اللہ تعالیٰ کا فرمان ”اور (منافقین میں سے) وہ لوگ جنہوں نے نقصان پہنچانے، کفر کی تقویت، اہل ایمان کے درمیان تفرقہ ڈالنے اور اس شخص کے لیے کمین گاہ تیار کرنے کی غرض سے ایک مسجد بنائی جس نے اس سے قبل اللہ اور اس کے رسول سے جنگ کی تھی، اور وہ یقیناً قسمیں کھائیں گے کہ ہمارا ارادہ بجز بھلائی کے اور کچھ نہ تھا، جبکہ اللہ تعالیٰ گواہی دیتا ہے کہ وہ سراسر جھوٹے ہیں۔ آپ اس (مسجدِ ضرار) میں کبھی بھی قیام نہ فرمائیں، یقیناً وہ مسجد جس کی بنیاد پہلے ہی دن سے تقویٰ پر رکھی گئی ہے، اس بات کی زیادہ حقدار ہے کہ آپ اس میں (نماز کے لیے) کھڑے ہوں، اس میں ایسے لوگ موجود ہیں جو طہارت اور پاکیزگی کو محبوب رکھتے ہیں اور اللہ تعالیٰ پاک صاف رہنے والوں سے محبت فرماتا ہے۔“