سیدنا عبادہ بن صامت رضی اللہ عنہ سے روایت ہے کہ سیدنا اسعد بن زرارہ رضی اللہ عنہ نے فرمایا: ”اے لوگو! کیا تم جانتے ہو کہ تم محمد صلی اللہ علیہ وسلم سے کس بات پر بیعت کر رہے ہو؟ بلاشبہ تم ان سے اس بات پر بیعت کر رہے ہو کہ تم عرب و عجم اور جن و انس سے جنگ کرو گے۔“ تو انہوں نے کہا: ”ہم اس کے خلاف برسرِ پیکار ہیں جو برسرِ پیکار ہو، اور اس کے لیے سراپا صلح ہیں جو صلح کرے۔“ پھر انہوں نے عرض کی: ”اے اللہ کے رسول! آپ (اپنی) شرائط پیش فرمائیں۔“ تو آپ صلی اللہ علیہ وسلم نے فرمایا: ”تم مجھ سے اس بات پر بیعت کرو کہ تم گواہی دو گے کہ اللہ کے سوا کوئی معبودِ برحق نہیں اور بے شک میں اللہ کا رسول ہوں، اور تم نماز قائم کرو گے، زکوٰۃ ادا کرو گے، (امیر کی) بات سنو گے اور اطاعت کرو گے، اور یہ کہ تم اقتدار کے معاملے میں اس کے حقداروں سے نہیں جھگڑو گے، اور یہ کہ تم میرا ویسے ہی دفاع کرو گے جیسے تم اپنی جانوں اور اپنے اہل و عیال کا دفاع کرتے ہو۔“
اس حدیث کو حماد بن سلمہ سے صرف بہز بن اسد نے روایت کیا ہے اور قتیبہ بن سعید اسے روایت کرنے میں منفرد ہیں۔ [المعجم الأوسط/باب العين/حدیث: 4538]