محمد بن یزید بن خنیس رحمہ اللہ بیان کرتے ہیں کہ ہم سفیان ثوری رحمہ اللہ کی عیادت کے لیے حاضر ہوئے تو وہاں سعید بن حسان مخزومی رحمہ اللہ تشریف لائے، سفیان رحمہ اللہ نے ان سے فرمائش کی کہ ام صالح رحمہا اللہ کے واسطے سے جو حدیث آپ نے مجھے سنائی تھی اسے دوبارہ بیان کریں، انہوں نے کہا: جی ہاں، مجھے ام صالح رحمہا اللہ نے سیدہ صفیہ بنت شیبہ رضی اللہ عنہا سے اور انہوں نے رسول اللہ صلی اللہ علیہ وسلم کی زوجہ مطہرہ سیدہ ام حبیبہ رضی اللہ عنہا سے روایت کیا کہ رسول اللہ صلی اللہ علیہ وسلم نے ارشاد فرمایا: ”ابنِ آدم کی ہر گفتگو اس کے لیے وبال ہے نہ کہ باعثِ اجر، سوائے نیکی کا حکم دینے، برائی سے روکنے یا اللہ عزوجل کا ذکر کرنے کے۔“ [مسند أبي يعلى الموصلي/حديث أم حبيبة بنت أبي سفيان أم المؤمنين/حدیث: 7132]

سیدنا عبداللہ بن عمر رضی اللہ عنہما سے روایت ہے کہ ام المؤمنین سیدہ ام حبیبہ رضی اللہ عنہا نے انہیں بتایا کہ رسول اللہ صلی اللہ علیہ وسلم نے ارشاد فرمایا: ”بے شک جس قافلے میں گھنٹی ہو، فرشتے اس کی رفاقت اختیار نہیں کرتے۔“ [مسند أبي يعلى الموصلي/حديث أم حبيبة بنت أبي سفيان أم المؤمنين/حدیث: 7133]

سیدہ ام حبیبہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”ابنِ آدم کی ہر گفتگو اس کے لیے وبال ہے، اس کے حق میں مفید نہیں، سوائے نیکی کا حکم دینے، برائی سے روکنے یا اللہ تعالیٰ کا ذکر کرنے کے۔“ [مسند أبي يعلى الموصلي/حديث أم حبيبة بنت أبي سفيان أم المؤمنين/حدیث: 7134]

عمرو بن اوس الثقفی رحمہ اللہ سے روایت ہے کہ میں عنبسہ بن ابی سفیان رحمہ اللہ کے پاس اس وقت حاضر ہوا جب وہ جاں کنی کے عالم میں تھے، تو انہوں نے فرمایا: ”میں یہ بات پسند نہیں کرتا تھا (کہ میں آپ کو یہ حدیث سنائے بغیر دنیا سے رخصت ہو جاؤں)، اور اس کی وجہ یہ ہے کہ میں آپ کو وہ حدیث سنانا چاہتا ہوں جو مجھے سیدہ ام حبیبہ بنت ابی سفیان رضی اللہ عنہا نے سنائی تھی کہ نبی کریم صلی اللہ علیہ وسلم نے ارشاد فرمایا: «مَنْ صَلَّى ثِنْتَيْ عَشْرَةَ رَكْعَةً مَعَ صَلَاةِ النَّهَارِ بَنَى اللَّهُ عز وجل لَهُ بَيْتًا فِي الْجَنَّةِ» ”جس شخص نے دن کی نماز کے ساتھ بارہ رکعتیں (نوافل) پڑھیں، اللہ عزوجل اس کے لیے جنت میں ایک گھر تعمیر فرمائے گا“۔“ [مسند أبي يعلى الموصلي/حديث أم حبيبة بنت أبي سفيان أم المؤمنين/حدیث: 7135]

سیدہ ام حبیبہ رضی اللہ عنہا سے روایت ہے کہ انہوں نے نبی کریم صلی اللہ علیہ وسلم کو یہ فرماتے ہوئے سنا: «رُفْقَةٌ فِيهَا جَرَسٌ لَا تَصْحَبُهَا الْمَلَائِكَةُ» ”وہ قافلہ جس میں گھنٹی ہو، فرشتے اس کی رفاقت اختیار نہیں کرتے۔“ [مسند أبي يعلى الموصلي/حديث أم حبيبة بنت أبي سفيان أم المؤمنين/حدیث: 7136]

سیدہ ام حبیبہ بنت ابی سفیان رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: «مَنْ حَافَظَ عَلَى أَرْبَعِ رَكَعَاتٍ قَبْلَ الْعَصْرِ بَنَى اللَّهُ عَزَّ وَجَلَّ لَهُ بَيْتًا فِي الْجَنَّةِ» ”جس نے عصر (کی نماز) سے پہلے چار رکعتوں کی پابندی کی، اللہ عزوجل اس کے لیے جنت میں ایک گھر تعمیر فرمائے گا۔“ [مسند أبي يعلى الموصلي/حديث أم حبيبة بنت أبي سفيان أم المؤمنين/حدیث: 7137]

سیدہ ام حبیبہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: «مَنْ صَلَّى فِي يَوْمٍ ثِنْتَيْ عَشْرَةَ رَكْعَةً بَنَى اللَّهُ لَهُ بَيْتًا فِي الْجَنَّةِ» ”جو شخص ایک دن میں بارہ رکعتیں (نفل) ادا کرے گا، اللہ تعالیٰ اس کے لیے جنت میں ایک گھر تعمیر فرما دے گا۔“ [مسند أبي يعلى الموصلي/حديث أم حبيبة بنت أبي سفيان أم المؤمنين/حدیث: 7138]

سیدہ امِ حبیبہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”جس شخص نے ظہر سے پہلے چار رکعتیں اور ظہر کے بعد بھی چار رکعتیں (باقاعدگی سے) ادا کیں، اللہ عزوجل اس پر جہنم کی آگ حرام فرما دے گا۔“ [مسند أبي يعلى الموصلي/حديث أم حبيبة بنت أبي سفيان أم المؤمنين/حدیث: 7139]

سیدنا معاویہ بن ابی سفیان رضی اللہ عنہ سے روایت ہے کہ انہوں نے بیان کیا: ”میں نبی کریم صلی اللہ علیہ وسلم کی زوجہ محترمہ سیدہ امِ حبیبہ رضی اللہ عنہا کی خدمت میں حاضر ہوا تو میں نے نبی کریم صلی اللہ علیہ وسلم کو دیکھا کہ ”آپ صلی اللہ علیہ وسلم ایک ہی کپڑے میں کھڑے نماز ادا فرما رہے تھے جس کے دونوں پلوؤں کو آپ صلی اللہ علیہ وسلم نے ایک دوسرے کی مخالف سمت میں (کندھوں پر) لپیٹا ہوا تھا“، میں نے دریافت کیا: اے ام حبیبہ! کیا نبی کریم صلی اللہ علیہ وسلم ایک ہی کپڑے میں نماز پڑھ لیتے ہیں؟ تو انہوں نے جواب دیا: ”جی ہاں، اور یہ وہی کپڑا ہے جس میں آپ صلی اللہ علیہ وسلم نے (اپنی زوجہ سے) جماع (یعنی ازدواجی تعلق) قائم کیا ہوتا ہے“۔“ [مسند أبي يعلى الموصلي/حديث أم حبيبة بنت أبي سفيان أم المؤمنين/حدیث: 7140]

سیدہ ام حبیبہ رضی اللہ عنہا سے روایت ہے کہ نبی اکرم صلی اللہ علیہ وسلم ”جب مؤذن (کی پکار) سنتے تو آپ صلی اللہ علیہ وسلم بالکل ویسے ہی کلمات دہراتے جیسے مؤذن کہتا تھا، یہاں تک کہ وہ خاموش ہو جاتا۔“ [مسند أبي يعلى الموصلي/حديث أم حبيبة بنت أبي سفيان أم المؤمنين/حدیث: 7141]