سیدنا زید بن ارقم رضی اللہ عنہ کے بھتیجے عبد الرحمن رحمہ اللہ بیان کرتے ہیں کہ میں ام المؤمنین سیدہ ام سلمہ رضی اللہ عنہا کی خدمت میں حاضر ہوا تو انہوں نے دریافت فرمایا: ”تم کہاں سے ہو؟“ میں نے عرض کیا: ”اہلِ کوفہ میں سے ہوں۔“ انہوں نے فرمایا: ”کیا تم ہی وہ لوگ ہو جو نبی صلی اللہ علیہ وسلم کو برا بھلا کہتے ہو؟“ میں نے عرض کیا: ”ہمیں تو نہیں معلوم کہ کوئی نبی صلی اللہ علیہ وسلم کو برا بھلا کہتا ہو۔“ انہوں نے فرمایا: ”کیوں نہیں! کیا تم سیدنا علی رضی اللہ عنہ پر لعنت نہیں بھیجتے؟ اور اس شخص پر لعنت نہیں کرتے جو ان سے محبت کرتا ہے؟ حالانکہ رسول اللہ صلی اللہ علیہ وسلم ان سے محبت فرمایا کرتے تھے۔“
اس حدیث کو عبد الرحمن بن اخی زید بن ارقم رحمہ اللہ سے صرف یزید بن ابی زیاد رحمہ اللہ نے، اور یزید رحمہ اللہ سے صرف عمرو بن ابی المقدام رحمہ اللہ نے روایت کیا ہے، جبکہ یوسف بن عدی رحمہ اللہ اسے روایت کرنے میں منفرد ہیں۔ [المعجم الأوسط/باب الألف/حدیث: 344]