سیدہ ام سلیم رضی اللہ عنہا بیان کرتی ہیں کہ جب شراب کی حرمت نازل ہوئی تو رسول اللہ صلی اللہ علیہ وسلم نے ایک اعلان کرنے والے کو حکم دیا کہ وہ اعلان کرے: ”خبردار! شراب حرام کر دی گئی ہے، لہٰذا نہ اسے بیچو اور نہ خریدو، اور جس کے پاس اس میں سے کچھ ہو وہ اسے بہا دے۔“ تو سیدنا ابو طلحہ رضی اللہ عنہ نے کہا: ”اے لڑکے! مشکیزے کا منہ کھول دو اور اسے بہا دو۔“ چنانچہ لوگوں نے (شراب) بہا دی، اور ان دنوں ان کے پاس شراب کے طور پر کچی کھجور اور پکی کھجور (سے بنی نبیذ) کے سوا کچھ نہ تھا۔
امام طبرانی رحمہ اللہ فرماتے ہیں: ”اس حدیث کو امام زہری رحمہ اللہ سے ولید بن محمد موقری کے سوا کسی نے روایت نہیں کیا۔“ [المعجم الأوسط/باب العين/حدیث: 4200]