سیدنا ابن عباس رضی اللہ عنہما اپنی والدہ سیدہ ام الفضل رضی اللہ عنہا سے روایت کرتے ہیں کہ ”انہوں نے رسول اللہ صلی اللہ علیہ وسلم کو نمازِ مغرب میں سورہ ﴿وَالْمُرْسَلَاتِ عُرْفًا﴾ کی تلاوت فرماتے ہوئے سنا۔“ [مسند أبي يعلى الموصلي/حديث أم الفضل بنت الحارث/حدیث: 7071]

سیدہ ام الفضل رضی اللہ عنہا سے روایت ہے کہ ایک شخص نبی اکرم صلی اللہ علیہ وسلم کی خدمت میں حاضر ہوا جبکہ آپ صلی اللہ علیہ وسلم میرے گھر تشریف فرما تھے، اس شخص نے عرض کی کہ میری ایک بیوی تھی، پھر میں نے اس کی موجودگی میں ایک اور عورت سے نکاح کر لیا، اب میری پہلی بیوی کا یہ دعویٰ ہے کہ اس نے میری اس نئی بیوی کو ایک یا دو بار دودھ پلایا ہوا ہے، تو رسول اللہ صلی اللہ علیہ وسلم نے ارشاد فرمایا: ”ایک یا دو مرتبہ دودھ چوسنا (حرمتِ نکاح کو) ثابت نہیں کرتا۔“ [مسند أبي يعلى الموصلي/حديث أم الفضل بنت الحارث/حدیث: 7072]

سیدہ ام الفضل رضی اللہ عنہا سے روایت ہے کہ ”لوگوں کے مابین یومِ عرفہ کے دن رسول اللہ صلی اللہ علیہ وسلم کے روزے کے متعلق بحث و تکرار ہوئی، تو میں نے آپ صلی اللہ علیہ وسلم کی خدمتِ اقدس میں دودھ کا ایک برتن بھیجا جسے آپ صلی اللہ علیہ وسلم نے نوش فرما لیا۔“ [مسند أبي يعلى الموصلي/حديث أم الفضل بنت الحارث/حدیث: 7073]

سیدہ ام الفضل رضی اللہ عنہا سے روایت ہے، وہ بیان کرتی ہیں کہ میں نے (خواب میں) دیکھا گویا اللہ کے رسول صلی اللہ علیہ وسلم کے جسمِ مبارک کا ایک ٹکڑا میرے گھر میں ہے جس سے میں گھبرا گئی، پھر میں نے آپ صلی اللہ علیہ وسلم سے اس کا ذکر کیا تو آپ صلی اللہ علیہ وسلم نے ارشاد فرمایا: ”یہ بہتر ہے ان شاء اللہ، (سیدہ) فاطمہ (رضی اللہ عنہا) کے ہاں لڑکا پیدا ہو گا جس کی تم اپنے بیٹے (سیدنا) قثم (رضی اللہ عنہ) کے دودھ سے کفالت کرو گی۔“ وہ فرماتی ہیں کہ پھر (سیدنا) حسن (رضی اللہ عنہ) کی ولادت ہوئی تو انہوں نے وہ بچہ مجھے دے دیا اور میں نے انہیں دودھ پلایا، پھر میں انہیں لے کر (آپ صلی اللہ علیہ وسلم کی خدمت میں) حاضر ہوئی اور انہیں آپ صلی اللہ علیہ وسلم کی گود میں بٹھا دیا، تو انہوں نے آپ صلی اللہ علیہ وسلم پر پیشاب کر دیا جس پر میں نے ان کے دونوں کندھوں کے درمیان (تادیباً) ضرب لگائی، تو آپ صلی اللہ علیہ وسلم نے فرمایا: «ارْفُقِي أَصْلَحَكِ اللَّهُ» ”نرمی سے کام لو، اللہ تمہارے حال کی اصلاح فرمائے“ یا فرمایا: «رَحِمَكِ اللَّهُ» ”اللہ تم پر رحم فرمائے، تم نے میرے بیٹے کو تکلیف پہنچائی ہے“، وہ فرماتی ہیں کہ میں نے عرض کی: آپ صلی اللہ علیہ وسلم اپنا تہبند اتار دیں اور دوسرا لباس زیبِ تن فرما لیں تاکہ میں اسے دھو دوں، تو آپ صلی اللہ علیہ وسلم نے ارشاد فرمایا: ”لڑکی کے پیشاب (والے کپڑے) کو دھویا جاتا ہے جبکہ لڑکے کے پیشاب پر (صرف) پانی چھڑکا جاتا ہے۔“ [مسند أبي يعلى الموصلي/حديث أم الفضل بنت الحارث/حدیث: 7074]

سیدہ ام الفضل بنت الحارث رضی اللہ عنہا سے روایت ہے کہ رسول اللہ صلی اللہ علیہ وسلم نے (سیدنا عباس رضی اللہ عنہ کی صاحبزادی) ام حبیبہ کو دیکھا جبکہ وہ ابھی دودھ چھڑانے کے بعد کی ابتدائی عمر میں تھیں، تو آپ صلی اللہ علیہ وسلم نے ارشاد فرمایا: ”اگر عباس کی یہ ننھی بیٹی میرے جیتے جی (شادی کی) عمر کو پہنچ گئی تو میں اس سے ضرور نکاح کروں گا۔“ [مسند أبي يعلى الموصلي/حديث أم الفضل بنت الحارث/حدیث: 7075]

سیدہ ام الفضل رضی اللہ عنہا سے روایت ہے کہ رسول اللہ صلی اللہ علیہ وسلم اپنے چچا (سیدنا عباس رضی اللہ عنہ) کی عیادت کے لیے تشریف لائے جبکہ وہ بیمار تھے اور اس بیماری کی تکلیف کی وجہ سے موت کی آرزو کر رہے تھے، تو رسول اللہ صلی اللہ علیہ وسلم نے اپنا دستِ مبارک سیدنا عباس رضی اللہ عنہ کے سینے پر مارا اور ارشاد فرمایا: ”اے رسول اللہ کے چچا! موت کی تمنا نہ کیجیے، کیونکہ اگر آپ باحیات رہے اور آپ کی نیکیوں میں اضافہ ہوا تو یہ آپ کے لیے بہتر ہوگا، اور اگر آپ زندہ رہے اور (اپنی لغزشوں پر) اللہ تعالیٰ کی رضا اور معافی طلب کی تو یہ بھی آپ کے لیے بہتر ہوگا۔“ [مسند أبي يعلى الموصلي/حديث أم الفضل بنت الحارث/حدیث: 7076]