سیدہ صفیہ رضی اللہ عنہا سے روایت ہے کہ انہوں نے بیان کیا: ”میں رسول اللہ صلی اللہ علیہ وسلم کی خدمت میں حاضر ہوئی تو اس وقت لوگوں میں آپ صلی اللہ علیہ وسلم سے زیادہ ناپسندیدہ شخصیت میرے نزدیک کوئی نہ تھی، پھر آپ صلی اللہ علیہ وسلم نے (حالات کی وضاحت کرتے ہوئے) ارشاد فرمایا: ”بلاشبہ تمہاری قوم نے ایسا ایسا معاملہ کیا تھا“، وہ بیان کرتی ہیں کہ میں ابھی اپنی نشست سے اٹھی بھی نہ تھی کہ تمام لوگوں میں آپ صلی اللہ علیہ وسلم سے بڑھ کر میرے نزدیک کوئی محبوب نہ رہا۔“ [مسند أبي يعلى الموصلي/حديث صفية بنت حيي بن أخطب زوج النبي صلى الله عليه وسلم رضي الله عنها/حدیث: 7114]

سیدہ صفیہ رضی اللہ عنہا سے روایت ہے کہ انہوں نے بیان فرمایا: ”رسول اللہ صلی اللہ علیہ وسلم میرے پاس تشریف لائے تو میں نے آپ صلی اللہ علیہ وسلم کی خدمت میں (بکری کے) شانے کا ٹھنڈا گوشت پیش کیا، میں اسے (ہڈی سے) کھرچ کر الگ کر رہی تھی، پس آپ صلی اللہ علیہ وسلم نے اسے تناول فرمایا اور پھر نماز کے لیے کھڑے ہو گئے۔“ [مسند أبي يعلى الموصلي/حديث صفية بنت حيي بن أخطب زوج النبي صلى الله عليه وسلم رضي الله عنها/حدیث: 7115]

ام المومنین سیدہ صفیہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”لوگ اس گھر (بیت اللہ) پر چڑھائی کرنے سے باز نہیں آئیں گے یہاں تک کہ ایک لشکر اس پر حملہ آور ہوگا، پھر جب وہ زمین کے ایک چٹیل میدان (بیداء) میں پہنچیں گے تو ان کے اول و آخر سب کو زمین میں دھنسا دیا جائے گا اور ان کے درمیان والے بھی نجات نہیں پا سکیں گے۔“ سیدہ رضی اللہ عنہا بیان کرتی ہیں کہ میں نے عرض کی: اے اللہ کے رسول! آپ اس شخص کے بارے میں کیا فرماتے ہیں جسے (ساتھ چلنے پر) مجبور کیا گیا ہو؟ تو آپ صلی اللہ علیہ وسلم نے ارشاد فرمایا: ”اللہ عزوجل انہیں ان کی نیتوں کے مطابق (قیامت کے دن) اٹھائے گا۔“ [مسند أبي يعلى الموصلي/حديث صفية بنت حيي بن أخطب زوج النبي صلى الله عليه وسلم رضي الله عنها/حدیث: 7116]

سیدہ صفیہ رضی اللہ عنہا سے روایت ہے کہ انہوں نے بیان فرمایا: ”رسول اللہ صلی اللہ علیہ وسلم نے مٹی کے گھڑے (مرتبان) میں تیار کردہ نبیذ کو حرام قرار دیا ہے۔“ [مسند أبي يعلى الموصلي/حديث صفية بنت حيي بن أخطب زوج النبي صلى الله عليه وسلم رضي الله عنها/حدیث: 7117]

سیدہ صفیہ رضی اللہ عنہا سے روایت ہے کہ رسول اللہ صلی اللہ علیہ وسلم نے ان کی (غلامی سے) آزادی کو ہی ان کا مہر مقرر فرمایا تھا، نیز ایک مرتبہ نبی کریم صلی اللہ علیہ وسلم ان کے پاس تشریف لائے تو ان کے پاس چار ہزار گٹھلیاں تھیں جن کے ذریعے وہ تسبیح پڑھ رہی تھیں، تو آپ صلی اللہ علیہ وسلم نے ارشاد فرمایا: ”میں نے تمہارے پاس کھڑے ہونے کے بعد سے اب تک ان تمام تسبیحات سے زیادہ تسبیح پڑھ لی ہے جو تم نے اب تک پڑھی ہیں“، انہوں نے عرض کی: اے اللہ کے رسول صلی اللہ علیہ وسلم ! مجھے بھی وہ کلمات سکھا دیجیے، تو آپ صلی اللہ علیہ وسلم نے فرمایا: ”تم یہ کہا کرو: «سُبْحَانَ اللَّهِ عَدَدَ مَا خَلَقَ» ”اللہ کی پاکیزگی بیان کرتی ہوں اس کی پیدا کردہ مخلوق کی تعداد کے برابر۔““ [مسند أبي يعلى الموصلي/حديث صفية بنت حيي بن أخطب زوج النبي صلى الله عليه وسلم رضي الله عنها/حدیث: 7118]

سیدہ صفیہ بنت حیّی رضی اللہ عنہا سے روایت ہے کہ رسول اللہ صلی اللہ علیہ وسلم نے رات کے وقت مجھے اپنی اونٹنی پر اپنے پیچھے سوار کیا، وہ بیان کرتی ہیں کہ مجھ پر اونگھ طاری ہونے لگی تو رسول اللہ صلی اللہ علیہ وسلم اپنے دستِ مبارک سے مجھے ٹٹولتے اور فرماتے: ”اے بی بی! اے بنتِ حیّی!“ اور آپ صلی اللہ علیہ وسلم یہ فرماتے رہے: ”اے صفیہ! میں تمھاری قوم کے ساتھ کیے گئے معاملے پر تمھارے سامنے عذر پیش کرتا ہوں (یعنی اس کی وجہ بتاتا ہوں)، بے شک انھوں نے میرے بارے میں ایسی ایسی باتیں کہی تھیں، انھوں نے میرے متعلق ایسا ایسا کہا تھا۔“ [مسند أبي يعلى الموصلي/حديث صفية بنت حيي بن أخطب زوج النبي صلى الله عليه وسلم رضي الله عنها/حدیث: 7119]

سیدہ صفیہ بنت حیی رضی اللہ عنہا سے روایت ہے، وہ بیان کرتی ہیں کہ ”میں نے رسول اللہ صلی اللہ علیہ وسلم سے بڑھ کر خوش اخلاق کوئی نہیں دیکھا، میں نے دیکھا کہ آپ صلی اللہ علیہ وسلم مجھے خیبر سے اپنی اونٹنی کے پچھلے حصے پر سوار کر کے رات کے وقت روانہ ہوئے، تو مجھ پر اونگھ طاری ہونے لگی جس کی وجہ سے میرا سر کجاوے کے پچھلے حصے سے ٹکرانے لگتا، اس پر آپ صلی اللہ علیہ وسلم اپنے دستِ مبارک سے مجھے سہارا دیتے اور فرماتے: «يَا هَذِهِ مَهْلًا يَا بِنْتَ حُيَيٍّ» ”اے بی بی! ذرا سنبھل کر، اے بنتِ حیی!“ یہاں تک کہ جب آپ صلی اللہ علیہ وسلم مقامِ صہباء پر پہنچے تو ارشاد فرمایا: «أَمَا إِنِّي أَعْتَذِرُ إِلَيْكِ يَا صَفِيَّةُ مِمَّا صَنَعْتُ بِقَوْمِكِ، إِنَّهُمْ قَالُوا لِي كَذَا وَكَذَا» ”دیکھو اے صفیہ! تمہاری قوم کے ساتھ میں نے جو (جنگ کا) معاملہ کیا اس پر میں تمہارے سامنے حقیقتِ حال بیان کرتا ہوں (تاکہ تمہارے دل میں میل نہ رہے)، کیونکہ انہوں نے میرے متعلق ایسی ایسی باتیں کہی تھیں (یعنی وہ سخت دشمنی اور اشتعال انگیزی میں پیش پیش تھے)۔“ [مسند أبي يعلى الموصلي/حديث صفية بنت حيي بن أخطب زوج النبي صلى الله عليه وسلم رضي الله عنها/حدیث: 7120]

علی بن حسین رحمہ اللہ سے روایت ہے کہ انہیں نبی کریم صلی اللہ علیہ وسلم کی زوجہ محترمہ سیدہ صفیہ بنت حی رضی اللہ عنہا نے بتایا کہ ”میں رسول اللہ صلی اللہ علیہ وسلم کی خدمت میں حاضر ہوئی اور آپ صلی اللہ علیہ وسلم کے پاس بیٹھ کر باتیں کرتی رہی، اس وقت آپ صلی اللہ علیہ وسلم مسجد میں اعتکاف فرما تھے، پھر ایک رات جب میں رخصت ہونے لگی تو آپ صلی اللہ علیہ وسلم مجھے گھر چھوڑنے کے لیے میرے ساتھ کھڑے ہوئے، راستے میں انصار کے دو آدمی ملے، جب انہوں نے نبی صلی اللہ علیہ وسلم کو دیکھا تو وہ حیا کی وجہ سے مڑ کر جانے لگے، آپ صلی اللہ علیہ وسلم نے فرمایا: ”ادھر آؤ! یہ صفیہ بنت حی (نبی صلی اللہ علیہ وسلم کی زوجہ) ہیں“، انہوں نے (حیرت و ندامت سے) عرض کیا: «نَعُوذُ بِاللَّهِ سُبْحَانَ اللَّهِ» ”ہم اللہ کی پناہ مانگتے ہیں، اللہ کی ذات پاک ہے“، آپ صلی اللہ علیہ وسلم نے فرمایا: ”میں نے تم سے یہ بات اس لیے نہیں کہی کہ تم میرے بارے میں کوئی برا گمان کرو گے، بلکہ مجھے معلوم ہے کہ شیطان انسان کے بدن میں خون کی طرح گردش کرتا ہے“۔“ [مسند أبي يعلى الموصلي/حديث صفية بنت حيي بن أخطب زوج النبي صلى الله عليه وسلم رضي الله عنها/حدیث: 7121]