سیدنا جابر بن عبداللہ رضی اللہ عنہما سے روایت ہے کہ ان کے والد (سیدنا عبداللہ رضی اللہ عنہ) کو مشرکین نے غزوۂ احد کے دن شہید کر دیا، پھر ان کا مثلہ کیا اور ان کی ناک اور کان کاٹ دیے۔ سیدنا جابر رضی اللہ عنہما فرماتے ہیں: ”میں انہیں اور ان کے ساتھ کیے گئے سلوک کو دیکھنے لگا، اتنے میں انصار آئے اور انہوں نے ان پر ایک کپڑا ڈال کر ڈھانپ دیا۔ پھر میں نے وہ کپڑا ہٹایا، اور جب میں نے دیکھا کہ ان کے ساتھ کیا سلوک کیا گیا ہے تو میں چیخ اٹھا، چنانچہ انصار نے دوبارہ انہیں کپڑے سے ڈھانپ دیا اور وہ رسول اللہ صلی اللہ علیہ وسلم کے پاس گئے اور عرض کی: اے اللہ کے رسول! کیا آپ دیکھ نہیں رہے کہ جابر کیا کر رہے ہیں؟ تو آپ صلی اللہ علیہ وسلم نے فرمایا: ”اسے چھوڑ دو، اللہ کی قسم! فرشتے مسلسل اپنے پروں سے ان پر سایہ کیے ہوئے ہیں۔“ پھر اس کے کچھ عرصہ بعد میں نے عرض کی: اے اللہ کے نبی! میرے والد نے اپنے ذمہ قرض چھوڑا ہے۔ آپ صلی اللہ علیہ وسلم نے فرمایا: ”جب کھجوریں پک کر تیار ہو جائیں تو مجھے مطلع کرنا۔“ پھر جب کھجوریں تیار ہو گئیں تو میں نے نبی کریم صلی اللہ علیہ وسلم سے اس کا ذکر کیا، چنانچہ آپ صلی اللہ علیہ وسلم نے ان کے لیے دعا فرمائی، تو ان کی کھجوروں سے ان کا قرض بھی ادا ہو گیا اور اتنی ہی کھجوریں بچ بھی گئیں جتنی (عام طور پر قرض کی ادائیگی سے پہلے) بچا کرتی تھیں۔“
دار الحرمین کے مطبوعہ نسخے میں اسی طرح ہے، جبکہ درست عبارت یوں ہے: «معقل بن عبيد الله عن محمد بن المنكدر» (معقل بن عبید اللہ، محمد بن منکدر رحمہ اللہ سے روایت کرتے ہیں) اور محقق نے اس کی نشاندہی کی ہے۔ [المعجم الأوسط/باب الألف/حدیث: 1042]