اللہ تعالیٰ کے اس ارشاد کے بیان میں کہ ”ہرگز نہیں، بلاشبہ انسان یقیناً سرکشی کرتا ہے، اس بنا پر کہ وہ اپنے آپ کو غنی اور بے نیاز دیکھتا ہے، یقیناً تیرے رب ہی کی طرف لوٹ کر جانا ہے، کیا آپ نے اس شخص کو دیکھا جو ایک بندے کو نماز پڑھنے سے روکتا ہے؟ بھلا یہ تو بتائیے کہ اگر وہ (بندہ) ہدایت پر ہو، یا تقویٰ کا حکم دیتا ہو؟ بھلا یہ تو بتائیے کہ اگر اس (منکر) نے حق کو جھٹلایا اور روگردانی کی؟ کیا وہ نہیں جانتا کہ اللہ تعالیٰ یقیناً دیکھ رہا ہے؟ ہرگز نہیں، اگر وہ باز نہ آیا تو ہم اس کی پیشانی کے بالوں سے پکڑ کر اسے ضرور گھسیٹیں گے، ایسی پیشانی جو جھوٹی اور خطا کار ہے، پس اسے چاہیے کہ وہ اپنی مجلس والوں کو پکار لے، ہم بھی عنقریب عذاب کے فرشتوں کو بلا لیں گے، ہرگز نہیں، آپ اس کا کہا ہرگز نہ مانیے اور سجدہ کیجیے اور (اپنے رب کا) قرب حاصل کیجیے۔“