سیدنا انس بن مالک رضی اللہ عنہ سے روایت ہے کہ جب سیدنا علی رضی اللہ عنہ کی والدہ سیدہ فاطمہ بنت اسد بن ہاشم رضی اللہ عنہا فوت ہوئیں، تو رسول اللہ صلی اللہ علیہ وسلم ان کے پاس تشریف لائے اور ان کے سرہانے بیٹھ گئے، پھر فرمایا: ”اے میری ماں! اللہ تجھ پر رحم فرمائے، آپ میری حقیقی ماں کے بعد میری ماں ہی تھیں؛ آپ خود بھوکی رہتیں اور مجھے سیر کرتیں، خود لباس کی تنگی برداشت کرتیں اور مجھے پہناتیں، آپ خود لذیذ کھانے سے رک جاتیں اور مجھے کھلاتی تھیں، آپ کا مقصد اس سے صرف اللہ کی رضا اور دارِ آخرت کا حصول تھا“۔ پھر آپ صلی اللہ علیہ وسلم نے حکم دیا کہ انہیں تین تین بار غسل دیا جائے، جب وہ پانی پہنچا جس میں کافور تھا تو رسول اللہ صلی اللہ علیہ وسلم نے اسے اپنے دستِ مبارک سے ان پر بہایا، پھر رسول اللہ صلی اللہ علیہ وسلم نے اپنی قمیص مبارک اتاری اور انہیں پہنا دی، اور ان کو اسی کے اوپر کفن دیا گیا۔ پھر رسول اللہ صلی اللہ علیہ وسلم نے سیدنا اسامہ بن زید، سیدنا ابو ایوب انصاری، سیدنا عمر بن خطاب رضی اللہ عنہم اور ایک سیاہ فام غلام کو بلایا تاکہ وہ قبر کھودیں، چنانچہ انہوں نے ان کی قبر کھودی۔ جب وہ لحد (بغلی قبر) تک پہنچے تو رسول اللہ صلی اللہ علیہ وسلم نے اسے اپنے دستِ مبارک سے کھودا اور اس کی مٹی اپنے ہاتھوں سے نکالی۔ جب آپ صلی اللہ علیہ وسلم فارغ ہوئے تو رسول اللہ صلی اللہ علیہ وسلم قبر میں داخل ہوئے اور اس میں لیٹ گئے، پھر دعا فرمائی: «اللهُ الَّذِي يُحْيِي وَيُمِيتُ وَهُوَ حَيٌّ لَا يَمُوتُ، اغْفِرْ لِأُمِّي فَاطِمَةَ بِنْتِ أَسَدٍ، وَلَقِّنْهَا حُجَّتَهَا، وَوَسِّعْ عَلَيْهَا مُدْخَلَهَا، بِحَقِّ نَبِيِّكَ وَالْأَنْبِيَاءِ الَّذِينَ مِنْ قَبْلِي، فَإِنَّكَ أَرْحَمُ الرَّاحِمِينَ» ”اللہ ہی ہے جو زندگی عطا کرتا ہے اور موت دیتا ہے اور وہ خود ایسا زندہ ہے جسے کبھی موت نہیں آئے گی، (اے اللہ!) میری ماں فاطمہ بنت اسد کی مغفرت فرما، انہیں ان کی حجت (سوالاتِ قبر کے جوابات) تلقین فرما اور ان کے داخل ہونے کی جگہ کو ان پر وسیع فرما، اپنے نبی کے حق کے وسیلے سے اور ان انبیاء کے وسیلے سے جو مجھ سے پہلے ہوئے، بے شک تو سب سے بڑھ کر رحم فرمانے والا ہے“۔ پھر آپ صلی اللہ علیہ وسلم نے ان پر چار تکبیریں پڑھیں، پھر آپ صلی اللہ علیہ وسلم ، سیدنا عباس اور سیدنا ابوبکر صدیق رضی اللہ عنہم نے مل کر انہیں قبر میں اتارا۔
امام طبرانی رحمہ اللہ فرماتے ہیں: ”عاصم احول رحمہ اللہ سے اس حدیث کو صرف سفیان ثوری رحمہ اللہ نے روایت کیا ہے، اور اس کی روایت میں روح بن صلاح رحمہ اللہ منفرد ہیں“۔ [المعجم الأوسط/باب الألف/حدیث: 189]