ام المومنین سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم رمضان کے مہینے میں ایک رات (گھر سے) باہر تشریف لائے اور مسجد میں نماز پڑھی، تو چند لوگوں نے آپ صلی اللہ علیہ وسلم کے پیچھے آپ صلی اللہ علیہ وسلم کی اقتدا میں نماز ادا کی۔ جب صبح ہوئی تو لوگوں نے اس کا تذکرہ کیا، یہاں تک کہ جب دوسری رات آئی تو آپ صلی اللہ علیہ وسلم پھر تشریف لائے اور مسجد میں نماز پڑھی۔ پھر جب تیسری رات آئی تو آپ صلی اللہ علیہ وسلم باہر تشریف نہ لائے، چنانچہ لوگوں نے شور مچایا اور آپ صلی اللہ علیہ وسلم کا دروازہ کھٹکھٹایا، مگر آپ صلی اللہ علیہ وسلم باہر نہ نکلے۔ جب صبح ہوئی تو آپ صلی اللہ علیہ وسلم نے فرمایا: ”تمہارا (وہاں) موجود ہونا مجھ پر مخفی نہ تھا، لیکن مجھے یہ اندیشہ ہوا کہ کہیں یہ تم پر فرض نہ کر دی جائے، لہٰذا تم اس (قیام) کو (باجماعت) ادا نہ کرو۔“ [المعجم الأوسط/باب الألف/حدیث: 1043]