سیدنا ابوہریرہ رضی اللہ عنہ سے روایت ہے کہ وہ مدینہ منورہ کے بازار سے گزرے تو وہاں ٹھہر کر پکارا: ”اے بازار والو! تم کس قدر عاجز و محروم ہو!“ لوگوں نے پوچھا: ”اے ابوہریرہ! وہ کس لیے؟“ انہوں نے فرمایا: ”وہاں رسول اللہ صلی اللہ علیہ وسلم کی میراث تقسیم کی جا رہی ہے اور تم یہاں (بیٹھے) ہو، وہاں جا کر اپنا حصہ کیوں نہیں وصول کرتے؟“ لوگوں نے پوچھا: ”وہ کہاں ہے؟“ انہوں نے فرمایا: ”مسجد میں۔“ چنانچہ وہ لوگ تیزی سے مسجد کی طرف دوڑے اور سیدنا ابوہریرہ رضی اللہ عنہ وہیں ان کا انتظار کرنے لگے یہاں تک کہ وہ واپس آ گئے۔ آپ نے ان سے پوچھا: ”تمہیں کیا ہوا؟“ انہوں نے کہا: ”اے ابوہریرہ! ہم مسجد میں گئے، وہاں داخل بھی ہوئے لیکن ہمیں وہاں ایسی کوئی چیز نظر نہیں آئی جو تقسیم ہو رہی ہو۔“ سیدنا ابوہریرہ رضی اللہ عنہ نے ان سے پوچھا: ”کیا تم نے مسجد میں کسی کو (کچھ کرتے ہوئے) نہیں دیکھا؟“ انہوں نے جواب دیا: ”کیوں نہیں، ہم نے کچھ لوگوں کو دیکھا جو نماز پڑھ رہے تھے، کچھ قرآن کی تلاوت کر رہے تھے اور کچھ لوگ حلال و حرام کا باہمی تذکرہ کر رہے تھے۔“ تب سیدنا ابوہریرہ رضی اللہ عنہ نے ان سے فرمایا: ” «وَيْحَكُمْ» (افسوس تم پر)! یہی تو محمد صلی اللہ علیہ وسلم کی میراث ہے۔“
امام طبرانی رحمہ اللہ فرماتے ہیں: ”اس حدیث کو عبداللہ الرومی رحمہ اللہ سے صرف علی بن مسعدہ رحمہ اللہ نے روایت کیا ہے۔“ [المعجم الأوسط/باب الألف/حدیث: 1429]