سیدنا ابن عباس رضی اللہ عنہما، سیدنا عباس رضی اللہ عنہ سے روایت کرتے ہیں کہ انہوں نے عرض کی: ”اے اللہ کے رسول صلی اللہ علیہ وسلم ! ہم کچھ لوگوں کے چہروں میں کینہ اور دشمنی (کے آثار) پہچان لیتے ہیں۔“ آپ صلی اللہ علیہ وسلم نے دریافت فرمایا: ”تم اسے کس چیز سے پہچانتے ہو؟“ انہوں نے عرض کی: ”لوگ باتوں کا حلقہ بنائے بیٹھے ہوتے ہیں، پھر جب میں ان پر مطلع ہوتا ہوں تو وہ آپ صلی اللہ علیہ وسلم کے ساتھ میری قرابت کی وجہ سے (بات کرنے سے) رک جاتے ہیں؛ حالانکہ اگر وہ اللہ اور اس کے رسول صلی اللہ علیہ وسلم کے لیے مخلص ہوتے تو آپ صلی اللہ علیہ وسلم سے میری قرابت کی بنا پر نہ رکتے۔“ آپ صلی اللہ علیہ وسلم نے پوچھا: ”کیا تم انہیں پہچانتے ہو؟“ انہوں نے عرض کی: ”جی ہاں۔“ پھر سیدنا عباس رضی اللہ عنہ نے نبی صلی اللہ علیہ وسلم کے بازو پر اپنا ہاتھ رکھا، پھر وہ مسجد میں داخل ہوئے تو سیدنا عباس رضی اللہ عنہ نے آپ صلی اللہ علیہ وسلم سے عرض کی: ”یہ حلقہ انہی میں سے ہے۔“ چنانچہ نبی صلی اللہ علیہ وسلم نے سیدنا عباس رضی اللہ عنہ کا ہاتھ پکڑا اور اسے بلند کیا، پھر فرمایا: ”جو میرے اس چچا سے اللہ کی خاطر اور مجھ سے ان کی قرابت کی وجہ سے محبت نہ کرے، وہ مومن نہیں ہے۔“
منصور سے اس حدیث کو صرف ابن اجلح رحمہ اللہ نے روایت کیا ہے۔ [المعجم الأوسط/باب الألف/حدیث: 2963]