یزید الاصم رحمہ اللہ سے روایت ہے کہ نبی کریم صلی اللہ علیہ وسلم کی زوجہ محترمہ سیدہ میمونہ رضی اللہ عنہا مکہ مکرمہ میں شدید علیل ہو گئیں جبکہ ان کے بھتیجوں میں سے کوئی ان کے پاس موجود نہ تھا، تو انہوں نے فرمایا: ”مجھے مکہ سے باہر لے چلو، کیونکہ میں یہاں وفات نہیں پاؤں گی، بیشک رسول اللہ صلی اللہ علیہ وسلم نے مجھے خبر دی تھی کہ میری موت مکہ میں نہیں ہوگی۔“ راوی کہتے ہیں کہ پھر لوگ انہیں اٹھا کر لے گئے یہاں تک کہ مقامِ سرف میں اس درخت کے پاس پہنچے جس کے نیچے ایک قبے (خیمے) میں رسول اللہ صلی اللہ علیہ وسلم نے ان کے ساتھ خلوتِ صحیحہ فرمائی تھی، وہیں ان کا انتقال ہو گیا؛ راوی بیان کرتے ہیں کہ پھر جب ہم نے انہیں لحد میں اتارا تو میں نے اپنی چادر لے کر اسے قبر میں ان کے رخسار کے نیچے رکھ دیا، لیکن سیدنا ابن عباس رضی اللہ عنہما نے اسے پکڑ کر وہاں سے نکال پھینک دیا۔ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7110]

سیدہ میمونہ بنت الحارث رضی اللہ عنہا، زوجہ نبی صلی اللہ علیہ وسلم سے روایت ہے کہ ”نبی اکرم صلی اللہ علیہ وسلم عصر کی نماز سے پہلے دو رکعتیں ادا فرمایا کرتے تھے۔“ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7111]

سیدہ میمونہ بنت حارث رضی اللہ عنہا سے روایت ہے (جسے سیدنا ابن عباس رضی اللہ عنہما نے نقل کیا ہے) کہ ایک مرتبہ رسول اللہ صلی اللہ علیہ وسلم ہمارے پاس تشریف لائے تو آپ صلی اللہ علیہ وسلم نہایت بجھے بجھے اور فکرمند دکھائی دے رہے تھے، سیدہ رضی اللہ عنہا کہتی ہیں کہ میں نے عرض کیا: ”اے اللہ کے رسول! کیا بات ہے، میں آپ کو فکرمند دیکھ رہی ہوں؟“ آپ صلی اللہ علیہ وسلم نے فرمایا: ”بے شک جبریل علیہ السلام نے مجھ سے وعدہ کیا تھا کہ وہ مجھ سے ملنے آئیں گے، لیکن وہ اپنے وعدے پر نہیں آئے“، وہ کہتی ہیں کہ آپ صلی اللہ علیہ وسلم نے وہ پورا دن اور وہ رات اسی کیفیت میں گزاری، پھر آپ صلی اللہ علیہ وسلم کو کتے کے اس پلے کا خیال آیا جو سیدنا حسین رضی اللہ عنہ کا تھا اور ان کے سامان رکھنے والے ایک تخت کے نیچے موجود تھا، چنانچہ آپ صلی اللہ علیہ وسلم نے اسے وہاں سے نکالنے کا حکم دیا، پھر آپ صلی اللہ علیہ وسلم نے پانی طلب فرما کر اپنے دستِ مبارک سے اس جگہ پر چھڑکاؤ کیا، پھر جب آپ صلی اللہ علیہ وسلم باہر تشریف لے گئے تو آپ صلی اللہ علیہ وسلم کی ملاقات جبریل علیہ السلام سے ہوئی، آپ صلی اللہ علیہ وسلم نے فرمایا: ”آپ نے مجھ سے آنے کا وعدہ کیا تھا“، اس پر جبریل علیہ السلام نے عرض کیا: ”ہم (فرشتے) اس گھر میں داخل نہیں ہوتے جس میں کتا ہو اور نہ ہی اس گھر میں جہاں تصویر ہو“، اس کے بعد رسول اللہ صلی اللہ علیہ وسلم نے کتوں کو تلف کرنے کا حکم صادر فرمایا یہاں تک کہ جب چھوٹے باغ کی حفاظت کرنے والے کتے کے بارے میں بھی رعایت طلب کی جاتی تو آپ صلی اللہ علیہ وسلم اس کی بھی اجازت نہ دیتے۔ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7112]

سیدہ میمونہ رضی اللہ عنہا سے روایت ہے کہ انہوں نے رسول اللہ صلی اللہ علیہ وسلم کو یہ ارشاد فرماتے ہوئے سنا: ”میری اس مسجد میں ایک نماز ادا کرنا، مسجدِ حرام کے سوا دیگر تمام مساجد میں ایک ہزار نمازیں پڑھنے سے زیادہ فضیلت رکھتا ہے۔“ [مسند أبي يعلى الموصلي/تابع حديث ميمونة زوج النبي صلى الله عليه وسلم/حدیث: 7113]