ام المومنین سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”جب اللہ تعالیٰ کسی بندے کے ساتھ خیر کا ارادہ فرماتا ہے تو اسے «عَسَلَهُ» کر دیتا ہے۔“ میں نے عرض کیا: اللہ کے رسول! اللہ اسے کیسے «يَعْسِلُهُ» کرتا ہے؟ آپ صلی اللہ علیہ وسلم نے فرمایا: ”اللہ تعالیٰ اسے اس کی موت سے ایک سال قبل کسی عملِ صالح کی توفیق عطا فرماتا ہے، پھر اسی پر اس کی روح قبض کر لیتا ہے۔“
یہ حدیث سیدہ عائشہ رضی اللہ عنہا سے صرف اسی سند کے ساتھ مروی ہے، یحییٰ بن صالح رحمہ اللہ اس کی روایت میں منفرد ہیں۔ [المعجم الأوسط/باب العين/حدیث: 4656]