سیدنا ابو درداء رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میں ہرگز ایسا نہ پاؤں کہ حوضِ کوثر پر تم میں سے کسی کے بارے میں مجھ سے نزاع کیا جائے (یعنی اسے مجھ سے دور کر دیا جائے)، تو میں کہوں: یہ تو میرے ساتھیوں میں سے ہے، لیکن جواب دیا جائے: بے شک آپ نہیں جانتے کہ انہوں نے آپ کے بعد (دین میں) کیا کیا نئی چیزیں پیدا کر دی تھیں۔“
سیدنا ابو درداء رضی اللہ عنہ نے عرض کیا: ”اے اللہ کے نبی! اللہ سے دعا کیجیے کہ وہ مجھے ان میں سے نہ بنائے۔“ آپ صلی اللہ علیہ وسلم نے فرمایا: ”تم ان میں سے نہیں ہو۔“
اس حدیث کو مسلم بن مشکم رحمہ اللہ سے صرف یزید بن ابی مریم رحمہ اللہ نے روایت کیا ہے۔ [المعجم الأوسط/باب الألف/حدیث: 397]