سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص اللہ سے ملاقات کو پسند کرتا ہے، اللہ بھی اس سے ملاقات کو پسند فرماتا ہے، اور جو اللہ سے ملاقات کو ناپسند کرتا ہے، اللہ بھی اس سے ملاقات کو ناپسند فرماتا ہے۔“
صحابہ نے عرض کیا: ”اے اللہ کے رسول صلی اللہ علیہ وسلم ! ہم میں سے تو ہر کوئی موت کو ناپسند کرتا ہے۔“
آپ صلی اللہ علیہ وسلم نے فرمایا: ”اس کا یہ مطلب نہیں ہے؛ بلکہ حقیقت یہ ہے کہ مومن کے پاس جب اللہ کی طرف سے خوشخبری دینے والا (فرشتہ) آتا ہے تو وہ اللہ سے ملاقات کو پسند کرنے لگتا ہے اور اللہ بھی اس سے ملاقات کو زیادہ پسند فرماتا ہے، اور جب کافر کے پاس وہ (منظر) آتا ہے جسے وہ ناپسند کرتا ہے تو وہ اللہ سے ملاقات کو ناپسند کرنے لگتا ہے اور اللہ عزوجل بھی اس سے ملاقات کو کہیں زیادہ ناپسند فرماتا ہے۔“ [المعجم الأوسط/باب الباء/حدیث: 3155]