اللہ تعالیٰ کے اس فرمان کے متعلق کہ ”اللہ تعالیٰ نے کفر کرنے والوں کے لیے نوح کی بیوی اور لوط کی بیوی کی مثال بیان فرمائی ہے، وہ دونوں ہمارے بندوں میں سے دو صالح بندوں کے نکاح میں تھیں، پھر ان دونوں نے ان سے خیانت کی، تو وہ (انبیاء) اللہ کے مقابلے میں ان کے کچھ بھی کام نہ آسکے اور ان (عورتوں) سے کہہ دیا گیا کہ تم دونوں آگ میں داخل ہونے والوں کے ساتھ (جہنم میں) داخل ہو جاؤ۔ اور اللہ نے ایمان لانے والوں کے لیے فرعون کی بیوی کی مثال بیان فرمائی ہے، جب اس نے التجا کی کہ اے میرے پروردگار! میرے لیے اپنے پاس جنت میں ایک گھر تعمیر فرما اور مجھے فرعون اور اس کے (بد) عمل سے نجات عطا فرما اور مجھے ظالم قوم سے مخلصی دے۔ اور عمران کی بیٹی مریم (کی مثال دی) جس نے اپنی عصمت کی حفاظت کی، تو ہم نے اس میں اپنی روح پھونکی اور اس نے اپنے رب کے کلمات اور اس کی کتابوں کی تصدیق کی اور وہ اللہ کی فرماں بردار بندوں میں سے تھی۔“