ہیں کہ ”نبی اکرم صلی اللہ علیہ وسلم مسلسل تلبیہ پکارتے رہے یہاں تک کہ آپ صلی اللہ علیہ وسلم نے جمرہ عقبہ کی رمی کر لی۔““ [مسند أبي يعلى الموصلي/مسند الفضل بن العباس رحمه الله/حدیث: 6732]

سیدنا عبداللہ بن عباس رضی اللہ عنہما، سیدنا فضل بن عباس رضی اللہ عنہ سے روایت کرتے ہیں کہ رسول اللہ صلی اللہ علیہ وسلم ”کعبہ کے اندر کھڑے ہوئے لیکن آپ صلی اللہ علیہ وسلم نے وہاں نہ تو رکوع کیا اور نہ ہی سجدہ فرمایا۔“ [مسند أبي يعلى الموصلي/مسند الفضل بن العباس رحمه الله/حدیث: 6733]

سیدنا فضل بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ”بنو ہاشم کے ضعیف اور کمزور افراد کو یہ حکم ارشاد فرمایا کہ وہ مزدلفہ سے رات ہی کے وقت (منیٰ کے لیے) جلدی روانہ ہو جائیں۔“ [مسند أبي يعلى الموصلي/مسند الفضل بن العباس رحمه الله/حدیث: 6734]

سیدنا فضل بن عباس رضی اللہ عنہ سے روایت ہے کہ انہوں نے فرمایا: ”میں نبی کریم صلی اللہ علیہ وسلم کے پیچھے سواری پر بیٹھا ہوا تھا، آپ صلی اللہ علیہ وسلم نے جمرہ عقبہ کو سات کنکریاں ماریں اور آپ صلی اللہ علیہ وسلم ہر کنکری مارنے کے ساتھ «اللّٰہُ اَكْبَرُ» ”اللہ سب سے بڑا ہے“ کہہ کر اللہ کی بڑائی بیان فرماتے تھے۔“ [مسند أبي يعلى الموصلي/مسند الفضل بن العباس رحمه الله/حدیث: 6735]