سیدہ میمونہ بنت حارث رضی اللہ عنہا سے روایت ہے کہ انہوں نے بیان فرمایا: ”رسول اللہ صلی اللہ علیہ وسلم خمرہ (کھجور کے پتوں سے تیار کردہ مختصر چٹائی) پر نماز ادا فرمایا کرتے تھے۔“ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7090]

سیدہ میمونہ رضی اللہ عنہا سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا: «لَا تَزَالُ أُمَّتِي بِخَيْرٍ مُتَمَاسِكٌ أَمْرُهَا مَا لَمْ يَظْهَرْ فِيهِمْ أَوْلَادُ الزِّنَى، فَإِذَا ظَهَرُوا خِفْتُ أَنْ يَعُمَّهُمُ اللَّهُ بِعِقَابٍ» ”میری امت اس وقت تک خیر و بھلائی پر قائم رہے گی اور اس کا معاملہ (نظم و ضبط) برقرار رہے گا جب تک ان میں زنا سے پیدا ہونے والی اولاد ظاہر نہ ہو جائے، پھر جب وہ ظاہر ہو جائیں تو مجھے اندیشہ ہے کہ اللہ تعالیٰ ان سب کو اپنے عذاب کی لپیٹ میں لے لے۔“ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7091]

سیدہ میمونہ رضی اللہ عنہا سے روایت ہے کہ ”رسول اللہ صلی اللہ علیہ وسلم جب اپنی ازواجِ مطہرات میں سے کسی کے ساتھ ایسی حالت میں مباشرت (قربت) کا ارادہ فرماتے جب وہ ایامِ حیض سے ہوتیں، تو آپ صلی اللہ علیہ وسلم انہیں (پردہ پوشی کے لیے) حکم دیتے اور وہ تہبند باندھ لیا کرتی تھیں۔“ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7092]

سیدنا ابن عباس رضی اللہ عنہما سے روایت ہے کہ نبی کریم صلی اللہ علیہ وسلم کی زوجہ مطہرہ سیدہ میمونہ رضی اللہ عنہا نے بیان فرمایا کہ نبی کریم صلی اللہ علیہ وسلم ایک صبح پریشان خاطر اٹھے، پھر شام ہوئی تو آپ صلی اللہ علیہ وسلم اسی کیفیت میں تھے اور اگلی صبح بھی آپ صلی اللہ علیہ وسلم اسی حالت میں رہے۔ سیدہ میمونہ رضی اللہ عنہا فرماتی ہیں کہ میں نے عرض کی: ”یا رسول اللہ! کیا بات ہے، میں آپ کو اس قدر بوجھل طبیعت اور پریشان خاطر دیکھ رہی ہوں؟“ آپ صلی اللہ علیہ وسلم نے ارشاد فرمایا: ”بے شک جبرئیل علیہ السلام نے مجھ سے (ملنے کا) وعدہ کیا تھا اور انہوں نے کبھی مجھ سے وعدہ خلافی نہیں کی۔“ راوی کہتے ہیں کہ پھر جب لوگوں نے دیکھا تو ان کے ایک تخت کے نیچے کتے کا ایک بچہ موجود تھا، چنانچہ نبی کریم صلی اللہ علیہ وسلم نے اس جگہ کے متعلق حکم دیا تو اسے پانی سے دھو دیا گیا۔ پھر جب جبرئیل علیہ السلام آپ صلی اللہ علیہ وسلم کے پاس تشریف لائے تو نبی کریم صلی اللہ علیہ وسلم نے ان سے دریافت فرمایا: ”آپ نے مجھ سے آنے کا وعدہ کیا تھا اور آپ نے کبھی مجھ سے وعدہ خلافی نہیں کی تھی (پھر تاخیر کیسی ہوئی)؟“ تو جبرئیل علیہ السلام نے عرض کی: ”کیا آپ کو علم نہیں کہ ہم (فرشتے) اس گھر میں داخل نہیں ہوتے جس میں کتا ہو اور نہ ہی اس گھر میں جس میں تصویر ہو۔“ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7093]

سیدہ میمونہ رضی اللہ عنہا سے روایت ہے کہ انہوں نے بارگاہِ رسالت میں عرض کی: ”یا رسول اللہ! کیا آدمی (وضو کے وقت) ہر لمحہ اپنے موزے اتار دیا کرے؟“ تو آپ صلی اللہ علیہ وسلم نے ارشاد فرمایا: ”نہیں، بلکہ جب تک اسے مناسب لگے وہ ان پر مسح کرتا رہے۔“ عمر بن اسحاق بن یسار رحمہ اللہ بیان کرتے ہیں کہ انہوں نے یہ روایت عطاء رحمہ اللہ کی ایک کتاب میں لکھی ہوئی پڑھی ہے۔ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7094]

سیدہ میمونہ رضی اللہ عنہا سے روایت ہے کہ ”نبی اکرم صلی اللہ علیہ وسلم نے ایک ایسی چادر میں نماز ادا فرمائی جس کا کچھ حصہ آپ صلی اللہ علیہ وسلم کے جسمِ مبارک پر تھا اور کچھ حصہ ان (سیدہ میمونہ رضی اللہ عنہا) پر تھا، جبکہ وہ حالتِ حیض میں تھیں۔“ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7095]

یزید بن اصم رحمہ اللہ سے روایت ہے کہ انہوں نے نبی کریم صلی اللہ علیہ وسلم کی زوجہ مطہرہ سیدہ میمونہ رضی اللہ عنہا کو فرماتے ہوئے سنا کہ ”رسول اللہ صلی اللہ علیہ وسلم جب سجدہ فرماتے تو اپنے دونوں ہاتھوں (اور بازوؤں) کو پہلوؤں سے اس طرح جدا رکھتے کہ آپ صلی اللہ علیہ وسلم کے پیچھے سے آپ صلی اللہ علیہ وسلم کی بغلوں کی سفیدی نظر آنے لگتی تھی، اور جب آپ صلی اللہ علیہ وسلم (قعدہ میں) بیٹھتے تو اپنی بائیں ران پر مکمل اطمینان و سکون کے ساتھ تشریف فرما ہوتے۔“ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7096]

سیدہ میمونہ رضی اللہ عنہا (زوجہ نبی صلی اللہ علیہ وسلم ) سے روایت ہے کہ انہوں نے فرمایا: ”نبی اکرم صلی اللہ علیہ وسلم جب سجدہ فرماتے تو (اپنے بازوؤں کو پہلوؤں سے اس طرح دور رکھتے کہ) اگر کوئی چھوٹا چوپایہ آپ صلی اللہ علیہ وسلم کے مبارک ہاتھوں کے نیچے سے گزرنا چاہتا تو گزر سکتا تھا۔“ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7097]

سیدنا ابن عباس رضی اللہ عنہما سیدہ میمونہ رضی اللہ عنہا سے روایت کرتے ہیں کہ انہوں نے بیان کیا: ”میں اور نبی صلی اللہ علیہ وسلم حالتِ جنابت میں تھے، پس میں نے ایک لگن سے غسل کیا تو اس میں کچھ پانی بچ گیا، پھر نبی صلی اللہ علیہ وسلم اس سے غسل فرمانے کے لیے تشریف لائے تو میں نے عرض کی کہ میں اس سے غسل کر چکی ہوں، اس پر آپ صلی اللہ علیہ وسلم نے ارشاد فرمایا: ”پانی پر جنابت طاری نہیں ہوتی“۔“ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7098]

سیدہ میمونہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”بے شک دنیا شیریں اور سرسبز و شاداب ہے، پس جس نے اس میں تقویٰ اختیار کیا اور (اپنے احوال کی) اصلاح کی (وہ کامیاب رہا)، وگرنہ وہ اس شخص کی مانند ہے جو کھاتا تو ہے مگر سیر نہیں ہوتا؛ (اعمال و درجات کے اعتبار سے) لوگوں کے درمیان اس قدر دوری ہوگی جیسے دو ستاروں کے مابین بعد ہوتا ہے کہ ان میں سے ایک مشرق سے طلوع ہو رہا ہو اور دوسرا مغرب میں غروب ہو رہا ہو۔“ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7099]