اللہ تعالیٰ کے اس ارشادِ گرامی کے بیان میں کہ ”پھر وہ (جبرائیل اور نبی کریم ﷺ) دو کمانوں کے بقدر یا اس سے بھی کم نزدیک ہو گئے، پس اللہ نے اپنے بندے کی طرف وہ وحی بھیجی جو اسے بھیجنی تھی، جو کچھ (ان کی) آنکھوں نے دیکھا دل نے اس کی تکذیب نہیں کی، تو کیا تم ان سے اس بات پر جھگڑتے ہو جو وہ (اپنی آنکھوں سے) دیکھتے ہیں؟ اور یقیناً انہوں نے اسے (جبرائیل کو) ایک اور مرتبہ بھی دیکھا تھا، سدرۃ المنتہیٰ کے پاس، جس کے پاس ہی جنت الماویٰ ہے، جب کہ اس بیری کے درخت پر وہ چیز چھا رہی تھی جو (اس پر) چھا رہی تھی، (نبی ﷺ کی) نگاہ نہ تو کج ہوئی اور نہ ہی حد سے بڑھی، بلاشبہ انہوں نے اپنے رب کی عظیم الشان نشانیاں دیکھیں۔“