اسماعیل بن ابی حکیم رحمہ اللہ بیان کرتے ہیں کہ ہم عید الفطر کے دن عمر بن عبدالعزیز رحمہ اللہ کے پاس موجود تھے، تو انہوں نے ہمارے سامنے کھجوریں پیش کیں اور فرمایا: ”عید گاہ روانہ ہونے سے پہلے کھا لو۔“ ہم نے ان سے پوچھا: کیا اس بارے میں آپ کے پاس کوئی (حدیث) ہے؟ انہوں نے فرمایا: ”جی ہاں، مجھے ابراہیم بن عبداللہ بن قارظ رحمہ اللہ نے سیدنا ابوسعید خدری رضی اللہ عنہ کے حوالے سے بیان کیا کہ رسول اللہ صلی اللہ علیہ وسلم عید الفطر کے دن عید گاہ جانے سے پہلے کچھ تناول فرماتے تھے اور لوگوں کو بھی اسی کا حکم دیتے تھے۔“
یہ حدیث عمر بن عبدالعزیز رحمہ اللہ سے صرف اسی سند کے ساتھ مروی ہے، اسے نقل کرنے میں واقدی رحمہ اللہ منفرد ہیں۔ [المعجم الأوسط/باب العين/حدیث: 4502]