سیدنا سہل بن سعد رضی اللہ عنہ سے روایت ہے کہ ایک شخص نے نبی کریم صلی اللہ علیہ وسلم کے حجرہ مبارک کے ایک سوراخ سے اندر جھانکا جبکہ نبی کریم صلی اللہ علیہ وسلم کے پاس ایک کنگھی (سر کھجانے کا آلہ) تھی جس سے آپ صلی اللہ علیہ وسلم اپنا سر مبارک کھجلا رہے تھے، تو آپ صلی اللہ علیہ وسلم نے (اسے دیکھ کر) ارشاد فرمایا: ”اگر مجھے علم ہوتا کہ تم (اندر) جھانک رہے ہو تو میں اس کے ذریعے تمہاری آنکھ پھوڑ دیتا، درحقیقت اجازت طلب کرنے کا حکم تو نگاہ (کی بے جا مداخلت اور پردہ پوشی) کی خاطر ہی لازم کیا گیا ہے۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7510]

سیدنا سہل بن سعد رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”لوگ اس وقت تک خیر و بھلائی کی حالت میں رہیں گے جب تک وہ (روزہ) افطار کرنے میں جلدی کرتے رہیں گے۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7511]

سیدنا سہل بن سعد رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”میری امت میں سے ستر ہزار یا سات لاکھ افراد (بیک وقت) جنت میں داخل ہوں گے۔“ (اس روایت کے راوی) ابو حازم رحمہ اللہ کہتے ہیں کہ مجھے (یقین کے ساتھ) یاد نہیں (کہ ان میں سے کون سا عدد آپ صلی اللہ علیہ وسلم نے ذکر فرمایا تھا)، آپ صلی اللہ علیہ وسلم نے (ان کی کیفیت بیان کرتے ہوئے) فرمایا: ”وہ ایک دوسرے کا ہاتھ تھامے ہوئے ہوں گے“ یا فرمایا کہ ”وہ ایک دوسرے کو پکڑے ہوئے (قطار کی صورت میں) داخل ہوں گے۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7512]

سیدنا سہل بن سعد رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”جس کسی کو اپنی نماز کے دوران کوئی معاملہ پیش آ جائے (اور وہ امام کو متنبہ کرنا چاہے) تو تالیاں بجانا عورتوں کے لیے ہے اور تسبیح کہنا مردوں کے لیے ہے۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7513]

سیدنا سہل بن سعد رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”جنت میں ایک کوڑے کے برابر جگہ دنیا اور جو کچھ اس میں ہے، ان سب سے بہتر ہے“۔ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7514]

سیدنا سہل بن سعد رضی اللہ عنہ سے روایت ہے کہ رسول اللہ صلی اللہ علیہ وسلم ہمارے پاس تشریف لائے جب کہ ہم اپنے سروں پر مٹی اٹھا کر منتقل کر رہے تھے، تو آپ صلی اللہ علیہ وسلم نے فرمایا: «اللَّهُمَّ لَا عَيْشَ إِلَّا عَيْشُ الْآخِرَهْ، فَاغْفِرْ لِلْأَنْصَارِ وَالْمُهَاجِرَهْ» ”اے اللہ! حقیقی زندگی تو صرف آخرت ہی کی زندگی ہے، پس تو انصار اور مہاجرین کی مغفرت فرما۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7515]

سیدنا سہل بن سعد رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”احد (کا پہاڑ) جنت کے ستونوں میں سے ایک ستون ہے“۔ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7516]

سیدنا سہل بن سعد رضی اللہ عنہ سے روایت ہے کہ ”قبیلہ اوس اور خزرج کے مابین کچھ تلخ کلامی ہو گئی یہاں تک کہ نوبت ایک دوسرے پر دست درازی تک جا پہنچی، رسول اللہ صلی اللہ علیہ وسلم کو جب اس کی اطلاع ملی تو آپ صلی اللہ علیہ وسلم (ان کے مابین صلح کروانے کے لیے) تشریف لے گئے؛ اسی اثنا میں سیدنا بلال رضی اللہ عنہ نے نماز کے لیے اذان دی لیکن رسول اللہ صلی اللہ علیہ وسلم وہیں رکے رہے، جب آپ صلی اللہ علیہ وسلم کی واپسی میں تاخیر ہوئی تو سیدنا بلال رضی اللہ عنہ نے نماز کی اقامت کہی اور سیدنا ابوبکر رضی اللہ عنہ لوگوں کی امامت کے لیے آگے بڑھ گئے، اتنے میں رسول اللہ صلی اللہ علیہ وسلم تشریف لے آئے اور صفوں کے درمیان سے گزرتے ہوئے اس صف تک پہنچ گئے جو سیدنا ابوبکر رضی اللہ عنہ کے بالکل پیچھے تھی؛ لوگوں نے (سیدنا ابوبکر رضی اللہ عنہ کو متوجہ کرنے کے لیے) تالیاں بجائیں، سیدنا ابوبکر رضی اللہ عنہ کا معمول تھا کہ وہ نماز کے دوران ادھر ادھر نہیں دیکھتے تھے لیکن جب تالیوں کی آواز مسلسل آئی تو انہوں نے مڑ کر دیکھا تو سامنے رسول اللہ صلی اللہ علیہ وسلم موجود تھے، نبی کریم صلی اللہ علیہ وسلم نے انہیں اشارہ فرمایا کہ ”اپنی جگہ قائم رہو“، مگر انہوں نے (پیچھے ہٹتے ہوئے) کہا: ”اللہ تعالیٰ کو یہ منظور نہیں کہ ابوقحافہ کا بیٹا رسول اللہ صلی اللہ علیہ وسلم کے سامنے کھڑا ہو کر امامت کرے“، پھر آپ صلی اللہ علیہ وسلم نے لوگوں سے مخاطب ہو کر فرمایا: ”تمہیں کیا ہوا کہ جب نماز میں کوئی معاملہ پیش آیا تو تم نے تالیاں بجانا شروع کر دیں؟ تالیاں بجانا تو عورتوں کے لیے ہے، جس کسی کو نماز کے دوران کوئی بات درپیش ہو تو اسے چاہیے کہ وہ «سُبْحَانَ اللَّهِ» ”اللہ پاک ہے“ کہے۔““ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7517]

سیدنا سہل بن سعد رضی اللہ عنہ سے روایت ہے کہ ایک مرتبہ احد پہاڑ لرزنے لگا جبکہ اس پر رسول اللہ صلی اللہ علیہ وسلم اور سیدنا ابوبکر، سیدنا عمر اور سیدنا عثمان رضی اللہ عنہم تشریف فرما تھے، تو رسول اللہ صلی اللہ علیہ وسلم نے ارشاد فرمایا: «اثْبُتْ أُحُدُ، فَمَا عَلَيْكَ إِلَّا نَبِيٌّ، أَوْ صِدِّيقٌ، أَوْ شَهِيدَانِ» ”اے احد! ساکن ہو جا، کیونکہ تجھ پر ایک نبی، ایک صدیق اور دو شہیدوں کے سوا کوئی نہیں ہے۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7518]

ابو یحییٰ رحمہ اللہ بیان کرتے ہیں کہ ہم چند خواتین کے ہمراہ سیدنا سہل بن سعد ساعدی رضی اللہ عنہ کی خدمت میں حاضر ہوئے تو انہوں نے فرمایا: ”اگر میں تمہیں بئرِ بضاعہ کا پانی پلاؤں تو تم اسے ناپسند کرو گے، حالانکہ اللہ کی قسم! میں نے رسول اللہ صلی اللہ علیہ وسلم کو اس کے پانی سے سیراب کیا ہے۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7519]