سیدنا جابر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جب تم میں سے کوئی ہانڈی پکائے تو اس کا شوربا زیادہ رکھے، پھر اس میں سے اپنے پڑوسی کو بھی دے۔“
امام طبرانی رحمہ اللہ فرماتے ہیں: ”اس حدیث کو اعمش سے ابو مسلم کے سوا کسی نے روایت نہیں کیا۔“ [المعجم الأوسط/باب الراء/حدیث: 3591]

سیدنا عبداللہ بن عمر رضی اللہ عنہما فرماتے ہیں: ”رسول اللہ صلی اللہ علیہ وسلم کی صاحبزادی بیمار ہو گئیں تو رسول اللہ صلی اللہ علیہ وسلم نے سیدنا عثمان رضی اللہ عنہ سے فرمایا: ”تم ان کے پاس ٹھہرو، کیونکہ ان کے پاس میرا یا تمہارا رہنا ضروری ہے، اور تم اس کے زیادہ حق دار ہو۔“ چنانچہ رسول اللہ صلی اللہ علیہ وسلم نے انہیں ان کی تیمارداری کے لیے پیچھے چھوڑ دیا۔ پھر جب اللہ نے آپ صلی اللہ علیہ وسلم کو فتح عطا فرمائی تو رسول اللہ صلی اللہ علیہ وسلم نے انہیں یہ بشارت دینے کے لیے پیغام بھیجا کہ اللہ نے تمہارے ذریعے ان کی تعداد پوری کر دی ہے۔“
امام طبرانی رحمہ اللہ فرماتے ہیں: ”اس حدیث کو وبرہ سے مجالد کے سوا کسی نے روایت نہیں کیا، اور مجالد سے احمد بن بشیر کے سوا کسی نے روایت نہیں کیا، اور اس میں یحییٰ جعفی منفرد ہیں۔“ [المعجم الأوسط/باب الراء/حدیث: 3592]

سیدنا مستورد بن شداد رضی اللہ عنہ بیان کرتے ہیں کہ سیدنا مقداد رضی اللہ عنہ نے فرمایا: ”جب ہم نے مدینہ کی طرف ہجرت کی تو رسول اللہ صلی اللہ علیہ وسلم نے ہمیں دس دس افراد کی ٹولیوں میں تقسیم فرما دیا، چنانچہ میں اسی ٹولی میں تھا جو رسول اللہ صلی اللہ علیہ وسلم کے ساتھ تھی۔ ہمارے پاس ایک بکری تھی جس کا دودھ ہم آپس میں بانٹ کر پیتے تھے۔ ایک رات آپ صلی اللہ علیہ وسلم کو آنے میں دیر ہو گئی، حالانکہ ہم آپ کا حصہ آپ کے لیے الگ رکھ چکے تھے۔ میں بھوکا تھا، میں اٹھا اور وہ دودھ پی لیا۔ پھر نبی کریم صلی اللہ علیہ وسلم تشریف لائے، اور میں ابھی سویا نہیں تھا۔ آپ صلی اللہ علیہ وسلم اس برتن کے پاس گئے جس میں ہم دودھ رکھا کرتے تھے تو اس میں کچھ نہ پایا۔ میں نے عرض کیا: ”اے اللہ کے رسول! کیا میں آپ کے لیے اسے ذبح نہ کر دوں؟“ آپ صلی اللہ علیہ وسلم نے فرمایا: ”نہیں۔““
امام طبرانی رحمہ اللہ فرماتے ہیں: ”اس حدیث کو اسماعیل بن ابی خالد سے محمد بن جابر کے سوا کسی نے روایت نہیں کیا، اور اس میں محمد بن زنبور منفرد ہیں۔“ [المعجم الأوسط/باب الراء/حدیث: 3593]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص کسی نابینا کو چالیس ہاتھ (کی مسافت تک) راستہ چلا کر لے جائے، اس کے لیے ایک گردن (غلام) آزاد کرنے کے برابر ثواب ہے۔“ [المعجم الأوسط/باب الراء/حدیث: 3594]

سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص تمہارے پاس امانت رکھوائے اس کی امانت اسے ادا کر دو، اور جو تم سے خیانت کرے اس کے ساتھ خیانت نہ کرو۔“
امام طبرانی رحمہ اللہ فرماتے ہیں: ”اس حدیث کو ابو حصین سے شریک اور قیس کے سوا کسی نے روایت نہیں کیا، اور اس میں طلق منفرد ہیں۔“
دار الحرمین کے طبعہ میں اسی طرح ہے، اور غالباً درست نام ”احمد بن ابراہیم دورقی“ ہے۔ [المعجم الأوسط/باب الراء/حدیث: 3595]