سیدنا عبداللہ بن ابی اوفی الاسلمی رضی اللہ عنہ سے روایت ہے کہ ایک شخص نبی صلی اللہ علیہ وسلم کی خدمت میں حاضر ہوا اور عرض کی: ”اے اللہ کے رسول! میں قرآن سیکھنے کی استطاعت نہیں رکھتا، لہٰذا مجھے ایسی بات سکھا دیجیے جو نماز میں (پڑھنے کے لیے) میرے لیے کافی ہو۔“ آپ صلی اللہ علیہ وسلم نے فرمایا: ”تم کہو: «سُبْحَانَ اللهِ، وَالْحَمْدُ لِلهِ، وَلَا إِلَهَ إِلَّا اللهُ، وَاللهُ أَكْبَرُ، وَلَا حَوْلَ وَلَا قُوَّةَ إِلَّا بِاللهِ» (اللہ پاک ہے، تمام تعریفیں اللہ ہی کے لیے ہیں، اللہ کے سوا کوئی معبود نہیں، اللہ سب سے بڑا ہے، اور گناہوں سے بچنے کی طاقت اور نیکی کرنے کی قوت اللہ ہی کی توفیق سے ہے)۔“ اس شخص نے عرض کی: ”اے اللہ کے رسول! یہ تو اللہ کے لیے ہوا، تو میں اپنے لیے کیا کہوں؟“ آپ صلی اللہ علیہ وسلم نے فرمایا: ”کہو: «اللَّهُمَّ اغْفِرْ لِي، وَارْحَمْنِي، وَاهْدِنِي، وَعَافِنِي، وَارْزُقْنِي» ”اے اللہ! مجھے بخش دے، مجھ پر رحم فرما، مجھے ہدایت عطا کر، مجھے عافیت دے اور مجھے رزق عطا فرما۔““ جب وہ شخص پیٹھ پھیر کر جانے لگا تو نبی صلی اللہ علیہ وسلم نے فرمایا: ”آگاہ رہو! اس شخص نے تمام کی تمام بھلائی حاصل کر لی“ یا فرمایا: ”تمام کی تمام بھلائی جان لی“ یا اسی طرح کے کلمات ارشاد فرمائے۔
امام طبرانی رحمہ اللہ فرماتے ہیں: ”اسے سفیان بن عیینہ رحمہ اللہ سے، انہوں نے منصور رحمہ اللہ سے، سوائے عبداللہ بن بزیع رحمہ اللہ کے کسی نے روایت نہیں کیا؛ اور یہ ابراہیم (جو سند میں ہیں) وہ ابراہیم سکسکی رحمہ اللہ ہیں، اور منصور رحمہ اللہ کی حدیث سے یہ صرف اسی طریق سے مروی ہے۔“ [المعجم الأوسط/باب الألف/حدیث: 3025]