محمد بن قیس رحمہ اللہ اپنے والد سے روایت کرتے ہیں کہ ایک شخص سیدنا زید بن ثابت رضی اللہ عنہ کے پاس آیا اور ان سے کسی چیز کے بارے میں سوال کیا، تو سیدنا زید رضی اللہ عنہ نے اس سے فرمایا: ”تم سیدنا ابوہریرہ رضی اللہ عنہ کے پاس جاؤ، کیونکہ ایک مرتبہ میں، سیدنا ابوہریرہ رضی اللہ عنہ اور ایک اور صاحب مسجد میں بیٹھے دعا کر رہے تھے اور اپنے رب عزوجل کا ذکر کر رہے تھے کہ اسی دوران رسول اللہ صلی اللہ علیہ وسلم ہمارے پاس تشریف لائے اور ہمارے پاس بیٹھ گئے۔ ہم (احتراماً) خاموش ہو گئے تو آپ صلی اللہ علیہ وسلم نے فرمایا: «عُودُوا لِلَّذِي كُنْتُمْ فِيهِ» ”تم جس (ذکر و دعا) میں مشغول تھے اسے دوبارہ شروع کرو۔“ سیدنا زید رضی اللہ عنہ فرماتے ہیں کہ پھر میں نے اور میرے ساتھی نے سیدنا ابوہریرہ رضی اللہ عنہ سے پہلے دعا کی اور نبی صلی اللہ علیہ وسلم ہماری دعا پر آمین کہتے رہے۔ پھر سیدنا ابوہریرہ رضی اللہ عنہ نے دعا کی: «اللَّهُمَّ إِنِّي أَسْأَلُكَ مِثْلَ مَا سَأَلَكَ صَاحِبَايَ، وَأَسْأَلُكَ عِلْمًا لَا يُنْسَى» ”اے اللہ! میں تجھ سے ان تمام چیزوں کا سوال کرتا ہوں جن کا میرے ان دونوں ساتھیوں نے تجھ سے سوال کیا ہے، اور میں تجھ سے ایسے علم کا سوال کرتا ہوں جو کبھی فراموش نہ ہو۔“ تو نبی صلی اللہ علیہ وسلم نے فرمایا: ”آمین۔“ اس پر ہم نے عرض کیا: ”اے اللہ کے رسول! ہم بھی اللہ تعالیٰ سے ایسے علم کا سوال کرتے ہیں جو کبھی نہ بھولے۔“ تو رسول اللہ صلی اللہ علیہ وسلم نے فرمایا: ”یہ دوسی نوجوان اس معاملے میں تم سے سبقت لے گیا۔“
امام طبرانی رحمہ اللہ فرماتے ہیں: ”اس حدیث کو اسماعیل سے صرف فضل نے روایت کیا ہے، اور یہ سیدنا زید بن ثابت رضی اللہ عنہ سے صرف اسی سند کے ساتھ مروی ہے۔“ [المعجم الأوسط/باب الألف/حدیث: 1228]