سیدنا سہل بن سعد رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کو جنت کا تذکرہ فرماتے ہوئے سنا، آپ صلی اللہ علیہ وسلم فرما رہے تھے: ”جنت میں ایسی نعمتیں ہیں جو نہ کسی آنکھ نے دیکھیں، نہ کسی کان نے سنیں اور نہ ہی کسی انسان کے دل میں ان کا کبھی خیال گزرا۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7530]

سیدنا سہل بن سعد رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”اللہ کی راہ میں ایک صبح یا ایک شام کا وقت گزارنا دنیا اور اس کی تمام تر موجودات سے کہیں بہتر ہے“۔ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7531]

قدامہ بن ابراہیم رحمہ اللہ سے روایت ہے کہ انہوں نے بیان کیا کہ میں نے حجاج کو دیکھا کہ وہ سیدنا ابن زبیر رضی اللہ عنہما کے معاملے میں عباس بن سہل رحمہ اللہ کو مار رہا تھا، اتنے میں سیدنا سہل بن سعد رضی اللہ عنہ تشریف لائے جو ایک عمر رسیدہ بزرگ تھے، ان کے سر کے بالوں کی دو مینڈھیاں (چوٹیاں) تھیں اور انہوں نے دو کپڑے یعنی تہبند اور چادر زیب تن کر رکھی تھی، وہ لوگوں کی دو صفوں کے درمیان آ کر کھڑے ہوئے اور فرمایا: ”اے حجاج! کیا تو ہمارے حق میں رسول اللہ صلی اللہ علیہ وسلم کی اس وصیت کا پاس نہیں رکھے گا؟“ اس نے پوچھا کہ رسول اللہ صلی اللہ علیہ وسلم نے آپ لوگوں کے بارے میں کیا وصیت فرمائی تھی؟ انہوں نے کہا کہ آپ صلی اللہ علیہ وسلم نے وصیت فرمائی تھی کہ ”انصار کے نیکوکاروں کے ساتھ حسنِ سلوک کیا جائے اور ان کے خطاکاروں سے درگزر کیا جائے“، راوی کہتے ہیں کہ یہ سن کر حجاج نے انہیں (عباس بن سہل رحمہ اللہ کو) رہا کر دیا۔ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7532]

سیدنا سہل بن سعد رضی اللہ عنہ سے روایت ہے کہ انہوں نے بیان فرمایا: ”میں اپنے اہل خانہ میں سحری کیا کرتا تھا، پھر میں (سحری سے فارغ ہو کر) اس قدر تیزی اور جلدی کرتا تھا کہ رسول اللہ صلی اللہ علیہ وسلم کے ہمراہ (نمازِ فجر کا) سجدہ پا سکوں۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7533]

سیدنا سہل بن سعد ساعدی رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جنت میں ایک کوڑے کے برابر جگہ دنیا اور اس میں موجود تمام تر چیزوں سے بہتر ہے، اور اللہ کی راہ میں ایک صبح یا ایک شام مہم پر نکلنا دنیا اور جو کچھ اس میں ہے ان سب سے بہتر ہے۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7534]

سیدنا سہل بن سعد رضی اللہ عنہ سے روایت ہے، انہوں نے فرمایا: ”میں نے رسول اللہ صلی اللہ علیہ وسلم کے متعلق اس وقت تین باتیں ملاحظہ کیں جب آپ صلی اللہ علیہ وسلم کا سامنے والا دانت (رباعیہ) مبارک شہید کیا گیا، چہرہِ انور زخمی ہوا اور سرِ مبارک پر پہنی ہوئی خود توڑ دی گئی؛ میں بخوبی جانتا ہوں کہ کون آپ صلی اللہ علیہ وسلم کے چہرہِ اقدس سے خون دھو رہا تھا، کون آپ صلی اللہ علیہ وسلم پر پانی ڈال رہا تھا اور جس نے (زخم پر لگانے کے لیے) جو چیز مہیا کی، اس نے کیا تیار کیا تھا۔“ اور امام ابو یعلیٰ کے ہاں اس روایت کی سند میں انقطاع پایا جاتا ہے۔ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7535]

سیدنا سہل بن سعد رضی اللہ عنہ سے روایت ہے کہ ایک شخص نے ان سے دریافت کیا کہ کیا رسول اللہ صلی اللہ علیہ وسلم کا چہرہ مبارک زخمی ہوا تھا؟ تو انہوں نے جواب دیا کہ ”رسول اللہ صلی اللہ علیہ وسلم کا چہرہ مبارک زخمی ہوا، آپ صلی اللہ علیہ وسلم کا سامنے والا دانت (رباعیہ) شہید ہوا اور آپ صلی اللہ علیہ وسلم کے سر مبارک پر خود (لوہے کی ٹوپی) کچل دیا گیا، چنانچہ سیدہ فاطمہ رضی اللہ عنہا بنتِ محمد صلی اللہ علیہ وسلم خون دھوتی تھیں اور سیدنا علی رضی اللہ عنہ ڈھال کے ذریعے ان پر پانی ڈال رہے تھے، پھر جب سیدہ فاطمہ رضی اللہ عنہا نے دیکھا کہ پانی ڈالنے سے خون کا بہاؤ مزید بڑھ رہا ہے تو انہوں نے چٹائی کا ایک ٹکڑا لے کر اسے جلایا، یہاں تک کہ جب وہ راکھ بن گیا تو اسے زخم پر چپکا دیا جس سے خون تھم گیا۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7536]

سیدنا سہل بن سعد رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کو یہ فرماتے ہوئے سنا: ”میں کل جھنڈا ایک ایسے شخص کو دوں گا جس کے ہاتھوں اللہ تعالیٰ فتح نصیب فرمائے گا“، راوی بیان کرتے ہیں کہ لوگ اسی کشمکش میں رات بھر تذکرہ کرتے رہے کہ دیکھیے جھنڈا کسے عطا کیا جاتا ہے، جب صبح ہوئی تو تمام لوگ رسول اللہ صلی اللہ علیہ وسلم کی خدمت میں حاضر ہوئے اور ہر ایک یہ امید کر رہا تھا کہ جھنڈا اسے ہی ملے گا، تب رسول اللہ صلی اللہ علیہ وسلم نے دریافت فرمایا: ”علی بن ابی طالب کہاں ہیں؟“ صحابہ کرام رضی اللہ عنہم نے عرض کیا: اے اللہ کے رسول صلی اللہ علیہ وسلم ! ان کی آنکھوں میں تکلیف ہے، آپ صلی اللہ علیہ وسلم کے حکم پر انہیں بلایا گیا تو آپ صلی اللہ علیہ وسلم نے ان کی آنکھوں میں اپنا لعابِ دہن لگایا اور ان کے لیے دعا فرمائی، جس سے وہ فوراً ایسے شفایاب ہو گئے گویا انہیں کوئی تکلیف تھی ہی نہیں، پھر آپ صلی اللہ علیہ وسلم نے انہیں جھنڈا عطا فرمایا تو سیدنا علی رضی اللہ عنہ نے عرض کیا: اے اللہ کے رسول صلی اللہ علیہ وسلم ! کیا میں ان سے اس وقت تک قتال کروں کہ وہ ہماری طرح (مسلمان) ہو جائیں؟ رسول اللہ صلی اللہ علیہ وسلم نے ارشاد فرمایا: ”پوری متانت کے ساتھ جاؤ، جب تم ان کے میدان میں اترو تو انہیں اسلام کی دعوت دو اور انہیں اللہ کے ان حقوق کے بارے میں آگاہ کرو جو ان پر (اسلام لانے کے بعد) لازم ہیں، کیونکہ اللہ کی قسم! اگر اللہ تعالیٰ تمہارے ذریعے ایک شخص کو بھی ہدایت عطا فرما دے تو یہ تمہارے لیے سرخ اونٹوں (کی بیش قیمت دولت) سے کہیں بہتر ہے“۔ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7537]

سیدنا سہل بن سعد رضی اللہ عنہ سے روایت ہے کہ انہوں نے بیان فرمایا کہ ”رسول اللہ صلی اللہ علیہ وسلم کی جائے نماز اور (قبلہ کی) دیوار کے درمیان بکری کے گزرنے جتنا فاصلہ ہوتا تھا۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7538]

سیدنا سہل بن سعد رضی اللہ عنہ سے روایت ہے کہ ایک خاتون رسول اللہ صلی اللہ علیہ وسلم کی خدمت میں حاضر ہوئیں اور عرض کیا: ”اے اللہ کے رسول! میں خود کو آپ کے لیے ہبہ کرنے (نکاح کی پیشکش کے لیے) آئی ہوں۔“ رسول اللہ صلی اللہ علیہ وسلم نے ان کی طرف دیکھا، پھر اپنی نگاہ ان پر اوپر سے نیچے تک ڈالی، جب وہ کافی دیر تک کھڑی رہیں اور آپ صلی اللہ علیہ وسلم نے کوئی فیصلہ نہ فرمایا تو وہ ایک طرف ہو کر بیٹھ گئیں۔ تب رسول اللہ صلی اللہ علیہ وسلم کے صحابہ میں سے ایک صاحب کھڑے ہوئے اور عرض کیا: ”اے اللہ کے رسول! اگر آپ کو ان کی ضرورت نہیں تو ان کا نکاح مجھ سے فرما دیں۔“ آپ صلی اللہ علیہ وسلم نے دریافت فرمایا: ”کیا تمہارے پاس (مہر کے طور پر دینے کے لیے) کوئی چیز ہے؟“ انہوں نے عرض کیا: ”اے اللہ کے رسول! اللہ کی قسم، میرے پاس کچھ نہیں ہے۔“ آپ صلی اللہ علیہ وسلم نے فرمایا: ”جاؤ (گھر جا کر) تلاش کرو۔“ وہ گئے اور واپس آ کر عرض کیا: ”مجھے کچھ نہیں ملا۔“ آپ صلی اللہ علیہ وسلم نے فرمایا: ”جاؤ اور دیکھو خواہ لوہے کی ایک انگوٹھی ہی کیوں نہ ہو۔“ وہ پھر گئے اور واپس آ کر عرض کیا: ”اے اللہ کے رسول! لوہے کی انگوٹھی بھی نہیں ملی، البتہ یہ میرا تہبند موجود ہے“ جبکہ ان کے پاس چادر تک نہ تھی، انہوں نے کہا کہ ”میں یہی ان کو مہر میں دے دوں گا۔“ رسول اللہ صلی اللہ علیہ وسلم نے فرمایا: ”تمہارے تہبند کا کیا فائدہ؟ اگر وہ اسے پہنے گی تو تمہارے پاس پہننے کو کچھ نہ رہے گا اور اگر تم اسے پہنو گے تو اس کے پاس کچھ نہیں رہے گا۔“ جب وہ صاحب کافی دیر بیٹھنے کے بعد اٹھ کر جانے لگے تو رسول اللہ صلی اللہ علیہ وسلم نے انہیں پیٹھ پھیر کر جاتے ہوئے دیکھا اور انہیں بلانے کا حکم دیا، جب وہ آئے تو آپ صلی اللہ علیہ وسلم نے دریافت فرمایا: ”تمہیں قرآن کتنا یاد ہے؟“ انہوں نے عرض کیا: ”مجھے فلاں فلاں سورتیں یاد ہیں“ اور انہوں نے ان سورتوں کو شمار کیا۔ تب آپ صلی اللہ علیہ وسلم نے ارشاد فرمایا: ”جاؤ، میں نے قرآن کی ان سورتوں کے عوض جو تمہیں یاد ہیں، اس عورت کو تمہاری ملکیت میں دے دیا (یعنی تمہارا نکاح کر دیا)۔“ [مسند أبي يعلى الموصلي/حديث سهل بن سعد الساعدي عن النبي صلى الله عليه وسلم/حدیث: 7539]