سیدنا ابوذر رضی اللہ عنہ سے روایت ہے کہ رسول اللہ صلی اللہ علیہ وسلم نے اس وقت جب کہ سورج بلند ہو رہا تھا، فرمایا: ”اے ابوذر! کیا تم جانتے ہو کہ یہ کہاں بلند ہوتا ہے؟“ میں نے عرض کیا: اللہ اور اس کا رسول بہتر جانتے ہیں۔ آپ صلی اللہ علیہ وسلم نے فرمایا: ”بے شک یہ بلند ہوتا ہے پھر غروب ہو جاتا ہے، پھر اپنے مستقر (ٹھکانے) کی طرف چلتا رہتا ہے اور عرش کے پاس آ کر سجدہ ریز ہو جاتا ہے، یہاں تک کہ اسے کہا جاتا ہے: ’اپنے طلوع ہونے کے مقام سے طلوع ہو جاؤ‘۔ اور ایک وقت وہ ہو گا جب اس سے کہا جائے گا: ’جہاں سے آئے ہو وہیں لوٹ جاؤ‘، چنانچہ وہ اپنے مقامِ غروب (مغرب) سے طلوع ہو گا، اور یہ وہ وقت ہو گا جب ﴿لَا يَنْفَعُ نَفْسًا إِيمَانُهَا لَمْ تَكُنْ آمَنَتْ مِنْ قَبْلُ أَوْ كَسَبَتْ فِي إِيمَانِهَا خَيْرًا﴾ ”کسی ایسے شخص کو اس کا ایمان نفع نہ دے گا جو پہلے سے ایمان نہ لایا ہو یا اس نے اپنے ایمان میں کوئی خیر (نیک عمل) نہ کمائی ہو“۔“
امام طبرانی رحمہ اللہ فرماتے ہیں: ”اس حدیث کو ہارون بن سعید سے صرف ابو مریم نے روایت کیا ہے، اور اسے نقل کرنے میں حکم بن مروان منفرد ہیں۔“ [المعجم الأوسط/باب العين/حدیث: 4470]